အချစ်တစ်ခုတည်ဆောက်တဲ့အခါ၊ အိမ်ထောင်တစ်ခုဖန်တီးတည်ဆောက်တဲ့အခါ လူတိုင်းကတော့ အောင်မြင်ပျော်ရွှင်တဲ့အချစ်ရေး၊ အိမ်ထောင်ရေးကိုသာ ပိုင်ဆိုင်ချင်ကြတာပါ။ ပျော်ရွှင်ဖို့အတွက် လိုအပ်တဲ့အဓိကစံနှုန်းကတော့ သစ္စာစောင့်သိခြင်းပဲဖြစ်ပါတယ်။
ယနေ့ခေတ်လို စနိုက်ကြော်တွေ၊ ကြာကူလီတွေ၊ ခြံခုန်တဲ့သူတွေ ပေါများနေတဲ့ခေတ်ထဲမှာ မိမိချစ်သူ မိမိအပေါ်သစ္စာစောင့်သိဖို့အတွက် ပြုလုပ်ပေးရမယ့် အခြေခံအချက်လေးတွေရှိတယ်လို့ သိပ္ပံပညာရှင်များက ပြောကြားထားပါတယ်။
၁။ သူမအတွက်ကတော့ ပြောသမျှကို စိတ်ရှည်သည်းခံနားထောင်ပေးတဲ့ ချစ်သူကိုလိုလားပြီး သူတို့အတွက်ကတော့ ဝါသနာတူတဲ့ ချစ်သူမျိုးကို လိုလားကြပါတယ်။
မိန်းကလေးတွေက သူတို့ရဲ့ချစ်သူ သူတို့ကို ဂရုတစိုက်နားထောင်စေချင်ကြပြီး အကြံဉာဏ်ပေးတာကို လိုချင်ကြပါတယ်။ အိမ်ထောင်ရေးမှာဆိုလည်း ထိုနည်းအတိုင်းပါပဲ။ တစ်ယောက်နဲ့တစ်ယောက်အချိန်ပေးပြီး စကားပြောခြင်းအားဖြင့် ပျော်ရွှင်တဲ့ဆက်ဆံရေးကိုတည်ဆောက်နိုင်ပါတယ်။ အိမ်ထောင်ရေးအကြံပေးသူ စိတ်ရောဂါပညာရှင် ပါရဂူဘွဲ့ရ Willard F. Herley, Jr ရဲ့ပြောကြားချက်အရ အမျိုးသမီးများက သူတို့လက်တွဲဖော်ရဲ့ အာရုံစိုက်ခံရခြင်းကို တစ်ပတ်မှာ ၁၅ နာရီခန့်လိုအပ်ပါတယ်။ တစ်ရက်ဆို ၂ နာရီကျော်ကျော်ခန့် လိုအပ်တာပေါ့။
ယောကျာ်းလေးများအနေနဲ့ကတော့ သူတို့ဝါသနာပါတဲ့ ငါးမျှားခြင်း၊ အားကစားပြုလုပ်ခြင်း၊ ဂိမ်းဆော့ခြင်းတွေကို သူတို့ရဲ့ကောင်မလေးက အတူတူပြုလုပ်ပေးစေချင်ကြပါတယ်။ စိတ်ပညာရှင်များပြောကြားချက်အရ မိမိတို့ရဲ့ချစ်သူကောင်မလေးနဲ့အတူတူ စိတ်လက်အပန်းပြေအောင် အနားယူခြင်းက သူတို့အတွက် ဒုတိယအရေးအကြီးဆုံးဖြစ်ပါတယ်။
၂။ သူမအတွက် ရိုးသားခြင်းက လိုအပ်ပြီး သူတို့အတွက်ကတော့ ဆွဲဆောင်မှုရှိတဲ့ လက်တွဲဖော်ကို လိုချင်ကြပါတယ်။
