ASUS ကနေ ယခုနှစ်အစောပိုင်းတုန်းက 14″ Laptop တွေထဲမှာ စွမ်းဆောင်ရည်အကောင်းဆုံးဖြစ်လာတဲ့ Zephyrus G14 Laptop ကို မိတ်ဆက်ခဲ့ပါတယ်။ အခုအချိန်မှာတော့ အဆိုပါ Zephyrus G14 Laptop က မြန်မာနိုင်ငံကိုဝင်ရောက်လာတော့မှာဖြစ်ပါတယ်။ စမ်းကြည့်ဖြစ်တဲ့အချိန်အတိုင်းအတာတစ်ခုအပြီးမှာတော့ Gamer တွေတင်မဟုတ်ဘဲ Multimedia နဲ့ Productivity ပိုင်းအတွက် စွမ်းဆောင်ရည်ကောင်းကောင်း Laptop တစ်လုံးရှာနေတယ်ဆိုရင် ထိပ်ဆုံးက ရွေးချယ်စရာဖြစ်လာမှာပါ။
ASUS Zephyrus G14 Laptop ဟာ Processor ပိုင်းမှာ AMD 4000 Series ထဲက အမြင့်ပိုင်းဖြစ်တဲ့ Ryzen 4800HS Processor ကိုအသုံးပြုထားပါတယ်။ အဆိုပါ Ryzen 4800HS Processor ဟာ 8-Core ၊ 16-Threads Processor အမျိုးအစားဖြစ်ပြီး 7nm Zen2 Architecture ကိုအခြေခံထားတဲ့အတွက် စွမ်းဆောင်ရည်ပိုင်းမှာ ထပ်တန်းအဆင့်ရှိနေမှာဖြစ်ပါတယ်။ တကယ်လို့ ပြိုင်ဘက်ဖြစ်တဲ့ Intel Processor တွေနဲ့ နှိုင်းယှဥ်မယ်ဆိုရင် 10th Gen Intel i7 နဲ့ i9 Processor ဝန်းကျင်အထိ စွမ်းဆောင်နိုင်တာကိုလည်း တွေ့ရပါတယ်။
RAM အနေနဲ့လည်း 16GB 3200MHz DDR4 RAM ကိုထည့်သွင်းပေးထားပြီး Storage ပိုင်းအတွက်ကိုတော့ 512GB NVMe PCI-E SSD ကိုထည့်သွင်းပေးထားပါတယ်။ Graphic ပိုင်းအတွက်ကတော့ Nvidia ရဲ့ Geforce GTX1660Ti 6GB GDDR6 ကို အသုံးပြုထားပါတယ်။ အဲ့ဒီအတွက် Multiasking ပိုင်းတွေအပြင် Application အသုံးပြုမှုတွေ၊ Game Startup Time နဲ့ Storage Transfer ပြုလုပ်တဲ့နေရာမှာ တော်တော်လေးကို မြန်ဆန်တာကိုတွေ့ရပါတယ်။
Gaming ပိုင်းမှာလည်း GTX1660Ti ရဲ့ စွမ်းဆောင်ရည်ကအားရဖို့ကောင်းပြီး Full HD Resolution နဲ့ဆော့ကစားတဲ့အချိန်မှာ လက်ရှိထွက်ရှိထားသမျှ AAA Titles Game အကုန်လုံးနီးပါးကို 70~80fps အထက်နဲ့ဆော့ကစားနိုင်မှာဖြစ်ပါတယ်။ တကယ်လို့ QHD Resolution နဲ့ဆော့ကစားမယ်ဆိုရင်တော့ Setting ကိုအမြင့်ဆုံးတင်ဆော့ရင် 60fps ဝန်းကျင်ခန့်ရှိမှာပါ။ တခြားသော CS : Go ၊ DOTA 2 လိုမျိုး eSport Game တွေအတွက်ကတော့ QHD Resolution နဲ့ Setting အမြင့်ဆုံးထားဆော့ရင်တောင်မှ 100+ fps ရရှိတာကိုတွေ့ရပါတယ်။ Game အကြာကြီးဆော့နေစဥ်မှာလည်း Heat တက်တာမရှိသလောက်ကို နည်းပါးပြီးတော့ Fan သံအနေနဲ့လည်း အနှောင့်အယှက်ဖြစ်စေတဲ့အထိ ဆူညံခြင်းမရှိတာကတော့ အားသာချက်တစ်ခုလို့ ပြောရမှာပါ။
