အများစုကြုံရတဲ့ ဗောက်ပြဿနာကို ဖြေရှင်းဖို့အတွက် အလွယ်ကူဆုံး အိမ်တွင်း နည်းလမ်းလေးတစ်ခုက ကြက်သွန်နီဖျော်ရည် ပါပဲ။ ကြက်သွန်နီမှာ ဓာတ်တိုးဆန့်ကျင် ပစ္စည်းတွေ ၊ ဘက်တီးရီးယား တွေကို တိုက်ဖျက်နိုင်စွမ်းနဲ့ ရောင်ရမ်းမှုကို ဆန့်ကျင်တဲ့ ဂုဏ်သတ္တိတွေ ကြွယ်ဝစွာ ပါဝင်တာကြောင့် ဦးရေပြားကို ပြန်လည်နုပျို ကျန်းမာစေပြီး ဗောက်တွေကို ပျောက်ကင်း သက်သာစေပါတယ်။
ဒါ့အပြင် ကြက်သွန်နီမှာ ဆာလဖာနဲ့ ပရိုတင်းကဲ့သို့ အာဟာရဓာတ်များစွာလည်း ပါဝင်တာကြောင့် ဆံသားကြီးထွား သန်မာစေပြီး ဆံပင်သန်စွမ်းစေမှာ ဖြစ်ပါတယ်။ ကြက်သွန်ရည် ဖျော်ရည်လုပ်နည်းကတော့ အရမ်းကို လွယ်ကူရိုးရှင်းပါတယ်။
ကြက်သွန်နီကို လိုသလောက် ပမာဏ အခွံခွာပြီး ဘလန်ဒါထဲမှာ ရေအနည်းငယ် ရောထည့်ကာ ကြေညှက်အောင် ကြိတ်ချေပေးရပါမယ်။ ခပ်ပြစ်ပြစ် အနေအထား ရလာပြီဆိုရင်တော့ စကာတစ်ခုနဲ့ အရည်တွေကို စစ်ချပြီး အသုံးပြုလို့ ရပါပြီ။
ကဲ ဒါဆို ဗောက်တွေပျောက်ကင်းဖို့အတွက် ကြက်သွန်နီ ဖျော်ရည်ကို ဘယ်လိုအသုံးပြုရမလဲဆိုတာ ဆက်ဖတ်ကြည့်ရအောင်ပါ။
(၁) ကြက်သွန်နီ ဖျော်ရည် + အုန်းဆီ
Source: Little Extra
ပါဝင်ပစ္စည်းများ
ကြက်သွန်နီ ဖျော်ရည် စားပွဲတင်ဇွန်း ၂ ဇွန်း
အုန်းဆီ စားပွဲတင်ဇွန်း ၂ ဇွန်း
အသုံးပြုနည်း အဆင့်ဆင့်
ပါဝင်ပစ္စည်းများ အားလုံးကို ပန်းကန် တစ်လုံးထဲမှာ သမအောင်ရောမွှေပါ။ ရလာတဲ့ ကြက်သွန်နီ ဖျော်ရည်နဲ့ အုန်းဆီ အရောအနှောကို ဦးရေပြားအနှံ့ သေချာစွာ လိမ်းကျံပြီး နှိပ်နယ်ပေးပါ။ အနည်းဆုံး နာရီဝက်လောက် နှပ်ထားပါ။ ပြီးရင်တော့ အပျော့စား ခေါင်းလျှော်ရည်နဲ့ ခေါင်းလျှော်လိုက်လို့ ရပါပြီ။
(၂) ကြက်သွန်နီ ဖျော်ရည် + ရှားစောင်းလက်ပတ်ဂျယ် + Tea Tree Oil
Source: BeBeautiful
ပါဝင်ပစ္စည်းများ
ကြက်သွန်နီ ဖျော်ရည် စားပွဲတင်ဇွန်း ၃ ဇွန်း
ရှားစောင်းလက်ပတ်ဂျယ် စားပွဲတင်ဇွန်း ၂ – ၃ ဇွန်း
Tea Tree Oil ၄ – ၅ စက်
အသုံးပြုနည်း အဆင့်ဆင့်
