အသားအရေလေး ချောမွတ်ကြည်တောက်ပြီး ပြစ်မျိုးမှဲ့မထင်အလှလေး ပိုင်ဆိုင်ချင်တာကတော့ ပျိုမေတိုင်းရဲ့အိပ်မက်တစ်ခုပါပဲ့နော်။ ဒါပေမဲ့ လုံလောက်တဲ့အာဟာရဓာတ် မရရှိတဲ့အခါမျိုးတွေ၊ ခဏခဏအိပ်ရေးပျက်တာတွေများလာတဲ့အခါ၊ ရေသောက်နည်းတဲ့အခါတွေ၊ အသားအရေက ဖုန်မှုန့်အညစ်အကြေးတို့နဲ့ ထိတွေ့ဖန်များလာတဲ့အခါမျိုးတွေကြောင့် ကိုယ့်ရဲ့အသားအရေအလှအပက တဖြည်းဖြည်းညစ်လာပြီး ခြောက်ကပ်လာကာ ဝက်ခြံအမဲစက်တွေထွက်တဲ့အထိပါ ဖြစ်လာနိုင်ပါတယ်။
အသားအရေအလှအပကို အချိန်အကြာကြီး ထိန်းသိမ်းထားချင်တယ်ဆိုရင်တော့ သင့်အသားအရေကို သေချာဂရုစိုက်သင့်ပါတယ်။ ဒါကြောင့် MyStyle Myanmar က မယ်မဒီလေးတွေအတွက် သဘာဝနည်းလမ်းလေးတွေနဲ့ အသားအရေလှပစေဖို့ ဘယ်လိုလုပ်လို့ရသလဲဆိုတာကို မျှဝေပေးလိုက်ပါတယ်။ အခုဖော်ပြပေးမယ့် သဘာဝနည်းလမ်းတွေ အသုံးပြုပြီး အသားအရေကို ထိန်းသိမ်းစောင့်ရှောက်မယ်ဆိုရင်တော့ မိန်းကလေးအချင်းချင်းတောင် အားကျရတဲ့အလှပိုင်ရှင်လေးတွေ ဖြစ်လာမှာပါနော်။
နနွင်းမှုန့်ဖြင့် ပေါင်းတင်ပါ
နနွင်းမှုန့် လက်ဖက်ရည်ဇွန်း ၁ ဇွန်းကို နွားနို့ လက်ဖက်ရည်ဇွန်း တစ်ဇွန်း၊ ပျားရည် လက်ဖက်ရည်ဇွန်း တစ်ဝက်တို့ဖြင့် သမအောင် ရောမွှေပေးလိုက်ပါ။ ရရှိလာတဲ့အရောအနှောကို မျက်နှာနဲ့ လည်ပင်းပေါ်မှာ လိမ်းကျံပေးလိုက်ပါ။ ၁၅ မိနစ်၊ မိနစ် ၂၀ ခန့်ကြာတဲ့အခါမှာတော့ မျက်နှာသစ်ပေးလိုက်လို့ရပါပြီ။
ဒီနည်းလမ်းဖြင့် တစ်ပတ်တစ်ခါ ပေါင်းတင်ပေးမယ်ဆိုရင်တော့ သင့်အသားအရေက သဘာဝအတိုင်း တောက်ပြောင်လာပါလိမ့်မယ်။
အုန်းဆီဖြင့် ပေါင်းတင်ပါ
အုန်းဆီ လက်ဖက်ရည်ဇွန်း တစ်ဇွန်း၊ ပျားရည် လက်ဖက်ရည်ဇွန်း တစ်ဇွန်းနှင့် နွားနို့ လက်ဖက်ရည်ဇွန်း တစ်ဇွန်းတို့ကို သမအောင် ရောမွှေပေးလိုက်ပါ။ ရရှိလာတဲ့အနှစ်ကို မျက်နှာနဲ့ လည်ပင်းပေါ်မှာ လိမ်းကျံပေးလိုက်ပါ။ ၁၅ မိနစ်ပြည့်တဲ့အခါမှာတော့ မျက်နှာသစ်ပေးလို့ရပါပြီ။
ဒီပေါင်းတင်နည်းကိုတော့ တစ်ပတ်နှစ်ကြိမ်ခန့် ပြုလုပ်ပေးရုံမျှဖြင့် လုံလောက်ပါတယ်။
ဒိန်ချဉ်ဖြင့် ပေါင်းတင်ပါ
ဒိန်ချဉ် စားပွဲတင်ဇွန်း ၂ ဇွန်း၊ ပျားရည် စားပွဲတင်ဇွန်း ၁ ဇွန်းနှင့် သံပုယိုရည် စားပွဲတင်ဇွန်း ၁ ဇွန်းတို့ကို သမအောင် ရောမွှေပေးလိုက်ပါ။ ရရှိလာတဲ့အနှစ်ကို မျက်နှာနဲ့ လည်ပင်းပေါ်မှာ သုတ်လိမ်းပေးလိုကပါ။ ၁၅ မိနစ်၊ မိနစ် ၂၀ ခန့်ကြာတဲ့အခါမှာတော့ မျက်နှာသစ်ပေးလိုက်လို့ရပါပြီ။
ဒီနည်းလမ်းဖြင့် ပေါင်းတင်မယ်ဆိုရင်တော့ တစ်ပတ်တစ်ကြိမ်ခန့် ပေါင်းတင်ပေးရပါလိမ့်မယ်။
Source: Stylecraze.com