ဒီဆောင်းပါးလေးမှာတော့ အလှအပရေးရာ နဲ့ တစ်ကိုယ်ရည်သန့်ရှင်းရေးအတွက် မုန့်ဖုတ်ဆိုဒါရဲ့ အသုံးဝင်ပုံလေးတွေကို မျှဝေပေးချင်ပါတယ်။
(၁) ဆံပင်နဲ့ ဦးရေပြားအတွက် သန့်စင်ဆေးအဖြစ် အသုံးပြုနိုင်တယ်
အသုံးပြုနည်းကတော့ မုန့်ဖုတ်ဆိုဒါ လက်ဖက်ရည်ဇွန်း တစ်ဇွန်းခန့်ကို ခေါင်လျှော်ရည်နဲ့ ရောပြီး ဦးရေပြားအနှံ့ ပွတ်လိမ်းပေးရပါမယ်။ ဦးရေပြားနဲ့ ဆံသားအနှံ့ကို ညင်သာစွာ နှိပ်နယ်ပွတ်လိမ်းပြီးရင်တော့ မိနစ်အနည်းငယ်ထားပြီး ရေအေးနဲ့ ဆေးချလိုက်လို့ ရပါပြီ။
(၂) ရေချိုးဆပ်ပြာအဖြစ် သုံးနိုင်တယ်
အသုံးပြုနည်းကတော့ ရေချိုးကန် သို့မဟုတ် Bathtub ထဲကို ရေဖြည့်ပြီး မုန့်ဖုတ်ဆိုဒါ ခွက်တစ်ဝက်ခန့် ထည့်ကာ မွှေပေးပါ။ ထို့နောက် Bathtub ထဲကို ဝင်စိမ့်ပြီး ဖုတ်ဆိုဒါ အမှုန့်လေးတွေနဲ့ အရေပြားကို ညင်သာစွာ ပွတ်ပေးရပါမယ်။ ပြီးရင်တော့ ရေချိုးလိုက်လို့ရပါပြီ။
(၃) အရေပြားယားယံခြင်းနဲ့ အက်ကွဲခြင်းတွေကို သက်သာစေတယ်
အသုံးပြုနည်းကတော့ မုန့်ဖုတ်ဆိုဒါ တစ်ခွက်နဲ့တစ်ဝက်ခန့်ကို ရေ ၃ လီတာ ကျော်ကျော်လောက်နဲ့ ရောစပ်ပြီး လာရတဲ့ ဖျော်ရည်ထဲကို အဝတ်သန့်သန့်နဲ့ နှစ်ပြီး အရေပြားယားယံနီမြန်းမှု ဖြစ်စေတဲ့ နေရာတဝိုက်ကို ညင်သာစွာ ပွတ်လိမ်းပေးနိုင်ပါတယ်။ ၁၅ မိနစ်လောက် ထားပြီးရင်တော့ ရေဆေးလိုက်လို့ ရပါပြီ။
(၄) ခံတွင်းသန့်စင်ဆေးရည်အဖြစ် အသုံးပြုနိုင်တယ်
မုန့်ဖုတ်ဆိုဒါ စားပွဲတင်ဇွန်း တစ်ဇွန်းခန့်ကို ရေတစ်ဖန်ခွက်နဲ့ ရောပြီး စက္ကန့် ၃၀ ကနေ ၁ မိနစ်ခန့် ငုံ့ကာ ပလုတ်ကျင်းပေးပါ။ ပြီးရင်တော့ ရိုးရိုးရေနဲ့ ပလုတ်ထပ်ကျင်းနိုင်ပါတယ်။ ဒါဆိုရင် ခံတွင်းအတွင်းက ဘက်တီးရီးယားပိုးမွှားတွေနဲ့ အနံ့သက်ဆိုးတွေကို ရှင်းထုတ်ပေးနိုင်မှာပဲ ဖြစ်ပါတယ်။
(၅) ကိုယ်နံ့ဆိုးတွေကို ရှင်းထုတ်ပေးနိုင်တယ်
အသုံးပြုနည်းကတော့ မုန့်ဖုတ်ဆိုဒါ စားပွဲတင်ဇွန်း ၁ ဇွန်းကို နှစ်သက်ရာ Essential Oil တစ်ခုခုနဲ့ ရောစပ်ပါ။ ရလာတဲ့ အရောအနှောကို ဂွမ်းစလေးနဲ့ တို့ပြီး ချွေးနံ့ဆိုးတွေထွက်စေတဲ့ ဂျိုင်းကြားလိုနေရာတွေကို ပွတ်လိမ်းပေးပါ။ ချွေးထွက်များခြင်းကို တားဆီးပေးပြီး အနံ့ဆိုးထွက်ခြင်းကို သက်သာစေဖို့ မုန့်ဖုတ်ဆိုဒါ အမုန့်ကိုလည်း အနည်းငယ်လိမ်းပေးနိုင်ပါတယ်။
