အသက် ၄၀ ကျော်အမျိုးသမီးများအတွက် လွယ်ကူထိရောက်တဲ့ လေ့ကျင့်ခန်း ၅ မျိုး

ကျန်းမာရေးပိုကောင်းပြီး သွက်လက်စေဖို့၊ ကြွက်သားတွေ သန်မာစေဖို့နဲ့ body ထိန်းချင်တဲ့ သက်ကြီးပိုင်း အမျိုးသမီးများအတွက် လုပ်ရတာလွယ်ကူပြီး ထိရောက်မှုလည်းရှိတဲ့ လေ့ကျင့်ခန်း ၅ မျိုးကို မျှဝေပေးလိုက်ပါတယ်။ အသက် ၄၀ ကျော် အမျိုးသမီးများအတွက် အထူးသင့်တော်ပါတယ်။

Squats

ပုံမှာပြထားတဲ့အတိုင်း squats ထိုင်တဲ့ လေ့ကျင့်ခန်း လုပ်ပေးရုံပါပဲ။ တစ်နေ့ကို အနည်းဆုံး ၁၅ ကြိမ်ကနေ အကြိမ် ၃၀ အထိ လုပ်ပေးနိုင်ပါတယ်။ အဓိကကတော့ ခါးကုန်းလို့မရပါဘူး။ ပုံမှာပြထားတဲ့အတိုင်း မတ်ထားရပါမယ်။

Plank

Plank ထောက်ပေးတာကတော့ ဗိုက်အဆီတွေ သိသိသာသာကို ကျသွားစေတဲ့ လေ့ကျင့်ခန်းဖြစ်ပါတယ်။ စက္ကန့် ၆၀ မှ စက္ကန့် ၉၀ အထိ လုပ်ပေးနိုင်ပါတယ်။ စစလုပ်ချင်းမှာ စက္ကန့် ၆၀ အထိရအောင်မနေနိုင်ရင် စက္ကန့် ၃၀ လုပ် ခဏရပ်၊ ပြီးရင် စက္ကန့် ၃၀ ထပ်လုပ်ပါ။ နောက်ပိုင်းလုပ်ရင်းနဲ့ ရသွားပါလိမ့်မယ်။ ဒီလေ့ကျင့်ခန်းကိုတော့ နေ့တိုင်းလုပ်စရာ မလိုပါဘူး။ တစ်ပတ်မှာ ၃ ရက် လုပ်ပေးရင် ရပါပြီ။

Glute Bridge

ပုံမှာပြထားတဲ့အတိုင်း ခြေဖဝါးနှစ်ဖက်က ကြမ်းပြင်နဲ့ကပ်၊ လက်နဲ့ ခန္ဓာကိုယ်ကိုလည်း ကြမ်းပြင်နဲ့ကပ်ထားပါ။ ပြီးရင် ဒုတိယပုံထဲကလို တင်ပါးနဲ့ ကျောကို အပေါ်ကော့လိုက်ပါ။ ပြီးရင် ပထမပုံထဲကလို ပြန်နေပါ။ ပြီးရင် အပေါ်ကိုပြန်ကော့ပါ။ အဲ့အတိုင်း အကြိမ် ၃၀ လုပ်ပေးရုံပါပဲ။ အရမ်းလွယ်ပါတယ်။

Elliptical machine

Elliptical machine နဲ့ လေ့ကျင့်ခန်းလုပ်ပေးခြင်းက အသက် ၄၀ ကျော် အမျိုးသမီးများရဲ့ နှလုံးကျန်းမာရေးအတွက် အရမ်းကောင်းပါတယ်။ ဒါ့အပြင် ကယ်လိုရီနဲ့ အဆီပိုတွေ ကျစေပြီး အရိုးအဆစ်တွေ သန်မာစေတယ်။ စိတ်ဖိစီးမှုတွေ လျော့ကျစေပါတယ်။ တစ်ခါလုပ်ရင် အနည်းဆုံး မိနစ် ၃၀ ကြာ လုပ်ပေးရမှာပါ။ တစ်ပတ်ကို ၃ ကြိမ်လုပ်ပေးရင် ရပါပြီ။

လမ်းလျှောက်ခြင်း

အရိုးရှင်းဆုံးနဲ့ အလွယ်ကူဆုံး လေ့ကျင့်ခန်းကတော့ မနက် (သို့) ညနေဘက်မှာ လမ်းလျှောက်ထွက်တာပါပဲ။ နေ့တိုင်း တစ်နေ့ကို အနည်းဆုံး မိနစ် ၃၀ လောက် လမ်းလျှောက်ပေးခြင်းက ကျန်းမာရေးအတွက် အရမ်းကောင်းပါတယ်။ သက်လုံလည်း ပိုကောင်းလာစေတယ်၊ အဆီလည်းကျစေပါတယ်။ ရေကူးရတာကြိုက်တဲ့သူဆိုရင် ရေကူးပေးလို့လည်း ရပါတယ်။