အလုပ်စားပွဲမှာ အကြာကြီး ထိုင်ရသူတို့ မဖြစ်မနေပြုလုပ်သင့်တဲ့ လေ့ကျင့်ခန်းများ

လွန်ခဲ့တဲ့ နှစ်အနည်းငယ်အတွင်း လူသားတွေရဲ့ အလုပ်လုပ်တဲ့ပုံစံတွေက တဖြည်းဖြည်း ပြောင်းလဲလာခဲ့ပါတယ်။ ရုံးသွားလုပ်ရမယ့်အစား အိမ်မှာပဲ ပြုလုပ်လာကြတဲ့ အပြောင်းအလဲကိုလည်း တွေ့မြင်လာရပါတယ်။ နောက်ဆက်တွဲအနေနဲ့ အလုပ်စားပွဲမှာပဲ တစ်နေကုန် ထိုင်နေပြီး လေ့ကျင့်ခန်းများ ပြုလုပ်ဖို့နေနေသာသာ လှုပ်လှုပ်ရှားရှားတောင် မနေဖြစ်ကြတော့ပါဘူး။

ဒီလိုမျိုး လှုပ်ရှားမှုနည်းပြီး လေ့ကျင့်ခန်းများ ပြုလုပ်မှုမရှိတဲ့ လူနေမှုဘဝဟာ အချိန်တဖြည်းဖြည်း ကြာလာသည်နှင့်အမျှ ကိုယ့်ရဲ့ကျန်းမာရေးကို ထိခိုက်စေလာနိုင်ပါတယ်။

ကွန်ပျူတာရှေ့မှာပဲ တစ်ချိန်လုံး ထိုင်နေတဲ့အတွက်ကြောင့် မျက်စိအားနည်းလာမယ်၊ ကိုယ်လက်လှုပ်ရှားမှု မရှိတဲ့အတွက်ကြောင့် အညောင်းမိလာခြင်းနှင့် အဝလွန်ခြင်းရောဂါတို့ကိုပါ ကြုံတွေ့ရနိုင်ပါတယ်။

အခြားသော နောက်ဆက်တွဲရောဂါတွေလည်း ရှိပါသေးတယ်။ ရောဂါဘယများ ကင်းဝေးပြီး ကျန်းမာပျော်ရွှင်တဲ့ဘဝကို ပိုင်ဆိုင်နိုင်ဖို့အတွက် အလုပ်စားပွဲမှာ တစ်နေကုန်ထိုင်ပြီးတဲ့နောက်မှာ မဖြစ်မနေပြုလုပ်သင့်တဲ့ လေ့ကျင့်ခန်းများ ရှိပါတယ်။ အခုဖော်ပြပေးမယ့် လေ့ကျင့်ခန်းများကို နေ့စဉ်ပုံမှန် ပြုလုပ်ပေးလိုက်ပါ။

လေ့ကျင့်ခန်း (၁)

ထိုင်ခုံပေါ်မှာ ခါးမတ်မတ်နဲ့ သက်သောင့်သက်သာ ထိုင်နေပါ။ ပုခုံးကို ပြေလျော့ထားပါ။ ခြေထောက်နှစ်ဖက်က ကြမ်းပြင်နဲ့ ထိကပ်နေပါစေ။ မျက်လုံးများကို ပိတ်ထားပြီး အသက်ရှူလေ့ကျင့်ခန်း ပြုလုပ်ရမှာဖြစ်ပါတယ်။ ဘယ်နှာခေါင်းပေါက်နဲ့ အသက်ရှူနေတဲ့အချိန်မှာ လက်ချောင်းများဖြင့် ညာနှာခေါင်းပေါက်ကို ပိတ်ထားပါ။ တစ်ဖန် ညာနှာခေါင်းပေါက်နဲ့ အသက်ရှူတဲ့အခါ ဘယ်နှာခေါင်းပေါက်ကို ပိတ်ထားလိုက်ပါ။

