မင်္ဂလာပါ ပျိုမေတို့ရေ။ ခန္ဓာကိုယ်အောက်ပိုင်း ပေါင်နဲ့တင်ပါးတစ်ဝိုက်က အဆီပိုတွေအတွက် ယောဂလေ့ကျင့်ခန်းတွေလုပ်ရင်းနဲ့လည်း ဖယ်ရှားနိုင်ပါတယ်နော်။ ရိုးရိုးလေ့ကျင့်ခန်းထက် ယောဂကျင့်ပေးတာက ခန္ဓာကိုယ်အကြောပြေကာ စိတ်ရောကိုယ်ပါ ကြည်လင်ပေါ့ပါးစေသလို ကိုယ်တွင်းအဆီကိုပါ လျှော့ချပေးလို့ ခုန်ပေါက်ပြီး လေ့ကျင့်ခန်းမလုပ်ချင်သူတွေ၊ ဝိတ်ချရင်း Stress ပါ လျော့ချင်သူတွေအတွက် ကွက်တိပါပဲ။ ဒါကြောင့် ဒီတစ်ခေါက်မှာ ပေါင်နဲ့တင်ပါးတစ်ဝိုက် အဆီကျဖို့ ပုံမှန်လုပ်ပေးသင့်တဲ့ ယောဂလေ့ကျင့်ခန်း (၆) မျိုးကို ဖော်ပြပေးလိုက်ပါတယ်။ လိုက်လုပ်ကြည့်ဖို့ စဉ်းစားထားတယ်ဆိုရင် ဆက်ကြည့်လိုက်ပါနော်-
၁။ Crescent Moon Pose
ပုံမှာပြထားတဲ့အတိုင်း ခြေထောက်တစ်ချောင်းရှေ့ထုတ်ကာ ဒူးကွေးထားပြီး ကျန်တစ်ဖက်ကိုတော့ အနောက်ကိုဆန့်ထားပေးရပါမယ်။ တစ်ဖက်ဒူးကို ၉၀ ဒီဂရီပုံစံကွေးကာ လက်နှစ်ဖက်ကိုစုပြီး အပေါ်ဆန့်ထုတ်လိုက်ပါ။ ခေါင်းကိုပါမော့ပြီး ဝင်လေထွက်လေကို အာရုံစိုက်ကာ စက္ကန့် ၃၀ ခန့်နေပေးပါ။ အလားတူ ဘက်ပြောင်းပြီး လုပ်ပေးပါနော်။
၂။ Bridge Pose
တင်ပါးဘေး အသားအရေကိုကျစ်လျစ်စေတဲ့ ယောဂ Pose ဖြစ်ပြီး လုပ်ရလည်းလွယ်ပါတယ်။ ခန္ဓာကိုယ်လှဲချကာ ဒူးထောက်ပြီး ခန္ဓာကိုယ်အပေါ်ပိုင်းကို မ ထားပေးရမှာပါ။ လက်နှစ်ဖက်ကိုပါ ကြမ်းပြင်မှာကပ်ကာ ၁၅ စက္ကန့် မှ ၃၀ စက္ကန့်ကြား နေပြီး ဖြေးဖြေးချင်း ခန္ဓာကိုယ်ပြန်ချနိုင်ပါတယ်။
၃။ Lizard Pose
သူ့ကိုလည်း ဒူးတစ်ဖက်ရှေ့ထုတ်ပြီး ၉၀ ဒီဂရီထောက်ကာ ကျန်တစ်ဖက်ကို နောက်မှာ ခြေဖျားထောက်ပြီး လုပ်ပေးရမှာပါ။ လက်နှစ်ဖက်ကိုတော့ ကြမ်းပြင်မှာထောက်ပြီး ခါးဆန့်ကာ ခန္ဓာကိုယ်ဟန်ချက်ကို ထိန်းထားပေးရပါမယ်။ စက္ကန့် ၃၀ ခန့်နေပြီး ဘက်ပြောင်းကာ ပြုလုပ်ပေးပါ။
၄။ Garland Pose
ခြေထောက်နှစ်ဖက်ကားပြီး ဒူးကွေးကာ ထိုင်ချလိုက်ပါ။ လက်တွေကို ကားထားတဲ့ ခြေထောက်နှစ်ဖက်ကြားကနေ လက်အုပ်ချီနေထားသလို လုပ်ပေးရပါမယ်။ တံတောင်နဲ့ ပေါင်နှစ်ဖက်ကို ဘေးအနည်းငယ်တွန်းပြီး ကြွက်သားတွေတင်းသွားအောင် လုပ်ပေးပါနော်။ တင်ပါးနဲ့ ကြမ်းပြင်မထိစေဘဲ ဒီပုံအတိုင်း စက္ကန့်သုံးဆယ်ခန့် ဟန်ချက်ထိန်းကာ ထိုင်ပေးပါ။
၅။ Warrior Pose
မတ်တပ်ရပ်ကာ ခြေထောက်တစ်ချောင်းစီ အရှေ့အနောက်ထုတ်ပြီး သုံး၊ လေးပေကွာအောင် ကားထားပါ။ ရှေ့ခြေထောက်ကို ဒူးကွေးပြီး နောက်ဘက်ကိုတော့ ခြေဖျားထောက်ပေးရပါမယ်။ ခါးဆန့်ကာ လက်နှစ်ဖက်ပါ မြှောက်ပြီး အပေါ်ဆန့်ထုတ်ထားပေးပါနော်။ တင်ပါးနဲ့ ပေါင်ကကြွက်သားတွေကို တင်းထားပြီး ဝင်လေထွက်လေ မှန်မှန်ရှုကာ စက္ကန့် ၃၀ ခန့်နေပေးရပါမယ်။
၆။ Goddess Pose
ပေါင်၊ ခြေသလုံးနဲ့ ဒူးအောက်က အဆီတွေအတွက် ထိရောက်တဲ့လေ့ကျင့်ခန်းဖြစ်ပါတယ်။ မတ်တပ်ရပ်လျက် ခြေထောက်နှစ်ဖက် ဘေးဘက်ကားကာ ခြေဖျားထောက်ပေးထားပါ။ လက်တွေကိုစုထားပြီး လက်အုပ်ချီသလို လုပ်ပေးပါနော်။ ခြေဖျားထောက်ရလို့ ခန္ဓာကိုယ်မယိုင်ကျအောင် ဟန်ချက်ထိန်းပေးဖို့လိုပါတယ်။ သူ့ကိုလည်း စက္ကန့် ၃၀ ခန့် နှစ်ကြော့လုပ်ပေးပါ။
Photo Source: Pinterest
By MyStyle Myanmar
