ပုံမှန်ထက်ပိုပြီး ဆံပင်အဆီပြန်တာက ကိုယ်လုပ်နေတဲ့ အပြုအမူတွေကြောင့်လည်း ပါပါတယ်။ ဒါကြောင့် ကိုယ့်လုပ်နေမိတာတွေက မလုပ်သင့်တာတွေပါနေရင်လည်း ဆင်ခြင်လို့ရအောင် ဆံပင်အဆီပြန်ပြီး စေးကပ်တာမျိုးဖြစ်စေတဲ့ အဓိကအကြောင်းအရင်းတွေကို ပြောပြပေးလိုက်ပါတယ်။
ခေါင်းခဏခဏလျှော်ခြင်း
ခေါင်းခဏခဏလျှော်ရင် ဆံသားအဆီထုတ်မှုတွေ ပိုများလာပြီး ဆံပင်စေးကပ်တာ၊ အဆီပြန်တာတွေ ဖြစ်စေပါတယ်။
Conditioner အသုံးများခြင်း
ခေါင်းလျှော်တဲ့အခါမှာ ဦးရေပြားနားကပ်ပြီးတော့ Conditioner မသုံးရပါဘူး။ ဦးရေပြားနားကပ်ပြီး Conditioner အသုံးများရင်၊ ဦးရေပြားအထိပါ Conditioner တွေသုံးရင် ဆံပင်စေးကပ်ပြီး အဆီပြန်လာပါလိမ့်မယ်။
ဟော်မုန်းဓာတ်မညီမျှခြင်း
ဟော်မုန်းဓာတ်မညီမျှရင်လည်း အဆီထုတ်မှုတွေ ပိုများလာပြီး ဆံပင်အဆီပြန်တာ၊ အသားအရေ အဆီအရမ်းပြန်တာမျိုးတွေ ဖြစ်တတ်ပါတယ်။
ညစ်ပတ်တဲ့ဘီးနဲ့ဖြီးခြင်း
ညစ်ပတ်တဲ့ဘီးနဲ့ ခေါင်းဖြီးတဲ့အခါ ဘီးမှာကပ်နေတဲ့ အညစ်အကြေးတွေက ဆံပင်နဲ့ ဦးရေပြားကို ပြန်ကပ်စေတဲ့အတွက် ဘာမှမထူးပါဘူး။ ဦးရေပြားညစ်ပစ်ပြီး အဆီပိုပြန်လာတာပဲ ရှိပါတယ်။
ဆံပင်ကိုအမျိုးမျိုးပြင်ဆင်ခြင်း
ဆံပင်ကို Gel တွေသုံးလိုက်၊ ကောက်သား Cream တွေသုံးလိုက်၊ Hair Spray တွေသုံးလိုက်နဲ့ အမျိုးမျိုး ကောက်လိုက်၊ ဖြောင့်လိုက်၊ ပုံသွင်းလိုက်နဲ့ လုပ်တာများရင်လည်း ဦးရေပြားနဲ့ ဆံသားက အဆီပြန်စေပါတယ်။
ဆီကြော်မုန့်တွေများများစားခြင်း
ဆီကြော်မုန့်တွေကို များများစားသုံးခြင်းကြောင့် ဟော်မုန့်ဓာတ်မညီမျှတော့ပဲ ဆံပင်အဆီပြန်လာတာ၊ အသားအရေအဆီပြန်ပြီး အဆီဖုထွက်တာ၊ ဝက်ခြံပိုများလာတာမျိုးတွေ ဖြစ်စေပါတယ်။