မိန်းကလေးတွေရဲ့ယုံကြည်မှုကို မဆုံးရှုံးဖို့အတွက် အသေးအဖွဲကိစ္စလေးတွေကအစ သူတို့ကို ပွင့်ပွင့်လင်းလင်းပြောပြထားသင့်ပါတယ်။
ယောကျာ်းလေးတွေအနေနဲ့ကလည်း ဘယ်လောက်ပဲ ရုပ်ပိုင်းဆိုင်ရာကို ဦးစားမပေးဘူးလို့ ပြောနေပါစေ၊ သူတို့ရဲ့မိန်းကလေးက ဉာဏ်ရည်ထက်မြက်တာတစ်ခုတည်းနဲ့တင် မလုံလောက်သေးပါဘူး။ ဆွဲဆောင်မှုရှိနေစေချင်ပါသေးတယ်။
၃။ သူမအတွက်ကတော့ သူမမိသားစုအတွက် လုံလောက်တဲ့ ပိုက်ဆံရှိချင်ပြီး သူ့အတွက်ကတော့ သက်သောင့်သက်သာဖြစ်တဲ့ အိမ်လေးလိုအပ်ပါတယ်။
ပိုက်ဆံလုံလုံလောက်လောက်ရှိချင်တယ်လို့ ပြောတဲ့အခါ စာဖတ်သူအနေနဲ့ ပိုက်ဆံကဘယ်တော့မှ လုံလောက်တဲ့အမျိုးမဟုတ်ဘူးလို့ ပြန်ပြောစရာရှိပါလိမ့်မယ်။ ဒီနေရာမှာ သိပ္ပံပညာရှင်တွေ ဆိုလိုတဲ့ လုံလောက်မှုဆိုတာ သူမဘဝတည်ငြိမ်ဖို့အတွက် သူမဘဝလုံခြုံဖို့အတွက်ကိုသာ ဆိုလိုတာပါ။ ငွေမက်ခြင်းကို ဆိုလိုတာမဟုတ်ပါဘူး။
အမျိုးသားများအနေနဲ့ကတော့ ပြဿနာများဖြေရှင်းပြီး အလုပ်တာဝန်များကို တစ်နေကုန်ဆောင်ရွက်ပြီးတဲ့အခါမှာ ပင်ပန်းခဲ့သမျှကို ပြေပျောက်ပေးနိုင်မယ့် ပတ်ဝန်းကျင်တစ်ခု၊ သက်သောင့်သက်သာ၊ ဇိမ်ကျကျနဲ့ အနားယူအပန်းဖြေနိုင်မယ့် သပ်သပ်ရပ်ရပ်ရှိတဲ့ အိမ်လေးတစ်လုံးကို လိုချင်ကြပါတယ်။
၄။ သူမအတွက်ကတော့ တာဝန်ကျေပွန်တဲ့ခင်ပွန်းကောင်း၊ ဖခင်ကောင်းတစ်ယောက်လိုအပ်ပြီး သူ့အတွက်ကတော့ လေးစားခံရခြင်းကို တောင့်တကြပါတယ်။
အမျိုးသမီးများအတွက်ကတော့ သူ့လက်တွဲဖော်က သူတို့ကလေးအတွက် စံပြပုဂ္ဂိုလ်တစ်ယောက်ဖြစ်စေချင်ကြပြီး ကလေးတွေရဲ့ပညာရေးနဲ့ ကိုယ်ရည်ကိုယ်သွေးတိုးတက်ဖို့အတွက် တာဝန်ယူစေချင်ကြပါတယ်။
အမျိုးသားများကတော့ သူတို့ရဲ့လက်တွဲဖော်ဆီက လေးစားခံရမှုက သူတို့အတွက် အားဆေးတစ်ခွက်လိုပါပဲ။ ဒါမှလည်း သူတို့ကိုယ်သူတို့ဂုဏ်ယူမိတတ်ကြပြီး ပိုမိုကောင်းမွန်အောင် ထပ်တိုးလုပ်ဆောင်ချင်စိတ်ဖြစ်လာမှာပါ။
Source: Brightside.me
