ခရီးသွားခြင်းက အတွေ့အကြုံသစ်ကို သင်ယူလေ့လာခြင်းလို့ အဓိပ္ပာယ်ဖွင့်မယ်ဆိုရင် ခရီးအတွက် လိုအပ်တဲ့ပစ္စည်းများ ထုပ်ပိုးခြင်းကလည်း အရည်အချင်းတစ်မျိုးလို့ ဆိုနိုင်ပါတယ်။ ခရီးသွားတဲ့အခါ မိမိသွားမယ့် ခရီးအမျိုးအစားပေါ် မူတည်ပြီး ထုပ်ပိုးရမယ့်အသုံးအဆောင်ပစ္စည်းလေးတွေကလည်း ကွဲပြားသွားနိုင်ပါတယ်။
ဥပမာ တောင်တက်ခရီးသွားမယ့်သူအဖို့ ကြွကြွရွရွနဲ့ လှပတဲ့အသုံးအဆောင်ပစ္စည်းများက အသုံးတည့်မှာမဟုတ်သလို ကမ်းခြေသွားလည်မယ့်သူအဖို့ ထူထူထဲထဲအနွေးထည်တွေလည်း လိုအပ်မှာမဟုတ်ပါဘူး။
သင့်အနေနဲ့ ကိုယ်သွားမယ့်ခရီးအတွက် ထုပ်ပိုးရမယ့်အသုံးအဆောင်များကို သေချာပြင်ဆင်ထားဖို့လိုပါပြီ။ မလိုအပ်ဘဲ ယူသွားမိတဲ့အပိုအသုံးအဆောင်ပစ္စည်းများက သင့်အတွက် ဝန်ထုပ်ဝန်ပိုးတွေပဲဖြစ်စေမှာပါ။
ဒါဆိုရင် ခရီးသွားတဲ့အခါ ဘယ်လိုအသုံးအဆောင်ပစ္စည်းတွေကို မယူသွားသင့်သလဲဆိုတာကို ဆက်လေ့လာကြည့်လိုက်ရအောင်။
တန်ဖိုးကြီး လက်ဝတ်ရတနာများ
သင့်အနေနဲ့ ခရီးသွားနေတုန်းမှာ ရိုးလက်စ်နာရီကြီး ပျောက်သွားတယ်လို့ စိတ်ကူးယဉ်ကြည့်လိုက်ပါ။ သင့် ချွေးနဲစာနဲ့ ဝတ်ထားရတဲ့အတွက် သင်ပဲ ရင်ကျိုးရမှာပါ။ ဒါ့အပြင် တန်ဖိုးကြီးတဲ့ လက်ဝတ်လက်စားများ ယူဆောင်ထားခြင်းကြောင့် သင့်အသက်အန္တရာယ်ကိုလည်း ထိခိုက်စေနိုင်ပါတယ်။
ဖိနပ်အများကြီး သယ်သွားခြင်း
မတူညီတဲ့ဖိနပ်အမျိုးအစား နှစ်ရံခန့် ယူသွားရင်တောင် လုံလောက်နေပါပြီ။ အကယ်၍ ဖိနပ်တစ်ရံ ပြတ်သွားခဲ့သည်ရှိသော် အခြားတစ်ရံကို အလွယ်တကူ ဝတ်ဆင်နိုင်လို့ပါ။
ထူထဲသောတဘက်များ
ထူထဲသောတဘက်များအစား ပါးလျသော ခရီးဆောင်တဘက်များ သယ်ဆောင်သွားပါ။ ခရီးဆောင်တဘက်များက ဈေးသက်သာပြီး အကြမ်းလည်း ခံပါတယ်။
ခေါင်းအုံး
ခေါင်းအုံးတစ်လုံးက ခရီးဆောင်အိတ်အတွင်းမှာ နေရာအများကြီး ယူပါတယ်။ ဝေးလံခေါင်သီတဲ့နေရာမှာ တည်းခိုရမယ်ဆိုရင်တောင်မှ သင့်ရဲ့အဝတ်အစားများကို လုံးလိုက်ကာ ခေါင်းအုံးအဖြစ် အသုံးပြုနိုင်ပါတယ်။
