ဦးရေပြား ခြောက်သွေ့ ယားယံတာဟာ ခေါင်းလျှော်ရည် အလွန်အကျွံသုံးတာ ၊ ဓာတုပစ္စည်းတွေပါဝင်တဲ့ ဆံပင်ဆိုးဆေးတွေ ဆိုးတာနဲ့ ရာသီဥတု ပတ်ဝန်းကျင် အခြေအနေတွေကြောင့်လည်း ဖြစ်တတ်ပါတယ်။ သတင်းကောင်းကတော့ အိမ်မှာနေရင်းပဲ ဦးရေပြား ခြောက်သွေ့ ယားယံခြင်းကို သက်သာစေမယ့် သဘာဝကုထုံးနည်းလမ်းတချို့ ရှိပါတယ်။
ဒါကတော့ ရှားစောင်းလက်ပတ်ပါ။ ရှားစောင်းလက်ပတ် က ဦးရေပြား ခြောက်သွေ့ ယားယံခြင်းကို အထိရောက်ဆုံး ကုသနိုင်မယ့် သဘာဝပစ္စည်းတစ်ခု ဖြစ်ပါတယ်။
ရှားစောင်းလက်ပတ်မှာ ရေဓာတ်ပြည့်စေတဲ့ ဂုဏ်သတ္တိတွေ ပါဝင်ပြီး ဓာတ်တိုးဆန့်ကျင်ပစ္စည်းများ ၊ ဗီတာမင် A ၊ ဗီတာမင် E ၊ lignin နဲ့ Salicylic အက်ဆစ်ဓာတ်တွေ ကြွယ်ဝစွာ ပါဝင်တာကြောင့် ဦးရေပြားနဲ့ ဆံသားကို အစိုဓာတ်ဖြည့်တင်းပေးပြီး ဦးရေပြားကို နူးညံ့ချောမွေ့စေမှာပဲ ဖြစ်ပါတယ်။
ဒီတစ်ခေါက်မှာတာ့ ဦးရေပြား ခြောက်သွေ့သူတွေအတွက် ရှားစောင်းလက်ပတ်ရဲ့ အသုံးဝင်နည်း ၄ နည်းကို မျှဝေပေးချင်ပါတယ်။
(၁) ဦးရေပြားကို ရှားစောင်းလက်ပတ်ဂျယ်နဲ့ နှိပ်နယ်ပေးပါ
ရှားစောင်းလက်ပတ်ဟာ ရေဓာတ် ၉၈ ရာခိုင်နှုန်းနဲ့ ဖွဲ့စည်းထားတာကြောင့် ဦးရေပြားကို အဆီပြန်ခြင်းမရှိစေဘဲ သဘာဝအတိုင်း အစိုဓာတ်ထိန်းပေးပြီး ရောင်ရမ်းနာကျင်ခြင်းနဲ့ ယားယံခြင်းတွေကို လျော့ကျသက်သာစေမှာပဲ ဖြစ်ပါတယ်။
ပါဝင်ပစ္စည်း
ရှားစောင်းလက်ပတ်ဂျယ် – စားပွဲဇွန်း ၂ ဇွန်း
အသုံးပြုနည်း အဆင့်ဆင့်
ရှားစောင်းလက်ပတ်ဂျယ်ကို ဦးရေပြားအနှံ့ ညင်သာစွာ လိမ်းကျံပြီး နှိပ်နယ်ပေးပါ။ ထို့နောက် နာရီဝက်လောက် နှပ်ထားလိုက်ပါ။ ပြီးရင်တော့ အပျော့စားခေါင်းလျှော်ရည်နဲ့ ခေါင်းလျှော်လိုက်လို့ ရပါပြီ။
(၂) ရှားစောင်းလက်ပတ် ၊ ပျားရည် ၊ သံလွင်ဆီ (သို့မဟုတ်) အုန်းဆီ Hair Mask
ရှားစောင်းလက်ပတ် ၊ ပျားရည် ၊ သံလွင်ဆီ (သို့မဟုတ်) အုန်းဆီ Hair Mask က ဦးရေပြား အစိုဓာတ်ကို ထိန်းထားပေးပြီး ခြောက်သွေ့ယားယံခြင်းတွေကို လျော့ကျသက်သာစေမှာပဲ ဖြစ်ပါတယ်။
ပါဝင်ပစ္စည်း
ရှားစောင်းလက်ပတ်ဂျယ် – စားပွဲဇွန်း ၂ ဇွန်း
သံလွင်ဆီ (သို့မဟုတ်) အုန်းဆီ – စားပွဲဇွန်း ၁ ဇွန်း
ပျားရည် – စားပွဲဇွန်း ၂ ဇွန်း
အသုံးပြုနည်း အဆင့်ဆင့်
ပန်းကန်လုံးတစ်လုံးထဲမှာ ပါဝင်ပစ္စည်းအားလုံးကို ကြေညက်သွားသည်အထိ သမအောင်ရောမွှေပါ။ ထို့နောက် Brush ကိုအသုံးပြုပြီး ရောမွှေထားတဲ့ ရှားစောင်းလက်ပတ် Hair Mask ကို ဆံပင်နဲ့ ဦးရေပြား အနှံ့သုတ်လိမ်းပေးပါ။
