မိန်းကလေးတစ်ယောက်အတွက် စကပ်တိုလေးတွေ၊ ဘောင်းဘီတိုလေးတွေဝတ်တဲ့အချိန်မှာ ခြေသလုံးမွှေးလေးတွေ မရှိနေဖို့ကအရေးကြီးပါတယ်။ တစ်ချို့တွေကတော့ ရိတ်ပြီးဖယ်ရှားတတ်ပေမယ့် အချိန်မြန်မြန်ပြန်ထွက်လာတတ်တော့ မကြာခဏဆိုသလို ခြေသလုံးမွှေးတွေကို ဖယ်ရှားနေရတာပေါ့။ အခုတစ်ခါမှာတော့ ပျိုမေတို့အတွက် ခြေသလုံးမွှေးတွေကို ခဏခဏဖယ်ရှားနေစရာ မလိုတော့မယ့်နည်းလမ်းကောင်းလေးတွေကို ဖော်ပြပေးလိုက်ပါတယ်။
ရိတ်ထားတဲ့ခြေသလုံးမွှေးတွေ မြန်မြန်ပြန်မထွက်လာစေဖို့အတွက်ဆိုရင် ခြေသလုံးမွှေးတွေကိုရိတ်ပြီး နောက်တစ်နေ့မှာ ဆားနဲ့ scrub သဘောမျိုးပွတ်တိုက်ပေးလိုက်သင့်ပါတယ်။ ခြေသလုံးမွှေးတွေကို ရိတ်ပြီးသွားတဲ့အချိန်မှာ ဆားနဲ့ပွတ်ပေးမယ်ဆိုရင် အသားအရေပေါ်မှာရှိနေတဲ့ ဆဲလ်သေတွေကိုဖယ်ရှားပေးနိုင်တာကြောင့် နောက်ထပ်ပေါက်လာမယ့် ခြေသလုံးမွှေးတွေကိုလည်း နှောင့်နှေးစေပါတယ်။
ရေချိုးပြီးသွားတဲ့အခါမှ ဖယ်ရှားပစ်တာက အကောင်းဆုံးနည်းလမ်းပါ။ ရေချိုးတဲ့အခါမှာ အသုံးပြုတဲ့ဆပ်ပြာက အရေပြားပေါ်မှာရှိတဲ့ အဆီနဲ့အညစ်အကြေးတွေကို ဖယ်ရှားပေးနိုင်ပြီး အသားအရေကိုလည်းရေဓာတ်ပြန်လည်ပြည့်ဝစေတာဆိုတော့ ရေချိုးပြီးသွားတဲ့အချိန်မှ အမွှေးတွေကိုဖယ်ရှားပေးမယ်ဆိုရင် အကောင်းဆုံးပါပဲ။
ကောင်းမွန်တဲ့ပစ္စည်းတွေကိုရွေးချယ်ဖို့လိုပါတယ်။ သင်အသုံးပြုမယ့် အမွှေးရိတ်တဲ့ဓားက ကောင်းမွန်နေမှ အမွှေးတွေကိုသေချာဖယ်ရှားနိုင်ပြီး ရုပ်ပျက်ဆင်းပျက်တွေလည်း မဖြစ်စေတော့မှာပေါ့။
ရေနဲ့စိမ်ပေးဖို့လည်းလိုပါတယ်။ အမွှေးတွေကိုရိတ်ပြီးသွားတဲ့အခါမှာ ရေထဲမှာခြေထောက်ကို ခဏလောက်စိမ်ထားပြီး အဝတ်နဲ့ပြန်လည်ခြောက်သွေ့အောင် သုတ်ပေးလိုက်ပါ။ ဒီလိုလုပ်ပေးတာက သင့်ခြေထောက်မှာရှိတဲ့ မွှေးညင်းပေါက်တွေကို ကျဉ်းသွားစေပြီး အသားအရေယားယံတာတွေကိုလည်း သက်သာစေမှာပဲဖြစ်ပါတယ်။
သံလွင်ဆီလေးလိမ်းပေးပါ။ အမွှေးတွေကိုဖယ်ရှားပြီးသွားတဲ့အခါမှာ အသားအရေကောင်းဖို့အတွက်ရော သဘာဝအဆီတစ်မျိုးမျိုးကို လိမ်းပေးသင့်ပါတယ်။ ဒီနေရာမှာ အသင့်တော်ဆုံးကတော့ သံလွင်ဆီပဲပေါ့။ သံလွင်ဆီက အသားအရေကိုနူးညံ့စေပြီး ကြည်လင်စေတာကြောင့် အမွှေးတွေကိုရိတ်ပြီးသွားတဲ့အခါမှာ သုံးဖို့အသင့်တော်ဆုံးပဲပေါ့။
Featured Image Source: Good Looking Tan
