မကြာခဏဆိုသလို ပုခုံးများ ညောင်းညာကိုက်ခဲတတ်တဲ့သူတို့အတွက် အကြောအခြင်များကို ပြေပျောက်စေမယ့် Workout အချို့ရှိပါတယ်။

ဒီလေ့ကျင့်ခန်းများးကို တစ်ပတ်လျှင် ၃ ကြိမ်မှ ၆ ကြိမ်ခန့်အထိ ပြုလုပ်ပေးမယ်ဆိုရင်တော့ ပုခုံးနာကျင်မှုများ ခံစားနေရတဲ့သူတို့အနေနဲ့ ဝေဒနာများ ယူပစ်သလို ပျောက်ကင်းသွားမှာပဲဖြစ်ပါတယ်။

စစချင်းပြုလုပ်တဲ့အခါ ၁၀ မိနစ်ခန့် ပြုလုပ်ပေးလိုက်ပါ။ တဖြည်းဖြည်း ကျင့်သားရလာပါက အချိန်တိုးကာ ပြုလုပ်ပေးနိုင်ပါတယ်။

လေ့ကျင့်ခန်း (၁)

ခြေထောက်နှစ်ဖက်ကို အနည်းငယ်ချဲထားလိုက်ပါ။ လက်နှစ်ဖက်ကို ခန္ဓာကိုယ် ဘေးတစ်ဖက် တစ်ချက်စီတွင် ချထားလိုက်ပါ။ မျက်နှာက အရှေ့တူရှူသို့ ကြည့်နေပါ။

ဦးခေါင်းကို ညာဘက်သို့ ယိမ်းလိုက်ပါ။ ညာနားရွက်က ညာပုခုံးနဲ့ ထိကပ်အောင် ပြုလုပ်ပေးရပါမယ်။ မူလအနေအထားအတိုင်း ပြန်နေပါ။

တစ်ဖန် ဦးခေါင်းကို ဘယ်ဘက်သို့ ယိမ်းလိုက်ပြီး ဘယ်နားရွက်က ဘယ်ပုခုံးနဲ့ ထိကပ်အောင် ပြုလုပ်ပေးရပါမယ်။ ၁၀ စက္ကန့်ခန့် တောင့်ထားလိုက်ပါ။ ထိုနည်းအတိုင်း နောက်ထပ် ၃ ကျော့ ဆက်လက်ပြုလုပ်ပေးလိုက်ပါ။

လေ့ကျင့်ခန်း (၂)

ဒီလေ့ကျင့်ခန်းကတော့ ပုခုံးနှစ်ဖက်ကို အရှေ့ရွေ့လိုက် အနောက်ရွေ့လိုက်ဖြင့် တစ်လှည့်စီ ပြုလုပ်ပေးရမှာဖြစ်ပါတယ်။ ထိုင်လျက်အနေအထားဖြင့်သော်လည်းကောင်း၊ ထလျက်အနေအထားဖြင့်သော်လည်းကောင်း မိမိစိတ်ကြိုက်အနေအထားဖြင့် အသင့်ပြင်ပါ.

အသက်ပြင်းပြင်း ရှူသွင်းပြီး ပုခုံးနှစ်ဖက်က အရှေ့သို့ ဝှိုက်ကာ နားရွက်နားအထိ ပင့်တင်လိုက်ပါ။ တစ်ဖန် ပုခုံးနှစ်ဖက်ကို အနောက်သို့ ဝှိုက်ချလိုက်ပါ။

ထို့နောက် အသက်ပြင်းပြင်း ရှူထုတ်ကာ ပုခုံးကို မူလအနေအထားအတိုင်း ပြန်ချထားလိုက်ပါ။ စုစုပေါင်း ၁၀ ကြိမ် ပြုလုပ်ရမှာဖြစ်ပါတယ်။

လေ့ကျင့်ခန်း (၃)

ခြေထောက်နှစ်ဖက်ကို ပုခုံးအကျယ်အတိုင်း ချဲထားလိုက်ပါ။ အသက်ရှူသွင်းပြီး လက်နှစ်ဖက်ကို ပုခုံးနဲ့တစ်တန်းတည်းဖြစ်သွားအောင် ဘေးသို့ ဆန့်တန်းလိုက်ပါ။ ရင်ဘတ်ကို အကျယ်ကြီး ဖွင့်ထားလိုက်ပါ။

တစ်ဖန် လက်နှစ်ဖက်ကို အရှေ့တည့်တည့်သို့ ဆန့်ထုတ်ပြီး လက်နှစ်ဖက်ကို တစ်ဖက်နှစ် တစ်ဖက် ယှက်ထားလိုက်ပါ။ ဒီလိုနည်းလမ်းအတိုင်း အသက်ရှူထုတ်လိုက် ရှူသွင်းလိုက်ဖြင့် တစ်လှည့်စီ ပြုလုပ်နိုင်ပါတယ်။ စုစုပေါင်း ၁၀ ကြိမ် ပြုလုပ်ပေးလိုက်ပါ။

လေ့ကျင့်ခန်း (၄)

ခြေထောက်နှစ်ဖက်ကို အနည်းငယ် ချဲထားလိုက်ပါ။ ညာလက်ကို ခန္ဓာကိုယ် ဘေးဘက်သို့ ကပ်ထားပြီး ဘယ်လက်က ညာလက်ကို ဆွဲယူထားလိုက်ပါ။ စက္ကန့် ၂၀ ခန့် တောင့်ထားလိုက်ပါ။

ဘယ်လက်ကိုလည်း ထိုနည်းအတိုင်း ပြုလုပ်ပေးရမှာဖြစ်ပါတယ်။ ဘယ် ညာ တစ်လှည့်စီကို တစ်ကြိမ်လို့ သတ်မှတ်ပြီး စုစုပေါင်း ၅ ကြိမ်ခန့် ပြုလုပ်ပေးရမှာဖြစ်ပါတယ်။

လေ့ကျင့်ခန်း (၅)

ခြေထောက်နှစ်ဖက်ကို အနည်းငယ် ချဲထားပါ။ ညာတံတောင်က အနောက်သို့ ကွေးထားကာ ဘယ်လက်က ညာတံတောင်ကို ဆွဲယူလိုက်ပါ။ စက္ကန့် ၂၀ ခန့် တောင့်ထားပါ။

တစ်ဖန် ဘယ်တံတောင်က အနောက်သို့ ကွေးထားပြီး ညာလက်က ဘယ်တံတောင်ကို ဆွဲယူထားလိုက်ပါ။ စက္ကန့် ၂၀ ခန့် တောင့်ထားပါ။ ဘယ် ညာ တစ်လှည့်စီကို တစ်ကြိမ်လို့ သတ်မှတ်ပြီး စုစုပေါင်း ၅ ကြိမ် ပြုလုပ်ပေးရမှာဖြစ်ပါတယ်။