အားလုံးပဲ မင်္ဂလာပါ၊ အသားအရေလေး ဖြူစင်ဝင်းပပြီး အမဲစက်ကင်းစင်ချင်တာကတော့ လူတိုင်းရဲ့ အိပ်မက်ပါပဲ။
ဒါပေမဲ့ အဲ့ဒီ့အိပ်မက်နဲ့ ဝေးသထက်ဝေးအောင် ပြုလုပ်နေတဲ့ တရားခံတွေကတော့ လေထုညစ်ညမ်းမှု၊ ခရမ်းလွန်ရောင်ခြည်နဲ့ နေလောင်ဒဏ်၊ စိတ်ဖိစီးမှုနဲ့ ကျန်းမာရေးနဲ့ မညီညွှတ်တဲ့ အစားအသောက် စားသုံးခြင်းပဲဖြစ်ပါတယ်။
အဲ့ဒီတရားခံတွေကြောင့် အသားအရေက ညစ်နွမ်းနွမ်းနဲ့ ကြည့်မကောင်းဖြစ်လာပြီဆိုရင် တိုက်ထုတ်ပေးမည့် သဘာဝနည်းလမ်းကောင်းလေးတွေ ရှိပါတယ်။ အတူတူဆက်ဖတ်ကြည့်လိုက်ရအောင်နော်။
သင်္ဘောသီးနဲ့ ပျားရည်
ပျားရည် လက်ဖက်ရည်ဇွန်း တစ်ဇွန်းနဲ့ အတုံးသေးသေးလေးတွေ လှီးထားတဲ့ သင်္ဘောသီး ပန်းကန်လုံးတစ်ဝက်စာ လိုပါတယ်။ သင်္ဘောသီးအတုံးတွေကို အနှစ်တွေဖြစ်အောင် ချေလိုက်ပြီး ပျားရည်ရောပေါင်းလိုက်ပါ။ ပျားရည်နဲ့ သင်္ဘောသီးအနှစ်တို့ သမအောင် မွှေပြီးသွားပြီဆိုရင်တော့ မျက်နှာပေါ်ကို မိနစ် ၂၀ ခန့် သုတ်လိမ်းပြီးမှ ရေနွေးနွေးလေးနဲ့ မျက်နှာသစ်လိုက်ပါ။ ရေနွေးနွေးနဲ့ သစ်ပြီးသွားရင် ရေအေးအေးလေးနဲ့ နောက်တစ်ခေါက် ထပ်သစ်ပြီးမှ မျက်နှာကို ညင်ညင်သာသာလေး ပြန်သုတ်ရမယ်နော်။ ဒီနည်းလမ်းလေးကို ညတိုင်း မအိပ်ခင်ပြုလုပ်ပေးမယ်ဆိုရင်တော့ ဖြူဖွေးနူးညံ့တဲ့ မျက်နှာလေးပိုင်ဆိုင်နိုင်ပါပြီ။
လိမ္မော်သီးအခွံနဲ့ ဒိန်ချဉ်
လိမ္မော်သီးအခွံအနည်းငယ်နဲ့ ဒိန်ချဉ် လက်ဖက်ရည်ဇွန်း တစ်ဇွန်းတို့ လိုအပ်ပါတယ်။ လိမ္မော်သီးအခွံကို နေရောင်ထဲမှာ ၂ ရက်၊ ၃ ရက်ခန့် အခြောက်ခံလိုက်ပါ။ ပြီးရင် ကြိတ်ချေပြီး အမှုန့်တွေရလာပါလိမ့်မယ်။ ရလာတဲ့ အမှုန့် လက်ဖက်ရည်ဇွန်း တစ်ဇွန်းခန့်ကို ဒိန်ချဉ်နဲ့ သမအောင် ရောမွှေလိုက်ပြီး အနှစ်ဖြစ်သွားပြီဆိုရင်တော့ သန့်စင်ထားပြီးသော မျက်နှာပေါ်ကို သုတ်လိမ်းလိုက်ပါ။ ၁၅ မိနစ်၊ မိနစ် ၂၀ ခန့်ကြာရင်တော့ ရေနွေးနွေးလေးနဲ့ မျက်နှာသစ်ပေးလိုက်ပါ။ တစ်ရက်ခြား တစ်ခါ ညအိပ်ရာမဝင်ခင် ပြုလုပ်ပေးမယ်ဆိုရင် အသားအရေလေး ဖြူဖွေးလာပါလိမ့်မယ်။
သံပုရိုရည်၊ ပျားရည်နဲ့ နွားနို့
လိုအပ်တဲ့ ပါဝင်ပစ္စည်းတွေကတော့ နွားနို့ လက်ဖက်ရည်ဇွန်းတစ်ဇွန်း၊ သံပုရိုရည် လက်ဖက်ရည်ဇွန်း တစ်ဇွန်း၊ ပျားရည် လက်ဖက်ရည်ဇွန်း တစ်ဇွန်း တို့ပါပဲ။ အဲ့ဒီပစ္စည်းတွေကို ပန်းကန်လုံးတစ်လုံးထဲ ထည့်ပြီး သမအောင် ရောမွှေလိုက်ပါ။ သန့်စင်တဲ့ မျက်နှာပေါ်ကို အဲ့ဒီအနှစ်တွေ သုတ်လိမ်း လိုက်ပြီး မိနစ် ၂၀ ကြာမှာ ရေနွေးနွေးလေးနဲ့ မျက်နှာသစ်လိုက်ပါ။ တစ်ရက်ခြားတစ်ခါ ညအိပ်ရာမဝင်ခင် ပြုလုပ်ပေးမယ် ဆိုရင်တော့ မျက်နှာလေးက ဖြူစင်ဝင်းမွတ်လာမှာ အမှန်ပါပဲ။
Source: www.stylecraze.com
