ဆိုးရွားလှတဲ့ခြေထောက်နံတဲ့ပြဿနာတွေကို ဖြေရှင်းပေးနိုင်မယ့်နည်းလမ်းကောင်းများ

ခြေထောက်နံတယ်ဆိုတာ တော်တော်လေးကိုဆိုးရွားတဲ့ အနံ့လို့ဆိုလို့ရပါတယ်။ ခြေအိတ်စွပ်ထားပြီး ဖိနပ်ချွတ်လိုက်တဲ့အချိန်မှာပဲဖြစ်ဖြစ်၊ ဒီတိုင်းနေနေရင်နဲ့ ရလာတဲ့အောင့်သိုးသိုးအနံ့က လူကြားထဲကိုရောက်သွားတဲ့အခါမှာလည်း မျက်နှာပူစရာတွေဖြစ်လာစေနိုင်တာကြောင့် ဒီလိုပြဿနာတွေကိုဖြေရှင်းဖို့ နည်းလမ်းတစ်ချို့တော့ လိုအပ်လာပြီလေ။

ဘာကြောင့်ဒီလိုမျိုးဖြစ်ရတာလည်းဆိုတာကို ပြောပြဖို့လိုပါသေးတယ်နော်။ ခြေအိတ်အကြာကြီးဝတ်ပြီး တစ်နေကုန်လုံးရှူးစီးထားရတဲ့သူတွေ၊ ခြေထောက်ကိုသန့်ရှင်းရေးလုပ်မှုအားနည်းတာတွေ၊ ခြေဆီအရမ်းထွက်တတ်လွန်းတဲ့သူတွေမှာ ဖြစ်လေ့ဖြစ်ထရှိပါတယ်။ ဖြေရှင်းမယ်ဆိုရင်တော့ ဒီအိမ်တွင်းနည်းလမ်းတွေကို လုပ်ကြည့်ပါ။

လူတိုင်းနီးပါးက မုန့်ဖုတ်ဆိုဒါလို့သိကြတဲ့အရာကလည်း ခြေထောက်အနံ့ဆိုးတွေကို ဖယ်ရှားပေးဖို့နေရာမှာ ကူညီပေးနိုင်ပါတယ်။ မုန့်ဖုတ်ဆိုဒါကို ရေနွေးနွေးလေးထဲမှာ ထည့်ဖျော်ထားပြီး ခြေထောက်ကို မိနစ် ၃၀ လောက်စိမ်ထားပေးရမှာပါ။ နေ့တိုင်းလုပ်ဖို့လည်းအဆင်ပြေပြီး လုပ်ပြီးသွားတဲ့အချိန်မှာလည်း ခြေထောက်ကိုရေခြောက်အောင် သန့်စင်တဲ့အဝတ်နဲ့ပြန်ပြီး သုတ်ပေးရမှာပဲဖြစ်ပါတယ်။

ချင်းကိုလည်းသေချာညက်အောင်ထောင်းပြီး ရေနွေးနဲ့ရောထည့်ထားလိုက်ပါ။ ပြီးရင်တော့ ခြေထောက်ကိုရေနွေးထဲမှာ နာရီဝက်လောက်စိမ်ထားပြီး အချိန်ပြည့်ရင် ရေသေချာခြောက်အောင် သုတ်ပေးတာမျိုးကို လုပ်ပေးသင့်ပါတယ်။ ညဘက်အိပ်ခါနီးအချိန်တိုင်းမှာ ပုံမှန်လုပ်ပေးသွားမယ်ဆိုရင်တော့ ခြေထောက်အနံ့ထွက်တာတွေကို သက်သာလာစေမှာပဲဖြစ်ပါတယ်။

Baby Powder ကလည်း ခြေထောက်အနံ့မထွက်အောင် ကောင်းကောင်းကူညီပေးနိုင်ပါတယ်။ ခြေထောက်အနံ့ထွက်တယ်ဆိုတာ ခြေဆီတွေအရမ်းထွက်လွန်းတာကြောင့်လည်း ပါတာဆိုတော့ Baby Powder ကတော့ ခြေထောက်ကိုခြောက်သွေ့စေတော့ နေ့တိုင်းသုံးပေးနေရင် မကောင်းတဲ့အနံ့သက်တွေကို လျော့နည်းလာစေမှာပဲဖြစ်ပါတယ်။

Photo Source: Pinterest