ကိုးရီးယားမင်းသမီးလေး Suzy လိုလက်မောင်းသွယ်သွယ်လေးရစေမယ့် Arm Workout ပြုလုပ်နည်း

Kpop Idol လောကမှာတင်မက Kdrama ထိပ်တန်းမင်းသမီးအဖြစ်နဲ့ပါအောင်မြင်နေတဲ့ Bae Suzy ဟာဆိုရင် မျက်နှာနဲ့ ခန္ဓာကိုယ်အစိတ်အပိုင်းတွေ ခွဲစိတ်ပြင်ဆင်ထားခြင်းမရှိတဲ့ သဘာဝအလှကိုပိုင်ဆိုင်ထားသူလေး ဖြစ်ပါတယ်။ သူမဟာ လက်ရှိမှာ လာမယ့် ၂၀၂၂ ခုနှစ်အတွင်းထွက်ရှိမယ့် Thriller အမျိုးအစားဇာတ်လမ်းတွဲ တစ်ခုကို ရိုက်ကူးနေပြီး နောက်ဆုံးထွက်ရှိခဲ့တဲ့ “Start Up” ဇာတ်လမ်းတွဲနဲ့လည်း အောင်မြင်မှုများစွာ ရရှိခဲ့တာဖြစ်ပါတယ်။
အသက် ၂၇ နှစ်ရှိပြီဖြစ်ပြီး အဆိုနဲ့ သရုပ်ဆောင်ပိုင်းတွေမှာ ထူးချွန်တဲ့ သူမကတော့ အမြဲနုပျိုသွယ်လျနေဖို့ Diet နဲ့ Workout တွေကိုပုံမှန်ပြုလုပ်လေ့ရှိသူတစ်ဦးပါ။ ဒီတစ်ခေါက်မှာ အဆီပိုမရှိတဲ့ လက်မောင်းသွယ်သွယ်လေးတွေပိုင်ဆိုင်ဖို့ မင်းသမီး Suzy ရဲ့ Gym Trainer ကိုယ်တိုင်ပြောပြထားတဲ့ သူမပြုလုပ်လေ့ရှိတဲ့ (၁၀) မိနစ် လက်မောင်းလေ့ကျင့်ခန်းအကြောင်းကို ပြောပြပေးချင်ပါတယ်။

၁။ Arm Circles (Forward and Backward)

ပထမဆုံးလေ့ကျင့်ခန်းကတော့ လက်နှစ်ဖက်ကို ဘေးဘက်ဆန့်တန်းထားပြီး စက်ဝိုင်းပုံ ခပ်မြန်မြန်လှည့်ပေးရပါမယ်။ ပြီးနောက် စက်ဝိုင်းပြောင်းပြန်အနေအထားနဲ့ အလားတူပြန်လှည့်ပေးပါ။ ဒီလေ့ကျင့်ခန်းကိုတော့ အရှေ့၊အနောက် စက္ကန့်သုံးဆယ် ၂ကြော့စီ ပြုလုပ်ပေးရမှာဖြစ်ပါတယ်။

၂။ Overhead Tricep Extension

ပုံပါအတိုင်း လက်နှစ်ဖက်နဲ့အလေးတုံးကို နောက်ပြန်မြှောက်ထားပြီး နားရွက်ဘေးနှစ်ဖက်မှာ ကပ်ထားပါ။ ပြီးနောက်မှာတော့ အပေါ်အောက် ဖြေးဖြေးချင်း အကွေးအဆန့်ပြုလုပ်ပေးရမှာဖြစ်ပါတယ်။ ဒီပုံစံအတိုင်း စက္ကန့် ၂၀ စီ ၃ ခေါက်ပြုလုပ်ပေးပါ။ အိမ်မှာလေ့ကျင့်ခန်းလုပ်လေ့ရှိတဲ့သူတွေအနေနဲ့ အလေးတုံးအစား ရေအပြည့်ပါတဲ့ရေဘူးအကြီးတစ်ဗူးကိုင်ပြီး ပြုလုပ်နိုင်ပါတယ်။

၃။ Tricep Dip

သင့်လက်တွေကို ခုံတစ်ခုံ ဒါမှမဟုတ် ကြမ်းပြင်ပေါ်ကိုနောက်ပြန်ထောက်ထားပြီး အထိုင်အချပြုလုပ်ပေးရပါမယ်။ ဒီလေ့ကျင့်ခန်းက လက်တွေကိုအားပြုထားရတဲ့အတွက် ပုခုံး၊ လက်မောင်းစတဲ့ ခန္ဓာကိုယ်အပေါ်ပိုင်းကြွက်သားတက်စေပါတယ်။ Tricep Dip ကိုတစ်နေ့မှာ ၁၅ စက္ကန့် ၃ ကြော့ခန့်ပြုလုပ်ပေးသင့်ပါတယ်။

၄။ Tricep Kickback

ပုံပါအတိုင်း ခြေထောက်တစ်ချောင်းကိုရှေ့ထုတ်ပြီး ဒူးအနည်းငယ်ကွေးထားပေးပါ။ ပြီးနောက် တံတောင်နှစ်ဖက်ကို ထိန်းထားပြီး အလေး မ လျက် လက်အကွေးအဆန့်ပြုလုပ်ပေးရပါမယ်။ ဒီပုံအတိုင်း စက္ကန့် ၂၀ ၃ ကြော့ပြုလုပ်ပေးပါ။ ဒီလေ့ကျင့်ခန်းအတွက်လည်း ရေဘူးကိုအစားထိုးပြီးပြုလုပ်နိုင်ပါတယ်နော်။

၅။ Bicep Curl

Photo Source: Verywell

နောက်ထပ် Suzy ပြုလုပ်လေ့ရှိတဲ့ လက်မောင်းလေ့ကျင့်ခန်းတစ်ခုကတော့ လက်နှစ်ဖက်နဲ့ အလေး မ ပြီး အတင်အချပြုလုပ်ပေးရမှာဖြစ်ပါတယ်။ ဒီလေ့ကျင့်ခန်းကိုလည်း စက္ကန့် ၂၀ တစ်မိနစ်ခန့်ပြုလုပ်ပေးပါ။

၆။ High Plank Shoulder Taps

Plank အနေအထားနဲ့ လက်နှစ်ဖက်ကို ခပ်မြင့်မြင့်ထောက်ထားပြီး ပုံပါအတိုင်း သင့်လက်မောင်းတွေပေါ်ကို လက်တစ်ဖက်ချင်းအလှည့်ကျ မြှောက်ပြီးပုတ်ပေးရပါမယ်။ ဒီလေ့ကျင့်ခန်းကိုတော့ စက္ကန့် ၃၀ ၂ခေါက်ပြုလုပ်ပေးသင့်ပါတယ်။