ဆယ်လီတွေ အနုပညာရှင်တွေလို့ ဆိုလိုက်တာနဲ့ သူတို့ရဲ့ Lifestyle မှာက ကြွယ်ဝချမ်းသာမှုနဲ့ ဂုဏ်ရှိန်တွေ ပြည့်ဝနေကြတယ်လို့ မကြာခဏ လူတွေတွေးမိတတ်ကြပါတယ်။
နောက်ပြီး အနုပညာရှင်တွေဖြစ်လို့ ဈေးပေါတဲ့ ဈေးသက်သာတဲ့ အလှကုန်ပစ္စည်းတွေဆိုရင် သုံးမှာမဟုတ်ပါဘူးလို့လည်း စဥ်းစားကြမှာပါပဲ။
ဒါပေမယ့် ဈေးလည်းသင့်တော်ပြီးတော့ လူအများစုလည်း ဝယ်သုံးနိုင်မယ့် တချို့အလှကုန်ပစ္စည်းတွေဟာဆိုရင် သင်မထင်မှတ်ထားလောက်တဲ့ ရလဒ်ကောင်းတွေကို ပေးစွမ်းနိုင်ပါတယ်။
ဈေးကြီးပေးဝယ်ရတဲ့ Brand ပစ္စည်းတွေမှ တကယ်ကောင်းတာ လူသုံးများတာရယ်လို့မဟုတ်ဘဲနဲ့ ဈေးနှုန်းသင့်တင့်တဲ့ အလှကုန်ပစ္စည်းတွေကလည်း အစွမ်းထက်တယ်ဆိုတာကို အခုဖော်ပြပေးသွားမယ့် အနုပညာရှင်တွေက သက်သေပြသွားမှာဖြစ်ပါတယ်။
ကဲ..ဒါဆိုရင် ဘယ်အနုပညာရှင်တွေကတော့ ဘယ်လိုမျိုး ကိုယ်နဲ့ရင်းနှီးနေတဲ့ အလှကုန်ပစ္စည်းတွေကို အသုံးပြုနေသလဲဆိုတာ အခုပဲ ကြည့်လိုက်ရအောင်နော်။
1. Helen Mirren
ဂန္တဝင် သရုပ်ဆောင်မင်းသမီးကြီး Helen Mirren ကတော့ သူမ အသက်ကြီးလာတာနဲ့အမျှ မိတ်ကပ်လိမ်းတာကို တဖြည်းဖြည်း လျှော့ချလာပြီးတော့ သဘာဝ Natural Look နဲ့ပဲ အနေများလာတယ်လို့ ဖြေဖူးပါတယ်။
အကြောင်းတစ်ခုခုကြောင့် မိတ်ကပ်လိမ်းဖြစ်ရင်တောင်မှ မိတ်ကပ်ဖျက်ဆေး၊ မျက်နှာသစ်ဆေး၊ ရေတို့နဲ့ သေချာပြောင်စင်အောင် ဖျက်လေ့ရှိပါတယ်။ နောက်ပြီးတော့ ယနေ့အချိန်ထိ သူမရဲ့ Skincare Steps တွေထဲမှာ ထည့်သွင်းအသုံးပြုနေဆဲ အလှကုန်ပစ္စည်းကတော့ ဒေါ်လာ ၁၅ ကျပ်တန် L’Oréal Age Perfect rosy tone moisturizer cream ပဲ ဖြစ်ပါတယ်။
မြန်မာတွေနဲ့ မစိမ်းတော့တဲ့ L’Oréal တံဆိပ်က Age Perfect rosy tone moisturizer cream ဟာ ကျန်းမာပြီးသဘာဝအတိုင်း Glow တဲ့ အသားအရေကို ပေးစွမ်းနိုင်ပါတယ်။ ဒါ့အပြင် အသားအရေကိုလည်း တင်းတင်းရင်းရင်းရှိစေပြီးတော့ အရေးအကြောင်းတွေကို အတတ်နိုင်ဆုံး လျော့ချပေးပါတယ်။
2. Regina King
အမေရိကန် မင်းသမီးနဲ့ ဒါရိုက်တာ Regina King ကတော့ အလှအပကြိုက်သူတို့ လိုက်ပြီးဝယ်ယူအသုံးပြုနိုင်မယ့် အလှကုန်ပစ္စည်းတစ်မျိုးကို အခုချိန်ထိ သုံးနေဆဲပါပဲ။ အဲ့တာကတော့ Vaseline တံဆိပ်ဖြစ်ပြီး Cocoa Radiant lotion ကို အထူးသဖြင့် ဆောင်းရာသီလိုအချိန်မျိုးတွေမှာ အထူးတလည်း သုံးလေ့ရှိပါတယ်။
Cocoa Radiant lotion မှာ glycerin, Vaseline jelly, နဲ့ 100% pure cocoa seed butter တို့ ပါဝင်တာကြောင့် အသားအရေကို နက်ရှိုင်းစွာ အစိုဓာတ်ဖြည့်တင်းနိုင်ပြီး စေးကပ်မှုလုံးဝမရှိပါဘူး။ ခြောက်သွေ့ညစ်နွမ်းနေတဲ့ အသားအရေတွေကို ပြန်ပြီး ဝင်းလက်လာအောင် စွမ်းဆောင်ပေးနိုင်ပါတယ်။
