အထင်ကရကမ်းခြေတွေဖြစ်တဲ့ ငွေဆောင်၊ ချောင်းသာ၊ ငပလီပဲ သွားမလား (သို့) ပြာလွှလွှ ရေပြင်များနှင့် ကြည်လင်လှပနေတဲ့ မြိတ်ကျွန်းစုဆီပဲ အလည်သွားမလား ရွေးချယ်စရာတွေက အများကြီးပါပဲ။

အားလပ်ရက်လေးမှာ စိတ်လက်အပန်းဖြေဖို့အတွက် ကမ်းခြေဆီအလည်သွားမယ်လို့ ဆုံးဖြတ်တဲ့အခါ မပါမဖြစ် ထည့်သွားသင့်တဲ့ အသုံးအဆောင်ပစ္စည်းတချို့ရှိပါတယ်။ ထိုပစ္စည်းများကို ထည့်သွားမှသာလျှင် သင့်ရဲ့ကမ်းခြေ အပန်းဖြေခရီးက အဓိပ္ပာယ်ပြည့်စုံမှာပါ။

Sunscreen ထည့်သွားပါ

ကမ်းခြေဆီ ခရီးသွားမယ်ဆိုကတည်းက နေလောင်ခံရတော့မှာပါ။ သင့်အသားအရေ နေလောင်ခံရပြီး မပျက်စီးစေချင်ဘူးဆိုရင်တော့ နေလောင်ကာခရင်မ်လေး မရှိမဖြစ် ဆောင်သွားသင့်ပါတယ်။ နေလောင်ကာခရင်မ်က မိန်းကလေးတွေပဲ အသုံးပြုရတဲ့အလှကုန်ပစ္စည်း မဟုတ်ပါဘူး။ ယောကျာ်းများအတွက်ပါ မရှိမဖြစ်လိုအပ်တဲ့ အသုံးအဆောင်ပစ္စည်းတစ်မျိုးပါပဲ။

နေကာမျက်မှန် ယူသွားပါ

ကမ်းခြေမှာ ရှိုးစမိုးအပြည့်နဲ့ ဖက်ရှင်ကျချင်တယ်ဆိုရင်တော့ အရည်အသွေးကောင်းတဲ့ နေကာမျက်မှန်တစ်လက် ဆောင်သွားသင့်ပါတယ်။ ဒါမှ သဲသောင်ပြင်မှာ လမ်းလျှောက်တဲ့အခါ (သို့) ဓာတ်ပုံရိုက်တဲ့အခါ စတိုင်လ်အပြည့်နဲ့ ဖက်ရှင်ကျနေမှာပါ။

စာအုပ် တစ်အုပ်သယ်သွားပါ

နေ့လည်နေ့ခင်း အရိပ်ရတဲ့နေရာမှာထိုင်ရင်း အုန်းရည်လေး သောက်ရင် စိတ်ပြေလက်ပျောက်နဲ့ စာဖတ်နိုင်ပါသေးတယ်။ ပတ်ဝန်းကျင် သဘာဝအလှအပကို ကြည့်ရှုခံစားလိုက် ပျင်းလာရင် စာအုပ်ဖတ်လိုက်နဲ့ စိတ်အပန်းပြေသွားပါလိမ့်မယ်။

ခြေညှပ်ဖိနပ် သယ်သွားပါ

သဲသောင်ပြင်မှာ လမ်းလျှောက်တဲ့အခါ Sneaker ဖိနပ်တွေ၊ ရှူးဖိနပ်တွေက လုံးဝအဆင်ပြေမှာမဟုတ်ပါဘူး။ ဒါ့ကြောင့် ခြေညှပ်ဖိနပ်တစ်ရံ မပါမဖြစ် ထည့်သွားသင့်ပါတယ်။

ဦးထုပ်

လျှာထိုးဦးထုပ်တွေ သယ်သွားမယ့်အစား ပေါ့ပေါ့ပါးပါးနဲ့ ရှိုးထုတ်နိုင်မယ့် ဦးထုပ်ဝိုင်းများ သယ်သွားပါ။ ဒါမှမဟုတ် ကမ်းခြေမှာ ရောင်းတဲ့ အုန်းခွံနဲ့ ရက်လုပ်ထားတဲ့ ဦးထုပ်များကိုလည်း ဈေးနှုန်းချိုသာစွာနဲ့ ဝယ်ယူနိုင်ပါသေးတယ်။

ပါဝါဘန့်ခ်

ကမ်းခြေကို ခရီးသွားမှမဟုတ်ပါဘူး။ ဘယ်နေရာပဲ ခရီးထွက်ထွက် ပါဝါဘန့်ခ်လေးတစ်လုံးကတော့ မရှိမဖြစ် ဆောင်သွားသင့်ပါတယ်။ ဒါမှ လျှပ်စစ်မီးမရတဲ့ နေရာဒေသမှာ ဖုန်းအားမကုန်ဘဲ အလွယ်တကူ အားသွင်းနိုင်မှာဖြစ်ပါတယ်။