ပုံမှန်ဆိုရင် သင့်ချစ်သူနဲ့သင်နဲ့ လက်ချင်းဘယ်လိုကိုင်လေ့ရှိပါသလဲ။ ချစ်သူအချင်းချင်း တစ်ယောက်လက်ကို တစ်ယောက်ဆုပ်ကိုင်ကြတာက သဘာဝပါပဲ။ သင်တို့ချစ်သူအချင်းချင်း တစ်ယောက်လက်ကိုတစ်ယောက်ဆုပ်ကိုင်တဲ့ပုံစံကနေ သင်တို့တစ်ယောက်အပေါ်မှာ တစ်ယောက်ထားတဲ့ ခံစားချက်ကို သိရှိနိုင်သလို၊ သင်တို့အချစ်ရေးအကြောင်းကိုလည်း သိရှိနိုင်ပါတယ်။

စိတ်ပညာရှင်တွေကလည်း ချစ်သူအချင်းချင်းလက်ဆုပ်ကိုင်ပုံကနေတဆင့် သူတို့ရဲ့ခံစားချက်တွေကို လေ့လာထားပါတယ်။

လက်ချောင်းလေးတွေကို ပြေပြေလေး ယှက်ထားတယ်

ဒီပုံစံနဲ့ လက်ချင်းဆုပ်ကိုင်ထားလေ့ရှိတယ်ဆိုရင် သင်တို့က စိတ်ကစားတတ်ကြသူတွေမဟုတ်ပါဘူး။ စိတ်ခံစားချက်က တည်ငြိမ်မှုရှိပြီး တစ်ယောက်ကိုတစ်ယောက်လည်း ယုံကြည်မှုရှိကြပါတယ်။ အခြားသူတွေကိုလည်း သင်တို့ကသမီးရည်းစားတွေပါဆိုတာကို ကြေညာဖို့ဝန်မလေးပါဘူး။ တစ်ယောက်ရဲ့ကိုယ်ရေးကိုယ်တာကို အခြားတစ်ယောက်က လေးစားသမှုရှိပြီး ကိုယ်ပိုင်လွတ်လပ်ခွင့်ပေးထားပါတယ်။ သင်တို့အချစ်ရေးက တစ်ယောက်ကိုတစ်ယောက်လေးစားမှုရှိတဲ့ အချစ်ရေးပေါ့။

လက်ဖဝါးချင်း ဆုပ်ကိုင်ထားတယ်

အမျိုးသားများက သူတို့ရဲ့ကောင်မလေးကို ကာကွယ်ချင်တဲ့အခါမျိုး၊ ကောင်မလေးကို စိတ်အေးလက်အေးနေစေချင်တဲ့အခါမျိုးမှာ အခုလိုဆုပ်ကိုင်လေ့ရှိပါတယ်။ ဒီအချစ်ရေးကတော့ တစ်ယောက်ကိုတစ်ယောက် အပြန်အလှန်တာဝန်ယူလိုစိတ်ရှိခြင်းကို ဖော်ပြနေပါတယ်။

လက်ချောင်းလေးတွေကို တင်းတင်းကြပ်ကြပ် ယှက်ထားမယ်

သင်တို့က ရုပ်ရည်ကို ဦးစားပေးပြီး ရွေးချယ်ခဲ့ကြတဲ့ အချစ်ရေးမဟုတ်ပါဘူး။ တစ်ယောက်နဲ့တစ်ယောက်မှာ လေးနက်တဲ့ခံစားချက်တွေ ရှိပါတယ်။ အားနည်းချက်နဲ့ အပြစ်အနာအဆာတွေကို ကွယ်ဝှက်ထားခြင်းမရှိဘဲ တစ်ယောက်နဲ့တစ်ယောက် ရိုးသားမှုရှိကြပါတယ်။ သင်တို့ရဲ့ဆက်ဆံရေးက ယုံကြည်မှုနဲ့ တစ်ယောက်နဲ့တစ်ယောက်ဂရုစိုက်တတ်မှုကနေ ဖြစ်တည်လာတာပါ။

