အိပ်စက်ခြင်းဟာ ကုန်ကျစရိတ်အနည်းဆုံး ဇိမ်ခံမှုတင် မဟုတ်ပါဘူး။ ဈေးအသက်သာဆုံး ကျန်းမာရေးနည်းလမ်းတစ်ခုလည်း ဖြစ်ပါတယ်။ နှစ်နှစ်ခြိုက်ခြိုက်နဲ့ အိပ်ချိန် ဝဝ အိပ်စက်ခြင်းအားဖြင့် စိတ်နဲ့ ကိုယ်ဟာ ရွှင်လန်းကျန်းမာတဲ့အကျိုးကို ပေးစွမ်းနိုင်ပါတယ်။
အိပ်ရေးဝခြင်းကြောင့် အာရုံစူးစိုက်မှုကောင်းပြီး စိတ်ကြည်ပါတယ်။ စိတ်နဲ့ဆိုင်တဲ့ ရုပ်ကျန်းမာရေးပါ ကောင်းမွန်ပါတယ်။ ဒါကြောင့် နှစ်ခြိုက်ကြည်သာ အိပ်စက်နိုင်ဖို့ ခေါင်းချတာနဲ့ အိပ်ပျော်တတ်သူတို့ရဲ့ အလေ့အထလေးတွေအကြောင်း ပြောပြချင်ပါတယ်။
(၁) အိပ်ချင်အောင် စီစဉ်ထားတတ်တယ်
နှစ်နှစ်ခြိုက်ခြိုက် အိပ်ပျော်လွယ်သူတွေဟာ အိပ်ရာခင်းကအစ ၊ အိပ်မယ့်အခန်းအဆုံး အိပ်ချင်အောင် ကြိုပြီး စီစဉ်ထားတတ်ပါတယ်။ အိပ်မယ့်အခန်းလေး အေးနေအောင် ၊ စောင်ခြင်ထောင် ခေါင်အုံး သန့်ရှင်းနေအောင် ထားတတ်သလို အိပ်သင့်တဲ့အချိန်လည်း ကြိုပြီး စီမံထားတတ်ပါတယ်။
နေ့ခင်းဘက်တွေနဲ့ ညနေဘက်တွေ အိပ်စက်တာမျိုး ရှောင်ကြဉ်ပြီး အိပ်ရေးပျက်စေမယ့် အစားအသောက်တွေလည်း ညနေဘက်ကတည်းက မစားဘဲ နေလေ့ရှိပါတယ်။
(၂) အစားအသောက် ရွေးချယ်စားသုံးမှု မှန်တယ်
အပေါ်မှာ ပြောခဲ့သလိုပါပဲ။ အစားအသောက်ကြောင့် အိပ်ရေးမပျက်ရအောင် ရှောင်သင့်တာ ရှောင်ဖို့ လိုပါတယ်။ ကဖိန်း နဲ့ အစပ်ကဲတဲ့ အစားအစာတွေ ၊ အဆီမြင့်ပြီး အချိုများတဲ့ အစားအသောက်တွေက အိပ်စက်မှုကို ထိခိုက်စေနိုင်လို့ လျှော့စားဖို့/ညဘက်တွေ မစားဘဲ ရှောင်ဖို့ ပြောချင်ပါတယ်။
အဲ့ဒီအစား သဘာဝကောက်ပဲသီးနှံက ရတဲ့ ကာဗွန်ဟိုက်ဒရိတ်ဓါတ်တွေ ပါဝင်တဲ့ Oats ၊ နို့ထွက်ပစ္စည်း ၊ ငှက်ပျောသီး ၊ ချယ်ရီ ၊ ချယားစေ့ တို့လို Sleep-Friendly Foods တွေ စားပေးသင့်ပါတယ်။
(၃) အိပ်ရာမဝင်ခင် ဖုန်း မသုံးတော့ဘူး
အိပ်ပျော်ဖို့ ခက်တဲ့လူတွေမှာ ရှိတတ်တဲ့ အကျင့်ဆိုးတစ်ခုက ညအိပ်ရာဝင်ချိန်မှာ ဖုန်းထိုင်သုံးတာပါပဲ။ တချို့တွေကတော့ TV ဖွင့်ကြည့်ပြီး အိပ်ဖို့လုပ်ကြပါတယ်။
ဖုန်းက ထွက်တဲ့ Blue Light ဟာ အိပ်စက်မှု Patterns ကို ပျက်စီးစေနိုင်သလို ဖုန်းထဲက မကုန်ဆုံးနိုင်အောင် များပြားလှတဲ့ ဖျော်ဖြေရေးတွေကလည်း အိပ်စက်မှုကို အနှောင့်အယှက်ပေးနိုင်ပါတယ်။
အိပ်စက်မှုအရည်အသွေး မြင့်ချင်ရင် အိပ်ရာမဝင်ခင် ၁ နာရီ ၂ နာရီလောက်ကတည်းက ဖုန်းမသုံးဖို့ စည်းကမ်းထားပါ။ ဖုန်းသုံးမယ့်အစား စာအုပ်ကောင်းတစ်အုပ် ဝယ်ဖတ်ပါ။
၆ မိနစ်ကြာ စာဖတ်လိုက်တာနဲ့ နှလုံးခုန်နှုန်း နဲ့ ကြွက်သားတောင့်တင်းမှုတွေ ပြေလျော့စေတယ်လိ့ ဆိုပါတယ်။ ကြွက်သားတွေ ပြေလျော့ပြီး နှလုံးခုန်နှုန်းမှန်သွားတာဟာ အိပ်ပျော်ဖို့ လွယ်ကူအောင် ဖန်တီးလိုက်တဲ့ အခြေအနေပဲ ဖြစ်ပါတယ်။
(၄) တရားထိုင်တဲ့ အကျင့်လုပ်တယ်
အိပ်ခါနီး ၁၅ မိနစ် ၊ နာရီဝက်လောက်ကြာအောင် အသက်ရှုလေ့ကျင့်ခန်း လုပ်တာ ၊ တရားရှုမှတ်တာကလည်း နှစ်နှစ်ခြိုက်ခြိုက် အိပ်မောကျအောင် ကူညီပေးနိုင်ပါတယ်။ ဒါမှမဟုတ် သက်တောင့်သက်သာလှဲပြီး စိတ်နဲ့ တစ်ကိုယ်လုံးက ကြွက်သားစိုင်တွေကို လိုက်ဖြေလျှော့တာမျိုး လုပ်နိုင်ပါတယ်။
နာမည်ကျော် ၄-၇-၈ အသက်ရှုနည်းနဲ့လည်း လုပ်လို့ရပါတယ်။ ၄-၇-၈ နည်းဆိုတာကတော့ ၄ စက္ကန့်ကြာအောင် ရှုသွင်း ၊ ၇ စက္ကန့်ကြာ အသက်အောင့် ၊ ၈ စက္ကန့်ကြာအောင် ရှုထုတ်လုပ်တာ ဖြစ်ပါတယ်။ ဒီလေ့ကျင့်ခန်းကို ၃ ကြိမ်လောက် လုပ်လိုက်တာနဲ့ သိသိသာသာ အိပ်လို့ကောင်းစေနိုင်ပါတယ်။