ပါဝင်ပစ္စည်း အားလုံးကို သမအောင် ရောမွှေပေးပါ။ သမအောင် မွှေထားတဲ့ အနှစ်ကို ဦးရေပြားအနှံ့ သေချာ လိမ်းကျံပြီး ညင်သာစွာ နှိပ်နယ်ပေးပါ။ ထို့နောက် ခေါင်းမလျော်ခင် နာရီဝက်လောက် နှပ်ထားပါ။ အချိန်စေ့ ပြီဆိုရင် အပျော့စား ခေါင်းလျှော်ရည်နဲ့ ခေါင်းလျှော်လိုက်လို့ ရပါပြီ။
(၃) ကြက်သွန်နီ ဖျော်ရည် + ဒိန်ချဉ် + သံပုရာခွံအမှုန့်
Source: HerGamut
ပါဝင်ပစ္စည်းများ
ကြက်သွန်နီ ဖျော်ရည် စားပွဲတင်ဇွန်း ၃ ဇွန်း
ဒိန်ချဉ် စားပွဲတင်ဇွန်း ၂ – ၃ ဇွန်း
သံပုရာခွံအမှုန့် ( သံပုရာသီးအခွံကို အခြောက်ခံပြီး အမှုန့်ကြိတ်ပါ) ၁ ဇွန်း
အသုံးပြုနည်း အဆင့်ဆင့်
အရင်ဆုံး ကြက်သွန်နီ ဖျော်ရည် နဲ့ ဒိန်ချဉ်ကို သန့်စင်တဲ့ ပန်းကန်းတစ်လုံးထဲမှာ ရောထည့်ပြီး နှံ့အောင် မွှေပေးပါ။ ထို့နောက် သံပုရာခွံ အမှုန့် ရောထည့်ပြီး နှံ့သွားတဲ့အထိ သေချာလေး သမအောင် မွှေပေးရပါမယ်။ ရလာတဲ့ အနှစ်ကို ဦးရေပြားပေါ် အနှံ့ သေချာစွာ ပွတ်လိမ်းပေးပါ။
ဗောက်ထပြီး ယားယံတဲ့ နေရာတွေကို အနှစ်များများထည့်ပြီး နှိပ်နယ်လိမ်းကျံ ပေးပါ။ မိနစ် ၂၀ ခန့်လောက် နှပ်ထားလိုက်ပါ။ ပြီးရင်တော့ ရေအေးနဲ့ ခေါင်းလျှော် လိုက်လို့ ရပါပြီ။
အထက်ပါ နည်းလမ်း ၃ ခုကတော့ လွယ်ကူရိုးရှင်းပြီး ကုန်ကျစရိတ် သက်သာစွာနဲ့ ဗောက်ပြဿနာကို ဖြေရှင်းနိုင်မယ့် အိမ်တွင်းနည်းလမ်းကောင်းတွေ ဖြစ်ပါတယ်။
ကြက်သွန်နီ ဖျော်ရည်ဟာ သဘာဝပစ္စည်း တစ်ခုဖြစ်တာကြောင့် များသောအားဖြင့် ဘေးအန္တရာယ် ကင်းတယ်ဆိုပေမယ့် သတိထားရမယ့် အချက်အချို့လည်း ရှိပါတယ်။ အကယ်၍ ကြက်သွန်နီနဲ့ ဓာတ်မတည့်သူ တစ်ယောက်ဆိုရင်တော့ အထက်ပါ နည်းလေးတွေကို မလုပ်ဖို့ အကြံပြုချင်ပါတယ်။
ကြက်သွန်နီ ဖျော်ရည်ကို ဦးရေပြားပေါ်မှာ လိမ်းတဲ့အခါ ရောင်ရမ်းပြီး အနီအကွက်တွေ ထလာတယ်ဆိုရင်တော့ ကြက်သွန်နီနဲ့ ဓာတ်မတည့်တာ သေချာပါတယ်။
နောက်တစ်ချက်ကတော့ ကြက်သွန်နီ ဖျော်ရည်ဟာ အနံ့အားဖြင့် ပြင်းပြစူးရှတဲ့ အထဲမှာပါပါတယ်။ ဒါကြောင့် ဦးရေပြားပေါမှာ ကြက်သွန်နီအနံ စွဲမနေစေဖို့ ခေါင်းလျှော်တဲ့အခါ သေချာ အထပ်ထပ် ဆေးကြောသန့်စင်ပေးဖို့ လိုပါတယ်။