ဘယ်တစ်လှည့် ညာတစ်လှည့်ကို မိမိလုပ်နိုင်သလောက် အကြိမ်ရေများများနဲ့ ပြုလုပ်ပေးရမှာဖြစ်ပါတယ်။ ဒီလေ့ကျင့်ခန်းကတော့ တစ်နေ့တာလုံး ပင်ပန်းနေတဲ့ ခန္ဓာကိုယ်ကို အညောင်းအညာပြေအောင် ကူညီပေးပြီး စိတ်ဖိစီးမှုများကို လျော့ကျအောင် ကူညီပေးပါတယ်။

လေ့ကျင့်ခန်း (၂)

စောစောကလိုပဲ ခုံပေါ်မှာ ခါးမတ်မတ်ထိုင်နေပါ။ လက်နှစ်ဖက်က ပေါင်ပေါ်မှာ တင်ထားလိုက်ပါ။ ထို့နောက် ခေါင်းကို စက်ဝိုင်းပုံသဏ္ဍာန် ဘယ်ကနေ ညာသို့ ဝိုက်ပေးလိုက်ပါ။ တစ်ဖန် ညာကနေ ဘယ်သို့ ပြန်ဝိုက်ပေးလိုက်ပါ။

ဘယ်ညာကို တစ်ကြိမ်လို့ သတ်မှတ်ပြီး စုစုပေါင်း ၅ ကြိမ် ပြုလုပ်ပေးရမှာဖြစ်ပါတယ်။ ဒီလေ့ကျင့်ခန်းက ကွန်ပျူတာကို တစ်ချိန်လုံးကြည့်နေရတဲ့သူတို့အတွက် လည်ပင်းအကြောများကို ပြေလျော့စေတဲ့ လေ့ကျင့်ခန်းများထဲက တစ်ခုပဲဖြစ်ပါတယ်။

လေ့ကျင့်ခန်း (၃)

မိမိထိုင်ခုံပေါ်မှာ ထိုင်ခုံတည့်တည့် မထိုင်ဘဲ ဘေးတစောင်း ထိုင်နေလိုက်ပါ။ ထို့နောက် ခါးကို ဘယ်ဘက်သို့ လှည့်လိုက်ပါ။ ထိုအနေအထားအတိုင်း ၅ စက္ကန့်ခန့် တောင့်ခံထားပါ။ ထို့နောက် ခန္ဓာကိုယ်ကို တည့်တည့်ပြန်ထားပါ။ ပြီးရင် ညာဘက်သို့ လှည့်လိုက်ပါ။ ၅ စက္ကန့်ခန့် တောင့်ထားပါ။

ဘယ်ညာ တစ်လှည့်စီကို တစ်ကြိမ်လို့ သတ်မှတ်ပြီး စုစုပေါင်း နှစ်ကြိမ် ပြုလုပ်ပေးရပါမယ်။ ဒီ လေ့ကျင့်ခန်းများ ပြုလုပ်နေတဲ့အချိန်မှာ အသက်ကို ဖြည်းဖြည်းမှန်မှန်ရှူပေးဖို့လည်း မမေ့ပါနဲ့။

လေ့ကျင့်ခန်း (၄)

တစ်နေကုန် ညောင်းညာနေတဲ့ ခါးကြောကို အခုဆက်လက်ဖော်ပြပေးမယ့် လေ့ကျင့်ခန်းများ နဲ့ ပြေလျော့အောင် ပြုလုပ်နိုင်ပါတယ်။ ပထမတစ်ခုကတော့ ပထမပုံအတိုင်း ကြမ်းပြင်ပေါ်မှာ လေးဖက်ထောက်နေပါ။ လက်နှစ်ဖက်က ပုခုံးအောက်တည့်တည့်မှာ ရှိရပါတယ်။

ခေါင်းက အရှေ့တည့်တည့်သို့ ကြည့်နေရင်းနဲ့ အောက်သို့ ငုံ့ချလိုက်ပါ။ ထိုအချိန်မှာ ခါးက အပေါ်သို့ မြှောက်ပေးရပါမယ်။ တစ်ဖန် ခေါင်းက အရှေ့သို့ ကြည့်တဲ့အခါ ပုံပါအတိုင်း ခါးကို ပြန်ချပေးလိုက်ပါ။ တစ်ကြိမ်လို့ သတ်မှတ်ပါ။ စုစုပေါင်း ၅ ကြိမ် ပြုလုပ်ရပါမယ်။

