သခွားသီးကို ဟင်းသီးဟင်းရွက်ဆိုင်များမှာ အလွယ်တကူ ဝယ်ယူရရှိနိုင်တဲ့အပြင် ဈေးနှုန်းလည်း ချိုသာတဲ့အတွက်ကြောင့် ပိုက်ဆံအကုန်မခံချင်ဘဲ အသားအရေထိန်းသိမ်းချင်တဲ့သူများအတွက် အသင့်တော်ဆုံးပစ္စည်းတစ်မျိုးပဲဖြစ်ပါတယ်။
သင့်အနေနဲ့ ပျက်စီးနေတဲ့အသားအရေကို ပြန်လည်ထိန်းသိမ်းချင်တယ်ဆိုရင်တော့ အခုဖော်ပြပေးမယ့် နည်းလမ်းများဖြင့် ထိန်းသိမ်းနိုင်ပါတယ်။
သခွားသီးနှင့် လိမ္မော်ရည်ကို တွဲသုံးပါ
သခွားသီး တစ်ဝက်ကို ပါးပါးလှီးပြီးနောက် ဖျော်စက်ထဲထည့်ပါ။ ထို့နောက် လိမ္မော်ရည် စားပွဲတင်ဇွန်း ၂ ဇွန်းခန့်ထည့်ကာ သမအောင် ရောမွှေပါ။ ရရှိလာတဲ့ဖျော်ရည်အရောအနှောကို မျက်နှာနှင့် လည်ပင်းပေါ်တွင် သုတ်လိမ်းပေးလိုက်ပါ။ ၁၅ မိနစ်ခန့် ပေါင်းတင်ထားပြီးမှ မျက်နှာသစ်ပေးလိုက်ပါ။ အသားအရေ ကြည်လင်ဝင်းပချင်သူများအနေဖြင့် ဒီပေါင်းတင်နည်းကို အသုံးပြုနိုင်ပါတယ်။
သခွားသီးနှင့် ကြက်ဥအကာ
သခွားသီး တစ်ဝက်ကို စောစောကလိုပဲ ဖျော်စက်ထဲထည့်ကာ အနှစ်များရလာအောင် ပြုလုပ်ပါ။ ထို့နောက် ကြက်ဥအကာတစ်လုံးဖြင့် သမအောင် ရောမွှေလိုက်ပါ။ ရရှိလာတဲ့ အရောအနှောကို မျက်နှာနှင့် လည်ပင်းပေါ်တွင် သုတ်လိမ်းပေးလိုက်ပါ။ မိနစ် ၂၀ ခန့်ကြာမှ ကြက်သီးနွေး ရေနွေးဖြင့် မျက်နှာသစ်ချလိုက်ပါ။ ဒီပေါင်းတင်နည်းကတော့ အသားအရေတင်းတင်းရင်းရင်းလေးဖြစ်ချင်သူများ၊ အရေးအကြောင်းများကို ဖယ်ရှားချင်သူများအတွက် သင့်တော်ပါတယ်။
သခွားသီးနှင့် မုန့်ဖုတ်ဆိုဒါ
သခွားသီးကို ဖျော်စက်ထဲထည့်ပြီးနောက် ရရှိလာတဲ့ သခွားသီးအဖတ်ကို အရည်များရအောင် ညှစ်လိုက်ပါ။ ထို့နောက် သခွားသီးဖျော်ရည် စားပွဲတင်ဇွန်း ၂ ဇွန်းခန့် စစ်ယူကာ မုန့်ဖုတ်ဆိုဒါ လက်ဖက်ရည်ဇွန်း ၁ ဇွန်းဖြင့် သမအောင် ရောမွှေလိုက်ပါ။ ထို့နောက် မျက်နှာပေါ်မှာ သုတ်လိမ်းကာ ၁၀ မိနစ်ခန့် ပေါင်းတင်လိုက်ပါ။ သတ်မှတ်ချိန်ပြည့်မှ မျက်နှာသစ်လိုက်ပါ။ ဒီပေါင်းတင်နည်းကတော့ ဝက်ခြံပျောက်ချင်သူများအတွက် သင့်တော်တဲ့ ပေါင်းတင်နည်းတစ်ခုပါ။
သခွာသီးနှင့် အုန်းဆီ
သခွားသီး တစ်ဝက်ကို ဖျော်စက်ထဲထည့်ကာ အဖတ်များရအောင် ပြုလုပ်ပါ။ ရရှိလာတဲ့ သခွားသီးအဖတ်ကို အုန်းဆီ လက်ဖက်ရည်ဇွန်း ၁ ဇွန်းဖြင့် သမအောင် ရောမွှေလိုက်ပါ။ ထို့နောက် မျက်နှာပေါ်မှာ သုတ်လိမ်းပြီးနောက် ၁၅ မိနစ်ခန့် ပေါင်းတင်ပါ။ သတ်မှတ်ချိန်ပြည့်မှ မျက်နှာသစ်လိုက်ပါ။ ဒီပေါင်းတင်နည်းကတော့ အသားအရေ ခြောက်သွေ့သူများနှင့် ပုံမှန်အသားအရေပိုင်ရှင်များအတွက် သင့်တော်ပါတယ်။
သခွားသီးနှင့် ထောပတ်သီး
သခွားသီးဖျော်ရည် စားပွဲတင်ဇွန်း ၂ ဇွန်းကို ထောပတ်သီး စားပွဲတင်ဇွန်း ၈ ဇွန်းဖြင့် ရောနှောကာ သမအောင် မွှေလိုက်ပါ။ ထို့နောက် မျက်နှာပေါ် သုတ်လိမ်းကာ ၁၅ မိနစ်၊ မိနစ် ၂၀ ခန့် ပေါင်းတင်ထားပါ။ သတ်မှတ်ချိန်ပြည့်ပါက ရေနွေးနွေးဖြင့် မျက်နှာသစ်လိုက်ပါ။ ဒီပေါင်းတင်နည်းကတော့ အသားအရေ နူးညံ့ချင်သူများနှင့် ဝက်ခြံကြောင့် အသားအရေ နီမြန်းနေသူများအတွက် သင့်တော်ပါတယ်။
အထက်ဖော်ပြပါပေါင်းတင်နည်းများကို တစ်ပတ်လျှင် နှစ်ကြိမ်ခန့် ပုံမှန်ပေါင်းတင်ပေးနိုင်ပါတယ်။