Display ပိုင်းအနေနဲ့ Zephyrus G14 မှာ 14″ Size ကိုမှ QHD Resolution (2560×1440) အထိထောက်ပံ့ပေးနိုင်ပြီးတော့ Refresh Rate အနေနဲ့ 60Hz ကိုမှ Adaptive Sync နည်းပညာပါဝင်မှာဖြစ်ပါတယ်။ Pantone Validated Display အမျိုးအစားဖြစ်သလို 100% sRGB Color Gamut နဲ့ 300 Nits Brightness ရှိတဲ့အတွက် Color Accuracy နဲ့ Viewing Experience ပိုင်းမှာလည်း တော်တော်လေးကိုကောင်းမွန်တယ်လို့ သတ်မှတ်နိုင်မှာဖြစ်ပါတယ်။
Display အပြင် Audio ပိုင်းမှာလည်း Zephyrus G14 ဟာ Laptop ရဲ့အောက်ခြေမှာ Smart AMP နည်းပညာနဲ့ 2.5W Speaker ၂ လုံးအပြင် Laptop အပေါ်ဘက်မှာပါ 0.7W Tweeter Speaker ၂ လုံးကိုထည့်သွင်းပေးတာကိုတွေ့ရပါတယ်။ နာမည်ကြီး Audio Setup ဖြစ်တဲ့ Dolby Atmos စနစ်ကိုလည်း သေချာထည့်သွင်းပေးထားပြီးတော့ စမ်းသပ်ကြည့်တဲ့အချိန်မှာလည်း လက်ရှိ 14″ Laptop တွေထဲမှာ အကောင်းဆုံးလို့တောင် သတ်မှတ်နိုင်တဲ့ Surround Sound Experience ကို ပေးစွမ်းနိုင်တာကိုတွေ့ရပါတယ်။
Design ပိုင်းအနေနဲ့လည်း ASUS Zephyrus G14 ဟာ ထူးခြားစွာကွဲထွက်နေတဲ့ AniMe Matrix Display နည်းပညာအပြင် နောက်ဖက် Display Lid နဲ့ Heat Vent Design တွေကို တခြားသော ROG Gaming Laptop တွေကနေ ကွဲထွက်နေအောင် ပြုလုပ်ထားတယ်လို့ ပြောရမှာပါ။ Laptop Lid ကိုဖွင့်လိုက်တဲ့အချိန်မှာလည်း Keyboard ကို စာရိုက်လို့ပိုကောင်းအောင်နဲ့ Airflow ပိုင်းအတွက် ကိုယ်ထည်ကို အနည်းငယ်မြှင့်တင်ပေးတဲ့ ErgoLift Design ကိုအသုံးပြုထားတာကို တွေ့ရပါတယ်။ အဆိုပါ ErgoLift Design ဟာ ZenBook နဲ့ VivoBook တွေမှာတွေ့ရများပြီး အခုမှာ ASUS Gaming Series Laptop တစ်လုံးမှာမြင်တွေ့ရတာလည်းဖြစ်ပါတယ်။
Keyboard ပိုင်းမှာကတော့ Single Color Backlit Chicklet Keyboard ကိုထည့်သွင်းပေးထားပြီး စာရိုက်ရတဲ့ Experience ပိုင်းမှာ တော်တော်လေးကိုအဆင်ပြေတာကိုတွေ့ရပါတယ်။ Numpad တော့ပါဝင်ခြင်းမရှိပေမယ့် Audio Volume Control နဲ့ ROG Armoury Crate အတွက် Hot Keys တွေပါဝင်မှာဖြစ်ပါတယ်။ Trackpad အနေနဲ့လည်း Glass Coating အပြင် Windows Precision Driver ကြောင့် Mouse နဲ့အသုံးမပြုဘူးဆိုရင်လည်း အဆင်ပြေမှာပါ။
