ကလေးဘဝက ကြိုက်နှစ်သက်ခဲ့ရတဲ့ ဟယ်ရီပေါ်တာရုပ်ရှင်ဇာတ်ကားထဲမှ ကလေးသရုပ်ဆောင်တွေကို အားလုံးပဲ မှတ်မိနေကြဦးမယ်ထင်ပါတယ်။ ဟယ်ရီပေါ်တာဇာတ်ကားမှာ ပါဝင်ခဲ့ကြတဲ့ ကလေးသရုပ်ဆောင်တွေဟာ လက်ရှိမှာ အသက် (၃၀) ဝန်းကျင် လူကြီးတွေဖြစ်နေကြပြီဖြစ်ပြီး သရုပ်ဆောင်အလုပ်ကို ဆက်လက်မလုပ်ကိုင်တော့တဲ့ သူတွေလည်းအများကြီးရှိပါတယ်။
တချို့က ဓာတ်ပုံဆရာတွေ ၊ ဂီတပညာရှင်တွေအဖြစ် အသက်မွေးဝမ်းကြောင်းလုပ်ငန်းတွေ လုပ်ကိုင်နေကြပြီး တချို့က ပရော်ဖက်ရှင်နယ် အားကစားသမားတွေလည်းဖြစ်လို့နေပါပြီ။
ဒီဆောင်းပါးလေးမှာတော့ ပရိသတ်တွေမှတ်မိလောက်ဦးမယ့် ဟယ်ရီပေါ်တာဇာတ်ကားထဲမှ ကလေးသရုပ်ဆောင်တချို့ရဲ့ ပြောင်းလဲသွားတဲ့ ဘဝအခြေအနေတွေကို တင်ဆက်ပေးချင်ပါတယ်။
Colin Creevey အဖြစ်သရုပ်ဆောင်ခဲ့တဲ့ Hugh Mitchell
လူကောင်သေးသေးလေးနဲ့ ချစ်စရာကောင်းတဲ့ Colin Creevey အဖြစ်သရုပ်ဆောင်ခဲ့တဲ့ Hugh ကို မှတ်မိကြဦးမယ်ထင်ပါတယ်။ ဟယ်ရီပေါ်တာဇာတ်ကားဟာ Hugh ရဲ့ ပထမဆုံးပွဲဦးထွက် ရုပ်ရှင်ဇာတ်ကားဖြစ်ပြီး အဲ့ဒီနောက်မှာတော့ ရုပ်ရှင်ဇာတ်ကား ၁၆ ကားနဲ့ ရုပ်ရှင်စီးရီးတွေများစွာမှာ ပါဝင်သရုပ်ဆောင်ခဲ့ပါတယ်။
အသက် ၃၁ နှစ်ရှိပြီဖြစ်တဲ့ Hugh ဟာ လက်ရှိမှာတော့ တေးရေးဆရာ ၊ အဆိုတော်နှင့် ဓာတ်ပုံရိုက်ကူးရေး အလုပ်တွေကို လုပ်ကိုင်လျက်ရှိပါတယ်။
Ginny Weasley အဖြစ်သရုပ်ဆောင်ခဲ့တဲ့ Bonnie Wright
Bonnie ဟာ Ginny Weasley အဖြစ်နဲ့ ဟယ်ရီပေါ်တာဇာတ်ကားမှာ ပထမဆုံးပါဝင်သရုပ်ဆောင်ခဲ့သူဖြစ်ပါတယ်။ ဟယ်ရီပေါ်တာဇာတ်ကားမှာ ပထမဆုံးသရုပ်ဆောင်ခြေလှမ်းကိုစခဲ့ပြီးနောက် ရုပ်ရှင်ဇာတ်ကား ၁၃ ကားမှာ ထပ်မံပါဝင်သရုပ်ဆောင်ခဲ့ပါတယ်။
ဒါ့အပြင် ကိုယ်ပိုင်ရုပ်ရှင်ထုတ်လုပ်ရေး Company တစ်ခုတည်ထောင်ခဲ့ပြီး ကိုယ်တိုင် ဇာတ်ညွှန်းရေးသူ၊ ရုပ်ရှင်ဒါရိုက်တာနှင့် ရုပ်ရှင်ထုတ်လုပ်သူအဖြစ် လုပ်ကိုင်လျက်ရှိပါတယ်။ အသက် (၃၂) နှစ်တဲ့ Bonnie ဟာ ပရဟိတလုပ်ငန်းတွေမှာလည်း တက်ကြွစွာပါဝင်လုပ်ကိုင်လျက်ရှိပါတယ်။
Draco Malfoy အဖြစ်သရုပ်ဆောင်ခဲ့တဲ့ Tom Felton