ဒုတိယတစ်ခုကတော့ ခုံပေါ်မှာ ထိုင်ပြီး ပြုလုပ်ရမှာဖြစ်ပါတယ်။ လက်နှစ်ဖက်က ဒူးပေါ်မှာ တင်ထားပါ။ အသက်ရှူသွင်းပြီးနောက် မျက်နှာကျက်ကို မော့ကြည့်လိုက်ပါ။ ရင်ဘတ်ကို အပေါ်သို့ ပင့်တင်ပါ။ ခါးကလည်း အလိုက်သင့်လေး ကော့ပေးရပါမယ်။

တစ်ဖန် အသက်ရှူထုတ်ကာ မျက်နှာက အောက်သို့ ပြန်လည်ငုံ့ကြည့်လိုက်ပါ။ ထိုအချိန်မှာ ခါးက ဝိုင်းဝိုင်းလေးဖြစ်သွားရပါမယ်။ စုစုပေါင်း ၅ ကြိမ် ပြုလုပ်ရပါမယ်။

လေ့ကျင့်ခန်း (၅)

စားပွဲခုံရှေ့မှာ မတ်တပ်ရပ်နေပါ။ စားပွဲပေါ်မှာ ပစ္စည်းပစ္စယများ ရှင်းထားပါ။ ထို့နောက် ခြေထောက်တစ်ဖက်ကို စားပွဲခုံကို တင်ထားလိုက်ပါ။ ပြီးရင်တော့ ခန္ဓာကိုယ်အပေါ်ပိုင်းကို အရှေ့သို့ ကိုင်းချလိုက်ပါ။ ကိုယ့်ရဲ့ ခါးအနေအထားက စောင့်စောင်းလေးဖြစ်နေရပါမယ်။ ထိုအနေအထားအတိုင်း ၁၅ စက္ကန့်ခန့် တောင့်ထားပါ။

ပြီးရင်တော့ နောက်ခြေထောက်တစ်ဖက်ပြောင်းကာ နောက်ထပ် ၁၅ စက္ကန့်ခန့် ပြုလုပ်ပေးရပါမယ်။ ညောင်းညာနေတဲ့ တင်ပါးနဲ့ ခါးကို ဒီ လေ့ကျင့်ခန်းများက ပြေလျော့သွားအောင် ကူညီပေးပါလိမ့်မယ်။

လေ့ကျင့်ခန်း (၆)

အရင်ဦးဆုံး ကြမ်းပြင်ပေါ်မှာ ထိုင်နေပါ။ ထို့နောက် ခြေဖဝါးနှစ်ဖက်ကို ထိကပ်ပေးလိုက်ပါ။ ခြေဖဝါးနှစ်ဖက် ထိကပ်နေချိန်မှာ ပေါင်အရင်းကလည်း ကြမ်းပြင်ကနေ ကြွလို့မရပါဘူး။ ကြမ်းပြင်နဲ့ ထိကပ်ပေးနေရပါမယ်။ ထိုအနေအထားအတိုင်း စက္ကန့် ၃၀ ခန့် ပြုလုပ်ပါ။ အသက်ကို ပုံမှန်အတိုင်း ရှူသွင်း ရှူထုတ်ပြုလုပ်ပေးဖို့လည်း မမေ့ပါနဲ့။

ဒီလေ့ကျင့်ခန်းတွေက မိနစ်အနည်းငယ်ခန့် အချိန်ပေးရုံမျှဖြင့် အလွယ်လေး ပြုလုပ်နိုင်တဲ့ လေ့ကျင့်ခန်းတွေဖြစ်တာကြောင့် အလုပ်လုပ်ပြီးတိုင်းမှာ မမေ့မလျော့ ပြုလုပ်ကြဖို့ အကြံပေးချင်ပါတယ်။

Source: Brightside.me