ရှားစောင်းလက်ပတ်အနှစ်ကို ဦးရေပြားကနေ ကောင်းစွာစုပ်ယူနိုင်ဖို့ အနည်းဆုံး နာရီဝက်ခန့် ထားပါ။ ပြီးရင်တော့ အပျော့စားခေါင်းလျှော်ရည်နဲ့ ခေါင်းလျှော်လိုက်လို့ ရပါပြီ။
(၃) ရှားစောင်းလက်ပတ် ၊ ကြက်ဥ Hair Mask
ကြက်ဥဟာ ဆံပင်ကြီးထွားမှုကို အားကောင်းစေပြီး ဆံပင်ကျွတ်ခြင်းကို သက်သာစေနိုင်သလို ဦးရေပြားနဲ့ ဆံသားအတွက်လည်း သဘာဝအစိုဓာတ်ကို ထိန်းထားပေးပါတယ်။
ပါဝင်ပစ္စည်း
ရှားစောင်းလက်ပတ်ဂျယ် – စားပွဲဇွန်း ၂ ဇွန်း
ကြက်ဥ – ၁ လုံး
အသုံးပြုနည်း အဆင့်ဆင့်
ပန်းကန်လုံးတစ်လုံးထဲမှာ ကြက်ဥကိုဖောက်ထည့်ပြီး ကြေညက်သွားသည်အထိ ကောင်းစွာမွှေပေးပါ။ ထို့နောက်မွှေထားတဲ့ ကြက်ဥထဲကို ရှားစောင်းလက်ပတ်ဂျယ် ရောထည့်ပြီး သမအောင်ထပ်မံမွှေပေးပါ။
ထို့နောက် Brush ကိုအသုံးပြုပြီး ရောမွှေထားတဲ့ ကြက်ဥနဲ့ ရှားစောင်းလက်ပတ် Hair Mask ကို ဆံပင်နဲ့ ဦးရေပြား အနှံ့သုတ်လိမ်းပေးပါ။ Shower Cap နဲ့ နာရီဝက်လောက် အုပ်ထားပေးပါ။
ပြီးရင်တော့ အပျော့စားခေါင်းလျှော်ရည်နဲ့ ခေါင်းလျှော်လိုက်လို့ ရပါပြီ။
(၄) ရှားစောင်းလက်ပတ် ၊ ဒိန်ချဉ် Hair Mask
ဒိန်ချဉ်မှာ Lactic အက်စစ်ဓာတ် ကြွယ်ဝစွာပါဝင်တာကြောင့် ဦးရေပြားကို သန့်စင်စေပြီး ဦးရေပြားပေါ်က ဆဲလ်သေတွေကို သဘာဝအတိုင်း ဖယ်ရှားပေးနိုင်ပါတယ်။
ဒါ့အပြင် ဒိန်ချဉ်ဟာ ဦးရေပြားကို အစိုဓာတ်ထိန်းထားပေးပြီး ပိုတက်စီယမ် ၊ ဗီတာမင် B12 နဲ့ ဗီတာမင် B6 ကဲ့သို့သော အကျိုးပြုအာဟာရများပါဝင်တာကြောင့် ဆံပင်မွေးညင်းပေါက်တွေကို အာဟာရဓာတ် ဖြည့်တင်းပေးမှာ ဖြစ်ပါတယ်။
ပါဝင်ပစ္စည်း
ရှားစောင်းလက်ပတ်ဂျယ် – စားပွဲဇွန်း ၂ ဇွန်း
ဒိန်ချဥ် – စားပွဲဇွန်း ၁ ဇွန်း
အသုံးပြုနည်း အဆင့်ဆင့်
ပန်းကန်လုံးတစ်လုံးထဲမှာ ပါဝင်ပစ္စည်းတွေဖြစ်တဲ့ ရှားစောင်းလက်ပတ်ဂျယ်နဲ့ ဒိန်ချဥ်ကို ရောထည့်ပြီး နှံ့သွားသည်အထိ သမအောင်ရောမွှေပါ။ ဆံပင်ဆိုးဆေး Brush ကိုအသုံးပြုပြီး ရောမွှေထားတဲ့ ရှားစောင်းလက်ပတ်နဲ့ ဒိန်ချဉ် Hair Mask ကို ဆံပင်နဲ့ ဦးရေပြား အနှံ့သုတ်လိမ်းပေးပါ။
ဦးရေပြားကို ၁၀ – ၁၅ မိနစ်ခန့် ညင်သာစွာ နှိပ်နယ်ပေးပါ။ ထို့နောက်နာရီဝက်လောက် နှပ်ထားပြီး အပျော့စားခေါင်းလျှော်ရည်နဲ့ ခေါင်းလျှော်လိုက်လို့ ရပါပြီ။
