အားလုံးပဲ မင်္ဂလာပါနော်။ မနက်နိုးတာနဲ့ အကြောဆန့်ရင်း သွေးပူလေ့ကျင့်ခန်းလေး လုပ်တတ်တဲ့သူတွေ ရှိကြလား။ တစ်နေ့ကုန် စိတ်သစ်လူသစ်ဖြစ်နေဖို့ဆိုရင် မနက်ပိုင်းမှာလုပ်နေကျအရာတွေက အရေးကြီးတာမို့ အကြောလျှော့လေ့ကျင့်ခန်းလုပ်တတ်တဲ့ အကျင့်ဖြစ်အောင်မွေးမြူထားဖို့ အကြံပေးချင်ပါတယ်နော်။ Morning Stretches ပုံမှန်လုပ်တာက အစာခြေစနစ်နဲ့ ကျန်းမာရေးအတွက်လည်းကောင်းသလို ကိုယ်လက်အကြောပြေပြီး Stress လည်းကျစေမှာပါ။ ဒါကြောင့်မို့ လိုက်လုပ်ချင်တဲ့သူတွေအတွက် အချိန်ခဏပေးရုံနဲ့ ထိရောက်မယ့် အကြောလျှော့လေ့ကျင့်ခန်းတွေကို ဖော်ပြပေးလိုက်ပါတယ်။

လေ့ကျင့်ခန်း ၁


အပြေးသမားတွေလုပ်လေ့ရှိတဲ့ အကြောလျှော့နည်းတစ်မျိုး ဖြစ်ပါတယ်။ ပုံထဲကလို ဒူးတစ်ဖက်ထောက်အနေအထားနဲ့ ကျန်တစ်ဖက်ကို ရှေ့တိုးနောက်ဆုတ်လုပ်ပါ။ လက်တွေကို ခါးထောက်လိုက် ကြမ်းပြင်နဲ့ထိလိုက် ဟန်ချက်ညီညီလေးလုပ်ပေးရမှာပါ။ နောက်ခါးကြောနာတာတွေ သက်သာပြီး အကြောပြေစေတာကြောင့် အမြဲထိုင်ပြီးအလုပ်လုပ်နေရတဲ့သူတွေအတွက် ကွက်တိပါပဲ။

လေ့ကျင့်ခန်း ၂


တစ်ကိုယ်လုံးထိရောက်တဲ့လေ့ကျင့်ခန်းလေးပါ။ ပြထားတဲ့အတိုင်း ခန္ဓာကိုယ်အပေါ်ပိုင်းကို အောက်ငုံ့ချကာ ဒူးမကွေးစေဘဲ လက်တွေကိုကြမ်းပြင်နဲ့ထိတဲ့အထိ ကုန်းလိုက်ပါ။ ပြန်ထပြီး ဒီပုံအတိုင်း အနည်းဆုံး ငါးကြိမ်လောက်ပုံမှန်လုပ်ပေးဖို့လိုပါတယ်။

လေ့ကျင့်ခန်း ၃

ကြမ်းပြင်မှာထိုင်ပြီး ခြေထောက်တစ်ဖက်ကွေးကာ နောက်တစ်ဖက်ကို ဒူးထောင်ထားပြီး လက်တွေကိုတော့ ပုံထဲကလို ခြေထောက်ဘေးဘက်ချလိုက် ပြန်တင်လိုက်လုပ်ပေးပါ။ အတင်အချဖြေးဖြေးချင်းနဲ့ ဘက်ပြောင်းပြီး စက္ကန့် ၃၀ စီလုပ်ပေးရပါမယ်။

လေ့ကျင့်ခန်း ၄


တင်ပလ္လင်ခွေအနေအထားနဲ့ ခြေဖဝါးနှစ်ဖက်စုထားပြီး ခန္ဓာကိုယ်ကို ကိုင်းချလိုက် ပြန်ထလိုက်လုပ်ပေးပါ။ တတ်နိုင်သလောက်အောက်ကို ငုံ့ချပေးပြီး သူ့ကိုလည်း စက္ကန့် ၃၀ အနည်းဆုံးလုပ်ပေးသင့်ပါတယ်။

လေ့ကျင့်ခန်း ၅


ယောဂလေ့ကျင့်ခန်းဖြစ်ပါတယ်။ ပုံမှာပြထားသလို ခန္ဓာကိုယ်အပေါ်ပိုင်းထောက်ထားတဲ့အနေအထားနဲ့ စက္ကန့်အနည်းငယ်လောက်နေပြီး အကြောဆန့်ထုတ်ပေးရပါမယ်။

လေ့ကျင့်ခန်း ၆


လေးဘက်ထောက်ပြီး ခါးရိုးနဲ့ ခေါင်းကို မော့လိုက် အောက်ပြန်ငုံ့လိုက်လုပ်ပေးရမှာပါ။ သူ့ကိုလည်း စက္ကန့် ၃၀ လောက် ဖြေးဖြေးချင်း လုပ်ပေးဖို့လိုပါတယ်နော်။ ခန္ဓာကိုယ်အပေါ်ပိုင်းနောက်ကျောတစ်လျှောက် တင်းနေတဲ့အကြောတွေ ပြေလျော့သွားစေမှာပါ။

Photo Source: Healthline, Pinterest

By MyStyle Myanmar