လက်ချောင်းတစ်ချောင်းကိုသာ ကိုင်ထားခြင်း

သင်တို့က တစ်ယောက်နဲ့တစ်ယောက် လေ့လာအကဲခတ်နေကြတဲ့အဆင့်မှာပဲ ရှိပါသေးတယ်။ သမီးရည်းစားဆက်ဆံရေးတစ်ခု အစပျိုးနေတဲ့အချိန်ပဲရှိပါသေးတယ်။ တစ်ယောက်နဲ့တစ်ယောက် တာဝန်ယူတတ်ဖို့ အဆင်သင့်မဖြစ်သေးတာကို ဖော်ပြနေပါတယ်။

မတော်တဆ ထိမိတဲ့ပုံစံ

လမ်းလျှောက်တဲ့အချိန်မျိုးမှာ လက်ချင်းကိုင်ထားတာမျိုးမဟုတ်ဘဲ မတော်တဆထိမိတဲ့အနေအထားမျိုးဆိုရင်တော့ သင်တို့ထဲကတစ်ယောက်ယောက်က ထုတ်ဖော်မပြတဲ့ ကရုဏာသက်တဲ့ခံစားချက်ရှိနေပါတယ်။ ဒါပေမဲ့ သင်တို့ရဲ့ဆက်ဆံရေးက သူငယ်ချင်းဆက်ဆံရေးထက် မပိုပါဘူး။

လက်ချောင်းများကို ဆုပ်ကိုင်ထားခြင်း

လက်ချောင်းများကို ဆုပ်ကိုင်ထားတဲ့သူက သူ့ရဲ့လက်တွဲဖော်အပေါ်မှာ လေးစားမှု၊ သစ္စာစောင့်သိမှုနဲ့ အမြဲတမ်းကာကွယ်ဖို့အဆင်သင့်ဖြစ်နေကြောင်း ဖော်ပြပါတယ်။ လက်ကိုဆုပ်ကိုင်ခြင်းခံရတဲ့သူကတော့ သူ့လက်တွဲဖော်ကို အပြည့်အဝယုံကြည်ကြောင်း ဖော်ပြနေပါတယ်။ ရေရှည်တည်တံ့ခိုင်မြဲမယ့် အချစ်ရေးပါပဲ။

လက်ကောက်ဝတ်ကို ဆုပ်ကိုင်ထားခြင်း

ဒီပုံစံဆုပ်ကိုင်လေ့ရှိတဲ့ စုံတွဲတွေကတော့ တစ်ယောက်နဲ့တစ်ယောက် ရုပ်ပိုင်းဆိုင်ရာအရဆွဲဆောင်မှုရှိတယ်လို့ ခံယူထားပါတယ်။ တစ်ယောက်နဲ့တစ်ယောက် မှီခိုတတ်ကြပါတယ်။ လက်ကိုင်တဲ့ပုံစံကို ကြည့်ခြင်းအားဖြင့် ရန်လိုစိတ်အနည်းငယ်ရှိပြီး တစ်ကိုယ်ကောင်းစိတ်လည်း ရှိတတ်ကြပါတယ်။

ခါးဖက်ထားခြင်း

ခါးဖက်ပြီး လမ်းလျှောက်ရတဲ့အခါ အပေးအယူမျှနေရမှာဖြစ်တဲ့အတွက်ကြောင့် သင်တို့ရဲ့အချစ်ရေးကလည်း အပေးအယူတည့်တဲ့ ဆက်ဆံရေးပါပဲ။ တစ်ယောက်နဲ့တစ်ယောက် ရင်းနှီးမှုအပြည့်အဝရှိပါတယ်။ ဒါပေမဲ့ နှစ်ယောက်စလုံးဖက်ထားတာမဟုတ်ဘဲ တစ်ယောက်တည်းကပဲ ခါးဖက်ထားတယ်ဆိုရင် အဲ့ဒီဖက်ထားတဲ့လူက ပိုင်ဆိုင်လိုစိတ်ရှိကြောင်း ဖော်ပြနေပါတယ်။

Source: Brightside.me