ဇာတ်လမ်းထဲမှာ Draco ဟာ Harry ရဲ့ရန်ဘက်နေရာက သရုပ်ဆောင်ခဲ့ပေမယ့် အပြင်မှာတော့ Daniel Radcliffe နဲ့ Rupert Grint ရဲ့အချစ်ဆုံးသူငယ်ချင်းတစ်ယောက်ဖြစ်ပြီး Emma Watson ရဲ့ အချစ်ဦးဖြစ်ခဲ့ သူတစ်ယောက်လည်းဖြစ်ပါတယ်။
Tom က ဟယ်ရီပေါ်တာဇာတ်ကားမှာ မပါဝင်ခင်ကတည်းက သရုပ်ဆောင်လမ်းကြောင်းပေါ် လျှောက်လှမ်းနေသူဖြစ်ပြီး သံစုံတီးဝိုင်းတွေမှာလည်း သီချင်းသီဆိုနေခဲ့သူတစ်ဦးပါ။
အသက် ၃၅ နှစ်ရှိပြီဖြစ်တဲ့ Tom ဟာ လက်ရှိမှာလည်း အနုပညာလုပ်ငန်းတွေ ဆက်လက်လုပ်ကိုင်လျက်ရှိပြီး တစ်ကိုယ်တော်သီချင်းအယ်လ်ဘမ် ၂ ခွေ နဲ့ Origin လို့အမည်ရတဲ့ TV series တစ်ခုမှာ ပါဝင်သရုပ်ဆောင်ထားပါတယ်။
Gregory Goyle အဖြစ်သရုပ်ဆောင်ခဲ့တဲ့ Joshua Herdman
Gregory Goyle ဇာတ်ကောင်နေရာမှာသရုပ်ဆောင်ခဲ့သူ Joshua Herdman ကတော့ ဇာတ်ကားထဲမှာ Draco Malfoy ရဲ့သူငယ်ချင်းနေရာကနေ ပါဝင်သရုပ်ဆောင်ခဲ့တဲ့ Slytherin ကျောင်းသားတစ်ဦးဖြစ်ပါတယ်။
Joshua Herdman ဟာ ရုပ်ရှင်စီးရီးနှင့် ဇာတ်ကားပေါင်းများစွာမှာပါဝင်သရုပ်ဆောင်ခဲ့ပြီး ၂၀၁၈ ခုနှစ်ကထွက်ရှိခဲ့တဲ့ Robin Hood ရုပ်ရှင်ဇာတ်ကားမှာပါဝင်ခဲ့ပါတယ်။
အသက် ၃၅ နှစ်ရှိပြီဖြစ်တဲ့ Joshua Herdman ကတော့ လက်ရှိမှာ သရုပ်ဆောင်အလုပ်ကို ဆက်လက်လုပ်ကိုင်လျက်ရှိပြီး နောက်ထပ်သူရဲ့အသက်မွေးကြောင်း အလုပ်တစ်ခုဖြစ်တဲ့ MMA ဖိုက်တာတစ်ဦးအဖြစ်နဲ့လည်း ရပ်တည်လျက်ရှိပါတယ်။
Seamus Finnigan အဖြစ်သရုပ်ဆောင်ခဲ့တဲ့ Devon Murray
ဟယ်ရီပေါ်တာရုပ်ရှင်ဇာတ်ကားမှာ Seamus Finnigan အဖြစ်သရုပ်ဆောင်ခဲ့တဲ့ အိုင်ယာလန်နိုင်ငံသား Devon Murray ဟာ သူ့အသက် (၆) နှစ်အရွယ်ကတည်းက သရုပ်ဆောင်အလုပ်ကို စတင်လုပ်ကိုင်ခဲ့သူဖြစ်ပါတယ်။
Devon Murray ဟာ မြင်းစီးရတာကိုအလွန်နှစ်သက်သူတစ်ဦးဖြစ်ပြီး သူ့မှာ အချစ်တော် ပြိုင်မြင်း ၆ ကောင်မွေးထားကာ မြင်းစီးပြိုင်ပွဲများစွာကိုလည်းဝင်ရောက် ယှဉ်ပြိုင်လျက်ရှိပါတယ်။
အသက် ၃၃ နှစ်ရှိပြီဖြစ်တဲ့ Devon ဟာ လက်ရှိမှာတော့ သရုပ်ဆောင်လုပ်ငန်းတွေနဲ့အတူ ပြိုင်မြင်းစီး အားကစားသမားတစ်ယောက်အဖြစ် ရပ်တည်လျက်ရှိပါတယ်။
