လုပ်ငန်းခွင်မှာ စွမ်းဆောင်ရည်ကောင်းတဲ့ သူတစ်ယောက် ဖြစ်ချင်ပါသလား။ အလုပ်ခွင်မှာ အမြဲတက်ကြွ လန်းဆန်းပြီး စွမ်းဆောင်ရည်ကောင်းဖို့ အပြောထက် လက်တွေ့မှာပိုပြီး ခက်ခဲပါတယ်။
ဒါပေမယ့် အခုပြောပြမယ့် အချက်လေးတွေကို လိုက်နာမယ်ဆိုရင်တော့ လုပ်ဖော်ကိုင်ဖက်တွေ လေးစားအတုယူရမယ့် လုပ်ငန်းခွင်အတွင်းက စွမ်းဆောင်ရည်ကောင်းသူ တစ်ယောက်ဖြစ်လာစေမှာ ဖြစ်ပါတယ်။
အလုပ်စားပွဲကို သန့်ရှင်းသပ်ရပ်စွာ ထားပါ
အလုပ်စားပွဲဆိုတာ ဝန်ထမ်းတစ်ယောက်အတွက် အချိန်အများဆုံး ကုန်ဆုံးရတဲ့ နေရာတစ်ခုဖြစ်ပါတယ်။ ကိုယ့်ရဲ့ အလုပ်စားပွဲက သန့်ရှင်းသပ်ရပ်မှုမရှိဘဲ ရှုပ်ပွနေရင် အလုပ်လုပ်ရတဲ့ ခံစားချက်ကကောင်းမှာ မဟုတ်ပါဘူး။
အလုပ်စားပွဲပေါ်မှာ အစားစားတာ ၊ စာရွှက်စာတမ်းတွေ ပြန့်ကျဲနေတာမျိုး လုံးဝမဖြစ်ပါစေနဲ့။ မနက်ခင်း အလုပ်ကိုရောက်ပြီဆိုတည်းက ကိုယ့်ရဲ့အလုပ်စားပွဲကို အရင်ဆုံး သန့်ရှင်းရေး အလုပ်သင့်ပါတယ်။
သပ်သပ်ရပ်ရပ်နဲ့ ရှင်းလင်းနေတဲ့ အလုပ်စားပွဲက စိတ်ကို ကြည်လင်လန်းဆန်း နေစေမှာဖြစ်ပြီး စိတ်ကူးစိတ်သန်းကောင်းတွေ ၊ အိုင်ဒီယာ အသစ်တွေ ရစေဖို့လည်း ကူညီပေးနိုင်ပါတယ်။
ဘာပဲလုပ်လုပ် စေတနာထားပါ
စေတနာဟာ တန်ပြန်သက်ရောက်မှု ရှိပါတယ်။ ကိုယ်လုပ်တဲ့ အလုပ်အပေါ် စေတနာထားရင် အလုပ်ကလည်း ပြန်ပြီး စေတနာထားမှာ ဖြစ်ပါတယ်။ အလုပ်တာဝန်ကျေတယ် ဆိုရုံလောက်ပဲ အလုပ်လုပ်ပြီး အချိန်တန်လကုန်တာနဲ့ လစာယူမယ် စိတ်ကူးနေရင်တော့ အလုပ်ခွင်မှာ စွမ်းဆောင်ရည်မြင့်မားတဲ့ ထူးချွန်သူတစ်ယောက် ဖြစ်လာနိုင်မှာ မဟုတ်ပါဘူး။
ဒါ့ကြောင့် ဘာပဲလုပ်လုပ် စေတနာလေးအရင်းခံပြီး ကိုယ့်ဘက်က အတက်နိုင်ဆုံး အကောင်းဆုံးဖြစ်အောင် ကြိုးစားလုပ်ဆောင်ပါ။
လေ့လာသင်ယူမှုတွေ အမြဲမပြတ် လုပ်ဆောင်ပါ
အလုပ်ခွင်မှာ စွမ်းဆောင်ရည်ကောင်းတဲ့ သူတစ်ယောက်ဖြစ်ဖို့ လေ့လာသင်ယူမှုတွေကို ရပ်တန့်လိုက်လို့ မရတာအမှန်ပါ။ အရည်အချင်းပြည့်ဝပြီး ထူးချွန်သူတစ်ယောက် ဖြစ်လာဖို့ ဆက်လက်ပြီး လေ့လာသင်ယူနေရအုန်းမှာ ဖြစ်ပါတယ်။
ထူးချွန်ပြီး တော်တဲ့ထက်တဲ့ အောင်မြင်သူတိုင်းလိုလိုဟာလည်း အတွေ့အကြုံတွေ ၊ လေ့လာသင်ယူမှုတွေကနေပဲ ကိုယ့်ရဲ့ လိုအပ်ချက် ဝမ်းစာတွေကို ဖြည့်တင်းကြတာ ဖြစ်ပါတယ်။
လေ့လာမှုနဲ့ အတွေ့အကြုံတွေကပဲ တစ်ချိန်မှာ စွမ်းဆောင်ရည်ကောင်းပြီး ထူးချွန်အောင်မြင်တဲ့ သူတစ်ယောက်အဖြစ်ပြောင်းလဲ လာစေမှာဖြစ်ပါတယ်။
