ဗီတာမင်တွေ၊ အာဟာရဓာတ်တွေ ကြွယ်ဝစွာပါဝင်တဲ့ အသီးအနှံတွေက စားဖို့အတွက်တစ်ခုသာမဟုတ်ဘဲ ခန္ဓာကိုယ်အပြင်ပိုင်းဖြစ်တဲ့ ရုပ်ရည်အသွင်အပြင်အတွက်ပါ အများကြီး အသုံးချနိုင်ပါသေးတယ်။

နောက်ပြီးတော့ ဈေးနှုန်းလည်းချိုသာတယ်၊ ဆိုးဆေးတွေလည်းမပါဘူး၊ သဘာဝအသီးအနှံဖြစ်တော့ အသားအရေကို ထိခိုက်မှာတွေလည်း စိုးရိမ်ရစရာ မလိုတော့ပါဘူး။

ကဲ..ဒါဆိုရင် ဘယ်အသီးအနှံတွေကတော့ ဘယ်လိုသုံးရင် ဘယ်လိုအကျိုးကျေးဇူးတွေရမလဲဆိုတာ အခုပဲ ကြည့်လိုက်ရအောင်လား။

၁။ သင်္ဘောသီး

သင်္ဘောသီး အသား စားပွဲတင်ဇွန်း ၃-၅ ဇွန်းကို ကျိတ်ခြေပြီး ပျားရည် စားပွဲတင်ဇွန်း ၁ ဇွန်းနဲ့ ရောမွှေပေးလိုက်ပါ။ ရလာတဲ့အနှစ်ကို မျက်နှာအနှံ့လိမ်းပေးပြီး ၁၀-၁၅ မိနစ်လောက်ထားပါ။ အချိန်ပြည့်ရင် ရေနွေးနွေးလေးနဲ့ ဆေးကြောသန့်စင်ပေးနိုင်ပါတယ်။

၂။ စတော်ဘယ်ရီသီး

စတော်ဘယ်ရီသီးတွေမှာပါဝင်တဲ့ အာဟာရဓာတ်တွေက အဆီပြန်ပြီး ဝက်ခြံဖြစ်လွယ်တဲ့ အသားအရေအတွက် အထူးသင့်တော်ပါတယ်။ စတော်ဘယ်ရီးသီး ၃ လုံးကိုကျိတ်ခြေပြီး ပျားရည် စားပွဲတင်ဇွန်း ၁ ဇွန်းနဲ့ ရောစပ်ပါ။ သန့်စင်ပြီးသား မျက်နှာပေါ်မှာ လိမ်းပေးပြီး ၁၅ မိနစ်ထားပါ။ ပြီးရင်တော့ ရေနွေးနွေးလေးနဲ့ ဆေးကြောသန့်စင်ပါ။

၃။ ထောပတ်သီး

ထောပတ်သီးက အိုမီဂါသရီးနဲ့ အိုမီဂါ 6 ဖက်တီးအက်စစ်၊ ဗီတာမင်အီး၊ စီ၊ ကေ တို့ပါဝင်လို့ အသားအရေကို ရေဓာတ်အပြည့်အဝ ပေးစွမ်းပြီး အိစက်နူးညံ့စေမှာပါ။ မှည့်နေတဲ့ ထောပတ်သီးတစ်ခြမ်းက အသားကိုယူပြီးတော့ အနှစ်ဖြစ်သွားတဲ့အထိ ပန်းကန်လုံးတစ်ခုထဲမှာ ကျိတ်ခြေပါ။

ထောပတ်သီးအနှစ်ညိုမသွားအောင်လို့ သံပုယိုအရည် လက်ဖက်ရည်ဇွန်း ၁ ဇွန်းလည်း ထည့်ပေးပါ။ ပြီးရင် မျက်နှာပေါ်မှာ လိမ်းပေးပြီး ၁၅ မိနစ်ထားပါ။ အချိန်ပြည့်ရင် မျက်နှာသစ်လို့ရပါပြီ။

၄။ သံပုယိုသီး

ဗီတာမင်စီပါဝင်မှု အင်မတန်မြင့်မားတဲ့အတွက် အသားအရေဝင်းလက်တောက်ပဖို့ အတွက်ဆိုရင် သံပုယိုသီးကို ဘယ်သူမှ မယှဥ်နိုင်ပါဘူး။ အသုံးပြုရမှာကလည်း လွယ်လွယ်လေးပါ။ သံပုယိုရည်နည်းနည်းညှစ်ပြီး လိမ်းပေးရုံပါပဲ။ မလိမ်းခင် တစ်ခုအရင်သိထားရမှာက တချို့လူတွေက သံပုယိုရည်နဲ့ မတည့်တာဖြစ်နိုင်လို့ မျက်နှာပေါ်မတင်ခင် တခြားနေရာမှာ အရင်စမ်းလိမ်းကြည့်ပါ။ ဥပမာ တံတောင်လိုနေရာမျိုးပေါ့။

ပြီးရင် သေချာအောင်လို့ တစ်ရက်စောင့်ကြည့်ပါ။ နောက်တစ်ချက်က ဗီတာမင်စီနဲ့ နေရောင်ခြည်က မတည့်တဲ့အတွက် နွေရာသီလို နေရောင်ခြည်များတဲ့အချိန်တွေမှာ မသုံးသင့်ပါဘူး။

၅။ ငှက်ပျောသီး

ငှက်ပျောသီးတွေကလည်း အသားအရေကို နူးညံ့အိစက်အောင် ကူညီပေးနိုင်ပါတယ်။ အလယ်အလတ်အရွယ်အစားရှိတဲ့ ငှက်ပျောသီးအမှည့်တစ်လုံးကို အနှစ်ဖြစ်အောင် ကျိတ်ခြေပါ။ မျက်နှာနဲ့ လည်ပင်းတစ်ဝိုက် လိမ်းပေးပြီးတော့ ၁၅ မိနစ်ထားပါ။ ထုံးစံအတိုင်း ရေနွေးနွေးလေးနဲ့ သန့်စင်ပါ။

၆။ သခွားသီး

တစ်နေကုန် နေပူထဲအသွားများလို့ ကျိန်းစပ်စပ်နဲ့ နီရဲနေတဲ့ သင့်အသားအရေအတွက် သခွားသီက ကယ်တင်ရှင်ပါ။ နောက်ပြီး မျက်ကွင်းညိုတာတွေအတွက်လည်း သခွားသီးက အရမ်းကောင်းပါတယ်။

သခွားသီးကို ပါးပါးလေးတွေလှီးပြီးတော့ ရေခဲသေတ္တာထဲမှာ ၁၅ မိနစ်ထားပါ။ သခွားသီးလေးတွေ အေးသွားပြီဆိုရင် မျက်နှာအနှံ့လိုက်ကပ်ပေးပါ။ ၁၅ မိနစ်ထားပေးရပါမယ်။