မိန်းကလေးတစ်ယောက်ရဲ့ လိုအပ်တဲ့ အသုံးအဆောင်ပစ္စည်းတွေထဲမှာ ပိုက်ဆံကလည်းမရှိမဖြစ်လိုပဲ ပါဝင်နေပါတယ်နော်။ ပိုက်ဆံအိတ်ကို သွားမယ့်နေရာမျိုးစုံ၊ ရာသီဥတုနဲ့လိုက်ပြီး ဝယ်ရတာမျိုးတွေလည်းရှိတာပေါ့။ ဒါပေမယ့် ရာသီဥတုမရွေးကိုင်ဖို့ သင့်တော်စေမယ့် ရုံးသူ၊ ကျောင်းသူလေးတွေအတွက်လည်း နေ့တိုင်းလွယ်ဖို့အဆင်ပြေစေမယ့် အိတ်မျိုးကိုရွေးချယ် ဝယ်ယူတော့မယ်ဆိုရင် ဖြစ်သင့်တာတွေကို စဉ်းစားတတ်ဖို့ကလည်းလိုအပ်တာပေါ့။
ဝယ်မယ့်အိတ်ရဲ့ အသားကောင်းမကောင်းနဲ့၊ ကြာရှည်ခံပြီး ရာသီဥတုမရွေးအသုံးပြုလို့ ရလားမရလားဆိုတာတွေကို စမ်းစစ်ပြီးတော့မှာ ဝယ်ယူသင့်ပါတယ်။ Leather သားအိတ်မျိုးတွေတောင်မှ အကြမ်းခံမခံသေချာရွေးပြီးမှ ဝယ်ယူဖို့ဆုံးဖြတ်ပါနော်။
အရွယ်အစားကလည်း အိတ်တစ်အိတ်ကို ရွေးချယ်ဖို့အတွက်ထည့်ပြီးစဉ်းစားသင့်တဲ့ အရာတစ်ခုပါပဲ။ အချိန်မရွေးလွယ်ဖို့အတွက် ရွေးချယ်ဝယ်ယူမယ်ဆိုရင်တော့ မသေးလွန်းမကြီးလွန်းပဲ၊ လိုအပ်တဲ့ပစ္စည်းတွေထည့်ဖို့ ဆန့်တဲ့အိတ်အရွယ်အစားမျိုးလိုအပ်တာပေါ့။
အတွင်းပိုင်းဒီဇိုင်းတွေကိုလည်း ကြည့်တတ်ဖို့လိုပါသေးတယ်။ အတွင်းထဲကပုံစံက တခြားအရာလေးတွေထည့်ဖို့ အကန့်လေးတွေပါရင်တော့ ပိုပြီးတော့အဆင်ပြေတာပေါ့။ လိုအပ်တဲ့ပစ္စည်းလေးတွေကို သူနေရာလေးနဲ့သူထည့်လို့ရတော့ ပစ္စည်းတွေရှုပ်နေတာမျိုးလည်း မရှိနိုင်တော့ပါဘူး။
အမြဲတမ်းအတွက်ဆိုရင် အရောင်ရွေးချယ်မှုအပိုင်းကလည်း အရေးကြီးလာပါပြီ။ နေ့တိုင်းလွယ်ဖို့အတွက်ဆိုရင် အပေအတေခံပြီး အရောင်ကလည်း သီးခြားဖြစ်မနေစေလောက်တဲ့ အိတ်မျိုးကိုရွေးချယ်ဖို့လိုအပ်ပါတယ်။
နောက်ဆုံးပြောချင်တာကတော့ အိတ်ကိုဝယ်တော့မယ်လို့ စဉ်းစားလိုက်ပြီဆိုရင် ဒီအပေါ်ကအချက်တွေကိုစဉ်းစားပြီးတာနဲ့ ထပ်ပြီးတော့ဆုံးဖြတ်ရမှာ နောက်တစ်ခုရှိပါသေးတယ်။ အဲဒါကတော့ သင့်ရဲ့ကြိုက်နှစ်သက်မှုပါပဲ။ ဘယ်လောက်ပဲ ကောင်းမွန်တဲ့အချက်တွေနဲ့ ကိုက်ညီနေပါစေ သင့်စိတ်ထဲမှာ ဒီအိတ်ကိုကြိုက်နှစ်သက်မှုမရှိနေဘူးဆိုရင်လည်း လုံးဝကိုမဝယ်သင့်ပါဘူးနော်။
Photo Source: Pinterest