Zephyrus G14 Laptop ဟာ AniMe Matrix Display နည်းပညာကို ပထမဆုံးအသုံးပြုလာတဲ့ Laptop တစ်လုံးဖြစ်ပြီး အဆိုပါ Mini LED ၁,၂၁၅ လုံးဟာ Brightness Level ၂၅၆ ခုအထိပြောင်းလဲနေပြီး ကိုယ့်စိတ်ကြိုက် Animation ၊ Logo ၊ GIF File နဲ့ စာတန်းတွေကို Laptop ရဲ့ နောက်ကျောဘက် Lid မှာ ပြသနိုင်ပါတယ်။ ဒါတင်မဟုတ်သေးဘဲ System ရဲ့ Notification ၊ Battery Level နဲ့ Music Playback တွေအပေါ်မှုတည်ပြီးလည်း အလိုအလျောက် Lighting ကိုပြောင်းလဲသွားမယ်လို့ သိရပါတယ်။
Ports တွေအနေနဲ့ကတော့ ပုံမှန် HDMI ၊ 3.5mm Audio Port ၊ Kensington Lock ၊ USB 3.2 Gen 1 Type-A ၂ ပေါက် ၊ USB 3.2 Gen 2 Type-C ၁ ပေါက်အပြင် နောက်ထပပ် USB 3.2 Gen 2 Type-C ၁ ပေါက်ကနေ DisplayPort 1.4 နဲ့ USB Power Delivery ကိုပါ Support ပေးနိုင်မှာဖြစ်ပါတယ်။ အဲ့ဒီအတွက် 180W Charger အပြင် 65W USB-C PD Charger တွေကိုပါ အသုံးပြုပြီး အားပြန်လည်သွင်းနိုင်မှာပါ။
Battery အနေနဲ့ကတော့ 76Wh Battery ပါဝင်မှာဖြစ်ပြီး AniMe Matrix Display နဲ့ QHD Resolution တို့ကြောင့် ပုံမှန်အသုံးပြုရုံပဲဆိုရင် ၆ နာရီကနေ ၇ နာရီဝန်းကျင်အထိ အသုံးပြုနိုင်မှာဖြစ်ပါတယ်။ တခြားသော Feature တွေအနေနဲ့ကတော့ Wi-Fi 6 ၊ Bluetooth 5.0 လိုမျိုးကိုပါ Support ပေးသွားမှာပြီး Power Button မှာ Windows Hello Fingerprint Sensor ကိုပါ ထည့်သွင်းပေးထားပါတယ်။
ASUS Zephyrus G14 Laptop ဟာ အရောင်အနေနဲ့ Eclipse Gray နဲ့ Moonlight White ဆိုပြီးရွေးချယ်နိုင်မှာဖြစ်ပြီး AniMe Matrix Display ပါဝင်တဲ့ Version နဲ့ မပါတဲ့ Version ထွက်ရှိလာမှာဖြစ်ပါတယ်။ အထူအနေနဲ့ကတော့ AniMe Matrix Display ပါဝင်တယ်ဆိုရင် 19.9mm နဲ့ အလေးချိန် 1.7Kg ရှိမှာဖြစ်ပြီး မပါဝင်ဘူးဆိုရင်တော့ 17.9mm နဲ့ 1.6Kg ပဲရှိမှာဖြစ်ပါတယ်။ စျေးနှုန်းအနေနဲ့ကတော့ Ryzen 4800HS ၊ 16GB RAM ၊ 512GB SSD ၊ Nvidia GTX1660TI ၊ 14″ QHD 60Hz Display နဲ့ AniMe Matrix Display ပါဝင်တဲ့ Version ကို $1,599 (မြန်မာငွေ ၂၂ သိန်းကျော်) နဲ့ရောင်းချသွားမှာဖြစ်ပြီး ကျန်တဲ့ စျေးပိုသက်သာတဲ့ Version တွေလည်း ဝင်ရောက်လာဖို့ရှိတယ်လို့ သိရပါတယ်။
ဘာပဲဖြစ်ဖြစ် ASUS Zephyrus G14 Laptop ဟာ Gaming Laptop တစ်လုံးဆိုတာထက် အလွယ်တကူသယ်ဆောင်သွားနိုင်တဲ့ 14″ Laptop တွေထဲမှာ Performance ပိုင်းရော Multimedia ပိုင်းမှာပါ အကောင်းဆုံးစွမ်းဆောင်ရည်ကို ပေးစွမ်းနိုင်မယ့် Laptop တစ်လုံးလို့တောင် ပိုပြီးပြောနိုင်မှာဖြစ်ပါတယ်။
