ကမ္ဘာတစ်ဝှမ်းက အလှဆုံး အမျိုးသမီးတွေကို စာရင်းလုပ်လိုက်မယ်ဆိုရင် အိန္ဒိယနိုင်ငံကလည်း အမြဲတမ်း စာရင်းဝင်လေ့ရှိပါတယ်နော်။ Miss Universe ပြိုင်ပွဲတွေကို ကြည့်မယ်ဆိုရင်လည်း အိန္ဒိယနိုင်ငံက သရဖူတွေ ရဖူးကြပါတယ်။
အခုလိုမျိုး လှပတဲ့ အိန္ဒိယအမျိုးသမီးတွေရဲ့ လျှို့ဝှက်ချက်တွေကို ရှာဖွေဆန်းစစ်ကြည့်မယ်ဆိုရင်လည်း တခြားဈေးကြီးပေးရတဲ့ အလှကုန်ပစ္စည်းတွေထက် ခေတ်အဆက်ဆက် လက်ဆင့်ကမ်းလာတဲ့ သဘာဝနည်းလမ်းတွေကြောင့်ဆိုတာကို တွေ့ရှိခဲ့ရပါတယ်။
ကဲ…ဒါဆိုရင် ဘယ်လိုမျိုး သဘာဝနည်းလမ်းတွေဖြစ်မလဲဆိုတာကို လေ့လာကြည့်ကြရအောင်ပါ။
၁။ အသားအရေဝင်းပဖို့အတွက် နနွင်း
၁၉၉၄ ခုနှစ်မှာ Miss World သရဖူကို ဆွတ်ခူးရရှိခဲ့တဲ့ Aishwarya Rai Bachchan ဟာဆိုရင် အခု အသက် ၅၀ ရှိပါပြီ။ ဒါပေမယ့်လည်း အသက် ၅၀ လို့မထင်ရလောက်အောင် သူမရဲ့အသားအရေက ဝင်းလက်နေရတဲ့ အကြောင်းအရင်းကတော့ ကုလားပဲအမှုန့်၊ နို့ခရင်မ်နဲ့ နနွင်း လက်တစ်ဆိတ်စာလောက်တို့ကို ရောစပ်ပြီး ပုံမှန်လိမ်းပေးလို့ပဲဖြစ်ပါတယ်။
နနွင်းမှာပါဝင်တဲ့ Curcumin ဟာ Collagen ဖွံ့ဖြိုးမှုကို လှုံ့ဆော်ပေးပြီး Anti-inflammatory နဲ့ Antioxidant တို့ပါဝင်တာကြောင့် အိုမင်းရင့်ရော်ခြင်းကိုလည်း ကာကွယ်ပေးပါတယ်။
၂။ အသားအရေအရောင်မွဲခြောက်ခြင်းအတွက် ပျားရည်
မော်ဒယ်လ်၊ စာရေးဆရာ နဲ့ မင်းသမီး Padma Lakshmi ဆိုရင်လည်း ၅၃ လို့ကို မထင်ရလောက်အောင် နုပျိုနေသူတစ်ဦးဖြစ်ပါတယ်။ သူမရဲ့ အလှအပလျှို့ဝှက်ချက်ကတော့ ပျားရည်ဖြစ်ပြီး ပျားရည်ကို ပြောင်စင်အောင်သစ်ထားတဲ့ မျက်နှာနဲ့ လည်ပင်းကို လိမ်းလေ့ရှိပါတယ်။ လိမ်းပြီးနောက်မှာလည်း အသားအရေထဲစိမ့်ဝင်အောင်လို့ ပုတ်ပုတ်ပေးပြီး မျက်နှာသစ်လိုက်တာပါ။
၃။ စန္ဒကူးအမှုန့်
အိန္ဒိယထိပ်တန်းမင်းသမီးကြီး Kareena Kapoor Khan ဆိုရင်လည်း အိမ်တွင်းနည်းလမ်းတွေနဲ့ Skincare ရတာကို သဘောကျသူပါ။ သူမရဲ့နည်းလမ်းကတော့ စန္ဒကူးအမှုန့် စားပွဲတင်ဇွန်း ၂ ဇွန်း၊ ဗီတာမင်အီးအဆီ နှစ်စက်နဲ့ နနွင်းလက်တစ်ဆိတ်စာလောက် အရောတို့ပဲဖြစ်ပါတယ်။
