ရေမွှေးဆွတ်တာနဲ့ ပတ်သက်ပြီး လူတော်တော်များများ လုပ်မိကြတဲ့ အမှားများ

ရေမွှေးဆွတ်လေ့ရှိတယ်ဆိုရင် အခုပြောမယ့် အမှားတချို့ကို လူတော်တော်များများ လုပ်မိတတ်ပါတယ်။ ရှောင်ကြဉ်ရမယ့် အချက်တွေဖြစ်လို့ မျှဝေလိုက်ရပါတယ်။

(၁) Over-Spraying

အများဆုံး မှားတတ်တာက ရေမွှေးကို လိုတာထက် ပိုပြီး ဆွတ်မိကြတာပဲ ဖြစ်ပါတယ်။ ရေမွှေးနံ့ဆိုတာ ကိုယ်နံ့ကို သင်းပျံ့ရုံလွှမ်းခြုံထားတာမျိုးပဲ ဖြစ်သင့်တာပါ။ ရေမွှေးနံ့ စူးစူးပြင်းပြင်းကြီးကိုတော့ ဘယ်သူမှ သဘောမကျကြပါဘူး။ ဒါကြောင့် ရေမွှေးဆွတ်မယ်ဆိုရင် သင့်ရုံပဲ ဖြစ်ဖို့ ဂရုစိုက်ပါ။

(၂) နေရာမှားဆွတ်ခြင်း

နောက်ထပ် မှားလေ့ရှိတဲ့ အချက်ပါပဲ။ ရေမွှေးဆိုတာ ခေါင်း ၊ ရင်ဘတ်နဲ့ ဒူးခေါက်ခွက်တွေမှာ ဆွတ်ရတဲ့အရာမဟုတ်ပါဘူး။ လက်ကောက်ဝတ် ၊ လည်ပင်းနဲ့ နားရွက်နောက် စတဲ့ Pulse Point တွေမှာပဲ ဆွတ်ရတာ ဖြစ်ပါတယ်။ ဒါမှ အနံ့လည်း ပိုထိရောက်သလို ကြာကြာလည်း ရေမွှေးနံ့ စွဲတာပါ။

(၃) အချိန်မှား သုံးခြင်း

ရေမွှေးဘယ်အချိန် ဆွတ်သင့်သလဲဆိုရင် မွေးညင်းပေါက်တွေ ပွင့်ပြီး အသားအရေက အစိုဓါတ်ကောင်းကောင်း ရှိနေချိန်လို့ ပြောချင်ပါတယ်။ ဆိုလိုတာက ရေချိုးပြီးမှ ရေမွှေးဆွတ်ဖို့ပါ။ အဲဒီအချိန်က ရေမွှေးနံ့လည်း ပိုပြီး သင်းပျံ့သလို ထိရောက်မှုအရှိဆုံးလည်း ဖြစ်လို့ပါ။

(၄) ရေမွှေးဆွတ်ထားတဲ့ နေရာကို ပွတ်မိတာ

ရေမွှေးဆွတ်ထားတဲ့ အရေပြားကို သွားပွတ်မိရင် အနံ့မော်လီကျူးလေးတွေ ပြိုကွဲပြီး အမြန်ပဲ မွှေးရနံ့တွေ ပြယ်သွားတတ်ပါတယ်။ ဒါကြောင့် ရေမွှေးဆွတ်ထားရင် လက်နဲ့ လျှောက်မပွတ်ပစ်ပါနဲ့လို့ ပြောချင်ပါတယ်။

(၅) အဝတ်တွေပေါ် ဆွတ်ဖြန်းမိတာ

ရေမွှေးကို ကိုယ်ဝတ်ထားတဲ့ အဝတ်အစားပေါ် Spray မလုပ်သင့်တဲ့အကြောင်းရင်းက နှစ်ခု ရှိပါတယ်။ တစ်ခုက ရေမွှေးက အဝတ်အစားပေါ်မှာ အနံ့ကြာကြာ မစွဲလို့ပါ။ အလကား ဖြန်းတီးသလို ဖြစ်သွားနိုင်ပါတယ်။ နောက်တစ်ကြောင်းက အဝတ်အစားတွေ စွန်းထင်းပြီး ညစ်ပတ်ပေကျံသွားနိုင်လို့ ဖြစ်ပါတယ်။ အဝတ်အစားမှာ Spray ဆွတ်ချင်ရင် ဂျာကင်အတွင်းဘက် အခြမ်းမှာ ရေမွှေးဆွတ်နိုင်ပါတယ်။