အိပ်စက်ခြင်းဟာ ကုန်ကျအနည်းဆုံး ဇိမ်ခံမှုပါပဲ။ ဒါပေမဲ့လည်း လူတိုင်းတော့ ဒီဇိမ်ခံမှုကို မခံစားနိုင်ပါဘူး။ တစ်ခါတလေမှာ နှစ်နှစ်ခြိုက်ခြိုက် အိပ်ပျော်ဖို့အတွက် ဆေးဝါးသုံးတာထက် တချို့နည်းလမ်းတွေက ပိုထိရောက်မှုရှိပါတယ်။
အခုပြောမှာကလည်း အိပ်ရာထဲ ရောက်ပြီး တလူးလူး တလှိမ့်လှိမ့် ဖြစ်တတ်သူတို့အတွက် အဖိုးတန်တဲ့ နည်းလမ်းတချို့ပဲ ဖြစ်ပါတယ်။
(၁) အကြောလျှော့လေ့ကျင့်ခန်း
အိပ်ပျော်ဖို့ ကြိုးစားရင်း နာရီပေါင်းများစွာ ကြာအောင် အိပ်လို့မပျော်ဖြစ်နေရင် ကြွက်သား ကစားပေးသင့်ပါတယ်။ ကြွက်သားတွေကို ခြေချောင်းကနေ နဖူးအထိ အကုန်လုံး လျှော့ချပေးတာ ဖြစ်ပါတယ်။ ပြီးရင် ကြွက်သားထု တစ်စုစီကို ၅ စက္ကန့်ကြာအောင် တင်းထားပြီး ပြန်လျှော့ကြည့်ပါ။ အကြောပြေလျော့ပြီး အိပ်ချင်လာပါလိမ့်မယ်။
နောက်တစ်နည်းကတော့ လက်ဖဝါးအောက်မှာရှိတဲ့ အကြောလေးတွေ လျှော့တဲ့နည်းပါ။ လက်ဖဝါးဖြန့်ထားပါ။ လက်ခုံအောက်က အလယ်လောက်မှာရှိတဲ့ အကြောလေးကို လက်မနဲ့ ဖိပြီး စက်ဝိုင်းပုံ ဒါမှမဟုတ် အထက်အောက် ၂ မိနစ်ကနေ ၃ မိနစ် ငြင်ငြင်သာသာလေး ဖိပေးပါ။ ကြွက်သားတွေ ပြေလျော့လာရင် နောက်လက်တစ်ဖက်ကို ပြောင်းနှိပ်ကြည့်ပါ။
(၂) အခန်းကို အေးအောင် ထားခြင်း
အိပ်မက်ဆိုးတွေ မမက်ချင်ရင် အခန်းအပူချိန်ကို အေးနေအောင်ထားဖို့ အကြံပေးချင်ပါတယ်။ အကောင်းဆုံး အိပ်ခန်းအပူချိန်ဟာ ၁၈.၃ ဒီဂရီ စင်တီဂရိတ်ဖြစ်ပါတယ်။ ဆရာဝန်တွေကတော့ ၁၅.၅ ဒီဂရီ စင်တီဂရိတ်ကနေ ၁၉.၄ ဒီဂရီ စင်တီဂရိတ်အတွင်း ထားအိပ်ဖို့ အကြံပြုလေ့ရှိပါတယ်။ ခန္ဓာကိုယ်ဟာ ကောင်းကောင်း အိပ်စက်နိုင်ဖို့ အပူချိန်လျှော့ချပေးဖို့ လိုပါတယ်။
(၃) ကြမ်းပေါ် ခြေချအိပ်ခြင်း
တစ်ခါတလေ အိပ်ဖို့ကြိုးစားရင်း ခေါင်းထဲ မူးရီလာတတ်ပါတယ်။ အဲဒီလို အိပ်ခါနီး ခေါင်းထဲမူးနောက်နောက်ဖြစ်နေရင် ခြေတစ်ဖက်ကို ကြမ်းပြင်ပေါ် ချထားပါ။ ဒီအနေအထားဟာ ဦးနှောက်ကို ပြန်တွက်ချက်မှုလုပ်စေပြီး မူးနောက်တာတွေ ပျောက်သွားစေနိုင်ပါတယ်။
(၄) ညနေ ၃ နာရီနောက်ပိုင်း မအိပ်ပါနဲ့
တစ်မှေးအိပ်တာ ကျန်းမာရေးအတွက် ကောင်းပေမယ့် ညနေ ၃ နာရီကျော်ရင် ကျောမခင်းမိဖို့ လိုပါတယ်။ တစ်မှေးအိပ်ချိန် ကြာလေလေ ညဘက် အိပ်မပျော်နိုင် ဖြစ်လေလေပါပဲ။ နေ့လည်နေ့ခင်း ခဏလေး အိပ်မယ်ဆိုရင်လည်း တိတ်ဆိတ်အေးမြတဲ့အခန်းထဲမှာ အိပ်ပါ။
(၅) ဗိုက်ထဲရောက်အောင် အသက်ရှုပါ
ဒီလေ့ကြည့်ခန်းကို ၄-၇-၈ အသက်ရှူနည်းလို့ ခေါ်ပါတယ်။ ဗိုက်အားကို ယူပြီး အသက်ရှုတဲ့ပုံစံပါ။ နှာခေါင်းကနေ ၄ စက္ကန့်ကြာအောင် အသက်ကိုဆွဲရှုပါ။ ဗိုက်ပါ မြင့်တက်လာပါစေ။ ၇ စက္ကန့်ကြာအောင် အသက်ကို အောင့်ထားပြီး အသက်ရှုထုတ်ချိန်မှာ ၈ စက္ကန့် ကြာပါစေ။ ဒါမျိုး လေးကြိမ် စမ်းကြည့်ပါ။
(၆) မအိပ်ခင် စာရေးပါ
စာအုပ်နဲ့ ဒိုင်ယာရီရေးတာမျိုးကို ပြောတာပါ။ အိပ်ရာမဝင်ခင် ၁၅ မိနစ် / မိနစ် ၂၀ လောက် အချိန်ယူပြီး တစ်နေ့တာကြုံခဲ့တဲ့ ခံစားချက်နဲ့ အဖြစ်အပျက်တွေကို ဒိုင်ယာရီအဖြစ် ချရေးပြီးမှ အိပ်ကြည့်ပါ။
(၇) စကားလုံးအား သုံးကြည့်ပါ
စကားလုံးတွေရဲ့ အင်အားနဲ့ အိပ်မရမှုကို အနိုင်ယူတဲ့နည်းလမ်းတွေလည်း ရှိပါတယ်။ အိပ်လို့မပျော်ဘူး ဖြစ်နေသူတွေဟာ ၁၀ စက္ကန့်လောက် ကြာအောင် “မစဉ်းစားဘူး မစဉ်းစားဘူး” လို့ ထပ်တလဲလဲ ပြောပေးပါ။
၁၂ ကြိမ်လောက် ၂ မိနစ်စာ ပြောပြီးရင် အိပ်ချင်လာတတ်တယ်လို့ ဆိုပါတယ်။ တချို့ကလည်း “မအိပ်လိုက်နဲ့” လို့ ကိုယ့်ကိုယ်ကိုယ် ပြောနေရင် အိပ်ပျော်သွားပါတယ်။ ဒါကတော့ လေ့ကျင့်ထားရင် ပိုသိသာပါလိမ့်မယ်။
Source: BrightSide