3. Jennifer Lawrence
အော်စကာမင်းသမီး Jennifer Lawrence ကတော့ သူမရဲ့အသားအရေကို အမြဲတမ်း Fresh ဖြစ်နေအောင်လို့ ဂျေးချွတ်လေ့ရှိပါတယ်။ အဲ့အတွက် သူမအသုံးပြုတဲ့ ပစ္စည်းကတော့ St. Ives Apricot Scrub ပါပဲ။ ဒီတံဆိပ်ဆိုလည်း မြန်မာပရိတ်သတ်တွေနဲ့ ရင်းနှီးပြီးသားပါနော်။
St. Ives Apricot Scrub ဟာ Oil-free ဖြစ်တာမို့ အသားအရေယားယံတာမျိုးတွေလည်း မဖြစ်စေဘဲ ၁၀၀ ရာခိုင်နှုန်း သဘာဝပါဝင်ပစ္စည်းတွေပဲ အသုံးပြုထားတာမျိုး တစ်ပတ်မှာ သုံးလေးကြိမ်လောက် သုံးပေးနိုင်ပါတယ်။
4. Hilary Duff
နောက်ထပ် ဟောလိဝုဒ်မင်းသမီးချော Hilary Duff ကတော့ သူမဟာ Neutrogena ကထုတ်တဲ့ ဒေါ်လာ ၁၀ တန် sesame oil ကို တော်တော်လေး အသုံးပြုသူတစ်ဦးပါလို့ အင်တာဗျူးတစ်ခုမှာ ပြောပြဖူးပါတယ်။
အထိအတွေ့အပြင် အနံ့အသက်ကိုပါ သဘောကျတာမို့ Body Cream မလိမ်းခင် Base အနေနဲ့ အသုံးပြုပါတယ်။ Neutrogena light sesame oil ဟာ အရမ်းကိုပေါ့ပါးတာမို့ လိမ်းထားပြီးရင် စေးကပ်ကပ်ဖြစ်မနေဘဲ အသားအရေထဲ စိမ့်ဝင်မှုမြန်ဆန်ပါတယ်။
သင်က အဆီပြန်တတ်သူဆိုရင်တော့ ဒီတစ်ခုနဲ့ပဲ လုံလောက်ပေမယ့်လည်း အသားအရေခြောက်သူဆိုရင်တော့ အပေါ်ကနေ တခြား Product တစ်ခု ထပ်လိမ်းပေးဖို့ လိုပါလိမ့်မယ်။
5. Drew Barrymore
Charlie’s Angels ဇာတ်ကားနဲ့ လူသိများတဲ့ မင်းသမီးကြီး Drew Barrymore ကတော့ အခုဆို အသက် ၄၈ နှစ်ရှိနေပါပြီ။ အခုချိန်ထိလည်း သူမရဲ့ အသားအရေကို ဂရုစိုက်နေသေးသလို သူမအသုံးပြုနေတဲ့ ပစ္စည်းတွေထဲက တစ်ခုကတော့ Olay Regenerist Micro-Sculpting moisturizer ပဲဖြစ်ပါတယ်။
ဒါကို အသုံးပြုလာတာဟာလည်း ၁၀ နှစ်ကျော် ကြာခဲ့ပါပြီ။ Olay Regenerist Micro-Sculpting moisturizer ဟာ အသားအရေကို သဘာဝအတိုင်း Glow စေပြီး ဘာဆိုးဆေး အနံ့အသက်မှ မပါဝင်တာမို့ နေ့စဥ်သုံးအတွက် သင့်တော်ပါတယ်။
ပေါ့ပါးအိစက်တဲ့ Texture ကြောင့် Dry to Combination Skin အထိ အသုံးပြုနိုင်ပါတယ်။
6. Olivia Wilde
Olivia Wilde ကတော့ ဈေးလည်းတော်ပြီး နာမည်လည်းကြီးတဲ့ CeraVe က Moisturizer ကို အသုံးပြုပါတယ်။ အသားအရေ Barrier ကို ကာကွယ်ပေးပြီး ယားယံခြင်း၊ နီရဲခြင်း၊ ခြောက်သွေ့ခြင်းနဲ့ ဝက်ခြံတွေမဖြစ်အောင် တားဆီးပေးနိုင်ပါတယ်။
ဘယ်လိုအသားအရေမျိုးမဆို အသုံးပြုနိုင်သလို CeraVe moisturizing facial lotion မှာ SPF 30 လည်း ပါဝင်သေးတာမို့ အသားအရေကိုထိခိုက်နိုင်တဲ့ UV Rays တွေ ရန်မှလည်း ကာကွယ်ပေးမှာဖြစ်ပါတယ်။
