မင်္ဂလာပါ… ပျိုမဒီတို့ရေ…. အဝတ်အစားဝယ်တဲ့အခါ အများစုက ဘာနဲ့တွဲဝတ်ဝတ် အဆင်ပြေတဲ့ အနက်ရောင်ကို ပိုရွေးချယ်တတ်ကြပါတယ်။ အနက်ရောင်က ပုံမှန်ကော ပွဲတတ်အတွက်ပါ ပေါ့ပေါ့ပါးပါးဖြစ်စေပြီး ရွေးရတဲ့အချိန်ကို အကုန်သက်သာစေပါတယ်။
အနက်ရောင်က ပွဲကြီးများအထိဘက်စုံအသုံးဝင်ပေမယ့် မင်္ဂလာပွဲတက်တဲ့အခါမှာတော့ မင်္ဂလာပွဲက ချစ်ခြင်းမေတ္တာရဲ့ အခမ်းအနားတစ်ခုဖြစ်တာကြောင့် အနက်ရောင်ဝတ်လို့ကောင်းပါ့မလား…? ဒါမှမဟုတ် တခြားအရောင်ကို ရွေးသင့်လား…?
ထုံးတမ်းစဉ်လာကိုသတိထားပါ
မင်္ဂလာပွဲတက်တဲ့အခါမှာ ပထမဆုံးသတိထားရမယ့်အချက်က သတို့သား ၊ သတို့သမီးက သူတို့ရဲ့ မင်္ဂလာပွဲအတွက် ဓလေ့ထုံးတမ်းတွေကို လိုက်နာခြင်း ရှိ၊ မရှိ သတိထားဖို့လိုအပ်ပါတယ်။ ဥပမာ… အိန္ဒိယနဲ့တရုတ် ရိုးရာမင်္ဂလာပွဲအများစုမှာ “ဝမ်းနည်းခြင်းပွဲအခမ်းအနားမဟုတ်တာကြောင့် မှောင်မိုက်သောအရောင်များဝတ်ဆင်ခြင်းမပြုရန်” ဆိုပြီး ဧည့်သည်များကို တားမြစ်လေ့ရှိတတ်ပါတယ်။
တည်နေရာကိုစဉ်းစားပါ
မင်္ဂလာပွဲကျင်းပမယ့်နေရာကလည်း အနက်ရောင်ဝတ်ဆင်သင့်လား မသင့်လားဆိုတာ ပြောပြတတ်ပါတယ်။ ဥပမာ… ကမ်းခြေမှာကျင်းပမယ့် မင်္ဂလာပွဲတက်မယ်ရင် အနက်ရောင်ထက် ပိုတောက်ပတဲ့အရောင်တွေက မင်္ဂလာဆောင်တဲ့အငွေ့အသက်ကို ဖြည့်ဆည်းပေးရုံသာမက နေရောင်အောက်မှာ အေးမြနေအောင်လည်း ကူညီပေးမှာပါ။
ရာသီနဲ့အချိန်ကို ထည့်တွက်ပါ
နောက်ဆုံး စဉ်းစားရမယ့်အချက်နှစ်ချက်က မင်္ဂလာဆောင်ကျင်းပမယ့်အချိန်နဲ့ ရာသီဥတုပါ။ ယေဘူယျအားဖြင့်တော့ နွေရာသီမှာကျင်းပတဲ့မင်္ဂလာပွဲအတွက် ပေါ့ပါးတဲ့အရောင်တွေကို ဝတ်ဆင်ကြပြီး ဆောင်းရာသီမှာ ကျင်းပတဲ့မင်္ဂလာပွဲများအတွက်တော့ နက်မှောင်တဲ့ဝတ်စုံကို ဝတ်လေ့ရှိကြပါတယ်၊။
ဒါဆို မင်္ဂလာဆောင်မှာ အနက်ရောင်ဝတ်သင့်လား ?
ယဉ်ကျေးမှုအရ မသင့်လျော်ဘူးလို့ မထင်ရဘူးဆိုရင် ဒါမှမဟုတ် Dress Code ကို မဆန့်ကျင်ဘူးဆိုရင်တော့ မင်္ဂလာပွဲမှာ အနက်ရောင်ကို ဝတ်လို့ရပါတယ်။ ဇနီးမောင်နှံနှစ်ဦး ကတိသစ္စာပြုတဲ့နေရာပေါ်မူတည်ပြီး သင့်အတွက် အကောင်းဆုံးလို့ ခံစားမိတယ်ဆိုရင်တော့ ဝတ်လို့ရပါတယ်။
