အပြင်မှာပါ အခင်ဆုံး သူငယ်ချင်းတွေဖြစ်ကြတဲ့ ကိုးရီးယား စတားတွေက ဘယ်သူတွေဖြစ်မလဲ??

ဘဝမှာ အခင်ဆုံး၊ အရင်းနှီးဆုံး၊ အယုံကြည်ရဆုံး သူငယ်ချင်းတွေကို ပိုင်ဆိုင်ထားသူတွေက ကံကောင်းသူတွေဖြစ်ပါတယ်။ ဘာလို့လဲဆိုတော့ သူငယ်ချင်းအရင်းကြီးကိုမှ နောက်ကြော ဓားနဲ့ထိုးတဲ့သူရှိသလို ၊ မတွေ့တာကြာတော့ စိမ်းကားသွားသူတွေ၊ လိမ်တတ်သူတွေ ဒုနဲ့ ဒေးပါပဲ။ ကိုးရီးယားနာမည်ကျော်တွေအတွက်တော့ အချိန်တိုင်း အလုပ်များနေတတ်ကြပြီး သူငယ်ချင်းအတွက်၊ မိသားစုအတွက်၊ အချစ်ရေးအတွက် အချိန်မပေးနိုင်သလောက်ပါပဲ။ ဒါပေမဲ့ ဒီလိုခက်ခဲတဲ့အချိန်ဇယားတွေကြားကပဲ အခင်ဆုံးသူငယ်ချင်းတွေကို ပိုင်ဆိုင်ထားကြတဲ့ ကိုးရီးယားနာမည်ကျော်တွေလည်း ရှိပါတယ်။

ဒီတစ်ခေါက်မှာတော့ အချိန်အကြာကြီး သူငယ်ချင်းအနေနဲ့ ပေါင်းလာခဲ့ပြီး တကယ်ကို ခင်မင်ရင်းနှီးကြတဲ့ ကိုးရီးယားစတားတွေကို ဖော်ပြပါရစေ။

1.Park Seo-joon နဲ့ Choi Woo-shik

Park Seo-joon နဲ့ Choi Woo-shik ရဲ့ Bromance Friendship ကတော့ KBS2 Show ဖြစ်တဲ့ “Family” မှာ စတင်ခဲ့တာပါ။

၈ နှစ်ကျော်ကြာ သူငယ်ချင်းကောင်းတွေဖြစ်ခဲ့တဲ့ သူတို့နှစ်ယောက်က ခရီးတွေ၊ Program Show တွေမှာလည်း အတူတူ ပါဝင်တတ်သူတွေ ဖြစ်ပါတယ်။

တစ်ယောက် ဇာတ်ကားရိုက်တိုင်း တစ်ယောက်က Food Truckတွေ ပို့ပေးကာ အပြန်အလှန် Support ပေးတတ်တဲ့ သူငယ်ချင်းနှစ်ဦး ဖြစ်ပါတယ်။ ဒါ့အပြင် သူတို့နှစ်ဦးရဲ့ တခြားအခင်ဆုံးသူငယ်ချင်းတွေဖြစ်တဲ့ V, Peakboy, Park Hyung-sik တို့နဲ့အတူ နာမည်ကျော် Wooga Squad ကို ဖွဲ့စည်းထားကြပါတယ်။

2.IU နဲ့ Yoo In-na

သီချင်းအေးအေးလေးတွေကို နတ်သမီး အသံနဲ့ သီဆိုတတ်တဲ့ IU နဲ့အတူ Goblin, Touch your heart စတဲ့ ဇာတ်ကားတွေနဲ့ နာမည်ကြီးလာတဲ့ Yoo In-na က အပြင်မှာလည်း အခင်ဆုံးသူငယ်ချင်းတွေပါ။

တစ်တိုက်တည်းမှာ အတူတူနေတဲ့ သူတို့နှစ်ဦးက ဥရောပကိုလည်း အတူတူခရီးထွက်ခဲ့ကြတဲ့ အခင်ဆုံးသူငယ်ချင်းတွေ ဖြစ်ပါတယ်။