အသားအရေကို အစိုဓာတ်လိုချင်ရင်တော့ စန္ဒကူးအမှုန့်ကို ပျားရည်နဲ့ ရောစပ်နိုင်ပြီး အဆီပြန်တဲ့အသားအရေအတွက် Mask အဖြစ်သုံးချင်ရင်တော့ စန္ဒကူးအမှုန့်ကို နှင်းဆီရည်၊ နနွင်းလက်တစ်ဆိတ်စာလောက်တို့နဲ့ ရောစပ်ပြီး သုံးနိုင်ပါတယ်။ မျက်နှာကို ပြန်လည်သန့်စင်ချိန်မှာတော့ ရေနွေးနွေးလေးနဲ့ သစ်ပေးဖို့တော့ လိုပါလိမ့်မယ်။
၄။ Moisturizer အဖြစ်အသုံးပြုနိုင်တဲ့ Coconut oil
ဘောလိဝုဒ်မှာသာမက ဟောလိဝုဒ်ထိပါ ထိုးဖောက်နိုင်တဲ့ အသက် ၃၉ နှစ်အရွယ် မင်းသမီး Freida Pinto ကတော့ အသက်ရလာလေ ပိုပြီးနုလာလေသလိုပါပဲ။ သူမရဲ့အသားအရေ ခြောက်သွေ့လာသလို ခံစားရပြီဆိုတာနဲ့ ညဖက်မှာ Coconut oil ကို သုံးပေးလိုက်ပြီး မနက်ကျရင်တော့ အသားအရေလေးက စိုစိုအိအိလေးဖြစ်နေပါတယ်။
၅။ အသားအရေတောက်ပဖို့ ဒိန်ချဥ်
Miss World 2000 ဖြစ်တဲ့ Priyanka Chopra Jonas ကတော့ အသက် ၄၁ နှစ်ရှိသည့်တိုင်အောင် လန်းနေသူတစ်ဦးပါ။ သူမရဲ့ အသားအရေထိန်းသိမ်းနည်းကတော့ လုံးတီးဂျုံအမှုန့် တစ်ခွက်ကို နနွင်းလက်တစ်ဆိတ်စာလောက်ရယ်၊ သံပုရိုရည် အစက်အနည်းငယ်ရယ်၊ နှင်းဆီရည်၊ full-cream ဒိန်ချဥ်တို့နဲ့ အနှစ်ပြုလုပ်ပြီး Mask အဖြစ် သုံးပေးခြင်းပါပဲ။
ဒိန်ချဥ် Mask တွေက အသားအရေကို ဝင်းလက်စေတဲ့အပြင် တင်းတင်းရင်းရင်းလည်း ရှိစေပါတယ်။ ဒါ့အပြင် အရေးအကြောင်းတွေကိုလည်း လျော့နည်းစေပါသေးတယ်။
၆။ Cellulite အတွက် ကော်ဖီ
နောက်ထပ် နာမည်ကျော်မင်းသမီး Malaika Arora ရဲ့ လျှို့ဝှက်ချက်ကတော့ ကော်ဖီမှုန့်၊ သကြားအညို၊ Coconut oil တို့ကို ရောစပ်ပြီးတော့ Body Scrub လုပ်ပေးခြင်းဖြစ်ပါတယ်။ ဒါကြောင့်လည်း သူမရဲ့အသားအရေက အဆီပိုမရှိဘဲ တင်းတင်းရင်းရင်းနဲ့ လှနေတာပါ။
၇။ ရှားစောင်းလက်ပတ်
၂၀၀၀ ခုနှစ်မှာပဲ Miss Universe သရဖူရရှိခဲ့တဲ့ Lara Dutta ဟာဆိုရင်လည်း မနက်ခင်းတိုင်းမှာ ဗီတာမင်ဒီဓာတ်ရရှိအောင်လို့ နေရောင်ခြည်လုံလုံလောက်လောက် ခံယူပြီး ရှားစောင်းလက်ပတ်အနှစ်နဲ့ ပြန်ပြီး အသားအရေထိန်းသိမ်းလေ့ရှိပါတယ်။
၈။ ငှက်ပျောသီး
၃၅ နှစ်ရှိပြီဖြစ်တဲ့ Anushka Sharma ကတော့ အိန္ဒိယမော်ဒယ်လ်နဲ့ မင်းသမီးဖြစ်ပြီး သူမရဲ့အသားအရေ ဝင်းလက်စိုပြေနေစေဖို့ ငှက်ပျောသီးကိုကြိတ်ခြေပြီး အနှံ့လိမ်းကျံကာ နှိပ်နယ်ပေးလေ့ရှိပါတယ်။ လိမ်းပြီး ချက်ချင်း သန့်စင်လို့လည်းရသလို မိနစ်အနည်းငယ်လောက်ထားပြီးမှ သန့်စင်လို့လည်း ရပါတယ်။
Source: BrightSide
