ဇက်ကြောများ တောင့်တင်းနေခြင်း၊ ဇက်ကြောတက်ခြင်းတို့ဟာ လူတစ်ယောက်ရဲ့ အာရုံစူးစိုက်နိုင်စွမ်းနှင့် စွမ်းဆောင်ရည်တို့ကို ကျဆင်းစေပါတယ်။ ပိုမိုဆိုးရွားလာပါက လည်ပင်းနာခြင်းနှင့် ခေါင်းကိုက်ခြင်းတို့ကိုပါ ခံစားရစေပါတယ်။

ဒီလိုမျိုး မကြာခဏ ဇက်ကြောတက်ပြီး ညောင်းညာနေတတ်တဲ့သူတို့အတွက် ထိရောက်မှုရှိတဲ့ လေ့ကျင့်ခန်းများ ရှိပါတယ်။

လေ့ကျင့်ခန်း (၁)

ဒီလေ့ကျင့်ခန်းကတော့ လည်ပင်းကို အကြောလျော့ရမယ့် လေ့ကျင့်ခန်းပဲဖြစ်ပါတယ်။ ပုခုံးနှင့် လည်ပင်းကြားရှိ ညောင်းညာတောင့်တင်းနေမှုကို လျော့ပါးသက်သာစေပါတယ်။

ခြေထောက်နှစ်ဖက်ကို အနည်းငယ် ချဲထားကာ ထိုင်နေပါ။ လက်နှစ်ဖက်က ခန္ဓာကိုယ် ဘေးတစ်ဖက်တစ်ချက်စီတွင် ချထားပါ။ အရှေ့သို့ ကြည့်နေပါ။ ခေါင်းကို ညာဘက်သို့ ဖြည်းဖြည်းချင်းစီ စောင်းလိုက်ပါ။

ညာနားရွက်က ညာပုခုံးနဲ့ ထိကပ်နေရပါမယ်။ ထိုအနေအထားအတိုင်း ၁၀ စက္ကန့်ခန့်နေပါ။ တစ်ခုသတိထားရမှာကတော့ ပုခုံးကို အပေါ်သို့ မကြွမိစေဖို့ပါပဲ။ ခေါင်းကိုသာ အောက်သို့ နိမ့်ချရမှာဖြစ်ပါတယ်။

ခေါင်းကို တည့်တည့်ပြန်ထားပါ။ တစ်ဖက် ဘယ်နားရွက်က ဘယ်ပုခုံးကို ထိကပ်ပေးလိုက်ပါ။ ထိုအနေအထားအတိုင်း ၁၀ စက္ကန့်ခန့်နေပါ။

ဘယ် ညာကို တစ်ကြိမ်လို့ သတ်မှတ်ပြီး စုစုပေါင်း ၃ ကြိမ်ခန့် ပြုလုပ်ရမှာဖြစ်ပါတယ်။

လေ့ကျင့်ခန်း (၂)

ခါးမတ်မတ်ထားပြီး ထိုင်ခုံတစ်လုံးပေါ်တွင် ထိုင်နေပါ။ အသက်ပြင်းပြင်းရှူသွင်းလိုက်ပြီး ပုခုံးက အပေါ်ကနေ အနောက်သို့ ဝိုက်ချလိုက်ပါ။ အသက်ရှူထုတ်လိုက်ပါ။

အသက်ပြင်းပြင်း ရှူသွင်းလိုက်ပါ။ ပုခုံးကို အနောက်ကနေ အရှေ့သို့ ဝိုက်ချလိုက်ပါ။ အသက်ပြင်းပြင်းရှူထုတ်ပါ။ စုစုပေါင်း ၁၀ ကြိမ် ပြုလုပ်ရမှာဖြစ်ပါတယ်။

လေ့ကျင့်ခန်း (၃)

ခြေထောက်နှစ်ဖက်ကို အနည်းငယ်ချဲထားပြီး လက်နှစ်ဖက်က ပုခုံးနဲ့ တစ်တန်းတည်းဖြစ်အောင် ဆန့်တန်းလိုက်ပါ။ လက်နှစ်ဖက်ကို ခန္ဓာကိုယ် အရှေ့ဘက်သို့ ဆွဲယူလိုက်ကာ ဘယ်လက်က ညာလက်အပေါ်မှာ ဖြစ်နေရပါမယ်။

လက်နှစ်ဖက်ကို ပုခုံးနဲ့ တစ်တန်းတည်းပြန်ထားပါ။ ထို့နောက် ခန္ဓာကိုယ်အရှေ့ဘက်သို့ ပြန်ဆွဲယူတဲ့အခါ ညာလက်က ဘယ်လက်အပေါ်မှာ ရှိနေရပါမယ်။ ဘယ် ညာကို တစ်ကြိမ်လို့ သတ်မှတ်ပြီး စုစုပေါင်း ၁၀ ကြိမ် ပြုလုပ်ရပါမယ်။

လေ့ကျင့်ခန်း (၄)

ခါးမတ်မတ်ထားပါ။ ညာလက်ကို ဘယ်တံတောင်နှင့် ညှပ်ကာ ခန္ဓာကိုယ်ရဲ့ ဘက်ဘက်အခြမ်းကို ဆွဲဆန့်လိုက်ပါ။ ထိုအနေအထားအတိုင်း စက္ကန့် ၂၀ ခန့် တောင့်ထားပါ။ တစ်ဖက် ဘယ်လက်ကို ညာတံတောင်ကြားဖြင့် ညှပ်ကာ ခန္ဓာကိုယ်ရဲ့ ညာဘက်အခြမ်းသို့ ဆွဲဆန့်လိုက်ပါ။ စက္ကန့် ၂၀ ခန့် တောင့်ထားပါ။

လေ့ကျင့်ခန်း (၅)

ညာခြေကို ဘယ်ခြေပေါ်တွင် တင်ထားကာ ခါးမတ်မတ်ထိုင်နေပါ။ ဘယ်လက်က ညာလက်ဖျံနားမှာ ကပ်ထားလိုက်ပါ။ တစ်ချိန်တည်းမှာပါ။ ညာလက်မောင်းကို ညာနားရွက်နဲ့ ထိကပ်ပေးလိုက်ပါ။ ထို့နောက် ညာလက်က ဘယ်လက်ကို လှမ်းဆွဲလိုက်ပါ။

ထိုအနေအထားတိုင်း အသက်ရှူလေ့ကျင့်ခန်းကို (၃) ကြိမ်လောက် ပြုလုပ်ပါ။ လက်နှစ်ဖက်ကို ဘက်ပြောင်းလိုက်ပါ။ စောစောကနည်းအတိုင်း ဆက်လက်ပြုလုပ်ပေးရမှာဖြစ်ပါတယ်။