ဒါ့အပြင် ချစ်သူများနေ့မှာ Friendship rings လဲကြတဲ့ IU နဲ့ Yoo In-na က သူငယ်ချင်းကောင်းတွေဆိုတာ သိသာလွန်းပါတယ်။ သူငယ်ချင်းနှစ်ဦးက ဘယ်လောက်ပဲ အလုပ်များပါစေ တစ်ယောက်အပေါ် တစ်ယောက် အချိန်ပေးတတ်ကြတဲ့အပြင် IU က Yoo In-na အတွက် “You” ဆိုတဲ့ သီချင်းကိုပါ ရေးဖွဲ့သီဆိုခဲ့ပါသေးတယ်။

3.Song Joong-ki နဲ့ Lee Kwang-soo

တစ်ယောက်ဇာတ်ကားမှာ တစ်ယောက် ဧည့်သည်သရုပ်ဆောင်အနေနဲ့ ပါဝင်ပေးတတ်ကြတဲ့ Song Joong-ki နဲ့ Lee Kwang-soo က သူငယ်ချင်းကောင်းတွေဆိုတာကိုတော့ သင်သိပြီး ဖြစ်မှာပါ။

Song Joong-ki အနေနဲ့ လက်ထပ်ဖို့ ဆုံးဖြတ်လိုက်တဲ့ အချိန်တုန်းကဆိုရင် Kwang-soo က သစ္စာဖောက်ခံလိုက်ရတယ်ထင်မှာ ကြောက်နေခဲ့ပါတယ်တဲ့။ Song Joong-ki က DOTS ရိုက်ကွင်းမှာ Joong-ki ♡ Kwang-soo (Asian Prince) ဆိုတဲ့ စာသားကိုပါ အမှတ်တရ ရေးခဲ့ပါသေးတယ်။

4.Song Hye Kyo နဲ့ Yoo Ah In

ယောက်ျားလေးနဲ့ မိန်းကလေးက Best Friend မဖြစ်နိုင်ဘူးဆိုတဲ့ စကားကို ချေပထားတဲ့နှစ်ဦးကတော့ Song Hye Kyo နဲ့ Yoo Ah In ပါ။

သူငယ်ချင်းနှစ်ဦးက အချိန်တိုင်း အချင်းချင်း Support ပေးသူတွေ ဖြစ်ပါတယ်။ သူတို့နှစ်ဦးရဲ့ ပုံတွေကို Instagram မှာတင်တတ်ပြီး တစ်ယောက်ရဲ့ Activity တွေကို တစ်ယောက်က ပံ့ပိုးပေးတတ်ကြတဲ့ အခင်ဆုံး သူငယ်ချင်းတွေ ဖြစ်ပါတယ်။

5.Lee Min-ho နဲ့ Jung Il-woo

နှစ်ယောက်လုံးက အသောက်အစား သိပ်မရှိတာကြောင့် အတူဆုံတိုင်း ကဖီးဆိုင်တွေမှာပဲ ဆုံလေ့ရှိတဲ့ သူငယ်ချင်းနှစ်ဦးက Lee Min-ho နဲ့ Jung Il-woo ပါ။

ဒီသူငယ်ချင်းနှစ်ယောက်က အောင်မြင်တဲ့ မင်းသားတစ်လတ်ဖြစ်ဖို့ဆိုတဲ့ အိပ်မက်ကို တူညီစွာ ထားရှိခဲ့သူတွေပါ။ Jung Il-woo ကတော့ Show တစ်ခုမှာ “Lee Min-ho နဲ့ ကျွန်တော်က ဆန့်ကျင်ဘက်တွေဗျ၊ နှစ်ယောက်တူတာဆိုလို့ စားပြီး ဗိုက် စတင်းတဲ့အချိန်ပဲ ရှိတယ်” လို့ ပြောဖူးပါတယ်။