သွေးတိုးရောဂါရှိတဲ့သူတွေအတွက် သွေးတိုးခြင်းကိုထိန်းပေးနိုင်တဲ့ ပေါ့ပါးသောလေ့ကျင့်ခန်း ၆ မျိုးကို မျှဝေပေးလိုက်ပါတယ်။ လုပ်ရတာလွယ်ကူပြီး ပေါ့ပါးတဲ့ လေ့ကျင့်ခန်းတွေဖြစ်တာကြောင့် နေ့တိုင်း (သို့) တစ်ပတ် ၄ ရက်၊ ၅ ရက်လောက် ပုံမှန်လုပ်ပေးနိုင်ရင် ပိုကောင်းပါတယ်။
Aerobics
Aerobics လေ့ကျင့်ခန်းက သွေးတိုးခြင်းကို ထိန်းပေးပြီး နှလုံးရောဂါဖြစ်ပွားနိုင်ချေကိုလည်း လျှော့ချပေးပါတယ်။ သွေးလည်ပတ်မှုကောင်းမွန်စေပြီး သွေးပေါင်ချိန်ကို ထိန်းညှိုပေးပါတယ်။ ဒါကြောင့် ပုံမှန် နေ့တိုင်း မိနစ် ၂၀၊ ၃၀ လောက် အချိန်ပေးပြီး Aerobic လေ့ကျင့်ခန်းလုပ်ပေးနိုင်ပါတယ်။
လမ်းလျှောက်ခြင်း
လမ်းလျှောက်ခြင်းက သွေးတိုးခြင်းကို လျှော့ချပေးဖို့အတွက် အလွယ်ကူဆုံးနဲ့ အထိရောက်ဆုံးသော နည်းလမ်းတွေထဲကတစ်ခု ဖြစ်ပါတယ်။ သက်ကြီးရွယ်အိုများအတွက်ဆိုရင် ပိုပြီးတောင် သင့်တော်ပါတယ်။ တစ်နေ့ကို အနည်းဆုံး ၁၅ မိနစ်၊ ၁ မိနစ်ကို ခြေလှမ်းသွက်သွက်နဲ့များများရအောင် လျှောက်ရမှာ ဖြစ်ပါတယ်။
ယောဂ (သို့) တရားထိုင်ခြင်း
ယောဂကျင့်ခြင်း (သို့) တရားထိုင်ခြင်းကလည်း သွေးတိုးခြင်းကို ထိန်းချုပ်ပေးနိုင်တဲ့အရာတွေ ဖြစ်ပါတယ်။ စိတ်ကိုလည်း တည်ငြိမ်စေပြီး သွေးလည်ပတ်မှု ကောင်းမွန်စေတယ်၊ ကိုယ်ဟန်အနေအထား ပိုကောင်းလာစေပါတယ်။ သွေးတိုးခြင်းကိုလည်း ထိန်းချုပ်ချင်တယ်၊ စိတ်ညစ်စရာတွေလည်း များနေတယ် Stress တွေရှိတယ်ဆိုရင် ယောဂကျင့်တာပဲဖြစ်ဖြစ်၊ တရားထိုင်တာပဲဖြစ်ဖြစ် လုပ်ပေးသင့်ပါတယ်။
ရေကူးခြင်း
ရေကူးခြင်းက သွေးပေါင်ချိန်ကို ထိန်းညှိုပေးနိုင်တဲ့ အကောင်းဆုံးလေ့ကျင့်ခန်းတွေထဲက တစ်ခုပါပဲ။ တစ်နေ့ကို မိနစ် ၃၀၊ တစ်ပတ်ကို ၃ ကြိမ် ရေကူးပေးရင် ရပါပြီ။
စက်ဘီးစီးခြင်း
ဒီလိုစက်ဘီးစီးပေးခြင်းက ခြေထောက်ကြွက်သားတွေ အားကောင်းစေပြီး နှလုံးခုန်နှုန်းကို မြှင့်တင်ပေးပါတယ်။ သွေးလည်ပတ်မှုကောင်းမွန်စေပြီး သွေးပေါင်ချိန်ကိုထိန်းညှိုပေးတာကြောင့် သွေးတိုးခြင်းကိုလည်း ထိန်းချုပ်ပေးနိုင်ပါတယ်။ တစ်နေ့ကို မိနစ် ၃၀ လုပ်ပေးရမှာပါ။
ပြေးစက်နဲ့ပြေးခြင်း
ပြေးစက်ပေါ်မှာ လမ်းလျှောက်ခြင်း (သို့) ပြေးခြင်းကလည်း နှလုံးသွေးကြောဆိုင်ရာ ကျန်းမာရေးကို ပိုကောင်းစေပြီး သွေးတိုးခြင်းကိုလည်း ထိန်းညှိုပေးနိုင်ပါတယ်။ သူလည်း တစ်နေ့ကို မိနစ် ၃၀၊ တစ်ပတ်ကို ၅ ရက် လုပ်ပေးရင် ရပါပြီ။ ဒါ့အပြင် ဝိတ်ကျစေဖို့အတွက်လည်း အထောက်အကူပြုပါတယ်။
