မိုးရာသီက မိုးအေးအေးလေးနဲ့ နေရတာကောင်းပေမယ့် အဝတ်အစားတွေ လျှော်လို့ မခြောက်တာကတော့ တကယ်စိတ်ညစ်စရာကြီးပါ။ အဝတ်မခြောက်ရင် မှိုတက်ပြီး အနံ့အသက်မကောင်းတော့ပါဘူး ။ ဒီလိုမျိုး မိုးရာသီမှာ အဝတ်အစားတွေ အနံ့အသက်မကောင်းတာကို သက်သာစေဖို့ အခုပြောပြမယ့်အချက်တွေကို လုပ်ကြည့်ပါ။

အဝတ်လျှော်တဲ့အခါ ဆပ်ပြာရည် ဒါမှမဟုတ် ဆပ်ပြာမှုန့် Baking Soda ဒါမှမဟုတ် ရှာလကာရည်နည်းနည်း ထည့်လျှော်တာက အနံ့အသက်ကင်းစေတဲ့အပြင် အဝတ်အစားတွေကိုလည်း သဘာဝအတိုင်း နူးညံ့စေပါတယ်။

မိုးရာသီမှာ မိုးမိလာတဲ့ ဒါမှမဟုတ် ဝတ်ပြီးသားအဝတ်တွေကို စုမထားဘဲ လျှော်ပေးပါ။ အဝတ်အစားတွေ များများစုလေလေ အနံ့ဆိုးတွေက ရလေလေပါပဲ။ တကယ်လို့မလျှော်ဖြစ်ရင်တောင် လေဝင်လေထွက်ကောင်းတဲ့နေရာမျိုးမှာထားမှ အနံ့အသက်ဆိုးတာ သက်သာမှာပါ။

အဝတ်လျှေ်ာတဲ့အခါ Fabric Softener ကို ထည့်ပြီးလျှော်ပေးတာကလည်း မိုးရာသီမှာ အဝတ်တွေအနံ့ဆိုးထွက်တာကို သက်သာစေတဲ့အပြင် လျှော်ပြီးနောက်ပိုင်းလည်း အဝတ်တွေက သန့်ရှင်းပြီး အနံ့လည်း မွှေးနေမှာပါ။

လျှော်ထားတဲ့အဝတ်တွေကို ခြောက်ဖို့ နေရောင်ပြဖို့ အဆင်မပြေဘူးဆိုရင် အဝတ်တွေကို လေဝင်လေထွက်ကောင်းတဲ့နေရာတွေမှာ ထားပေးပါ။ ဒါ့အပြင် အဝတ်မြန်မြန်ခြောက်ဖို့ ပန်ကာကိုသုံးလည်းရပါတယ်။

အဝတ်တွေကို ဘီရိုထဲသိမ်းထားရင်တောင်မှ ပတ်ဝန်းကျင်က စိုထိုင်းဆများနေရင်လည်း အဝတ်တွေက အနံ့အသက်မကောင်းတာမျိုး ဖြစ်တတ်ပါတယ်။ ဒါကိုကာကွယ်ဖို့ အဝတ်ဘီရိုထဲမှာ အစိုဓာတ်ကိုစုပ်ယူတဲ့ Silicon Pouches ၊ မြေဖြူ ဒါမှမဟုတ် Baking Soda နည်းနည်းကို အိတ်နဲ့ထုတ်ပြီး ထားပါ။ အစိုဓာတ်ကို စုပ်ယူနိုင်တဲ့ Dehumidifier ထားရင်လည်း အနံ့ဆိုးတွေကို ဖယ်ရှားဖို့ ကူညီပေးနိုင်ပါတယ်။