သင်က အဝတ်အစား ရွေးချယ်တဲ့နေရာမှာ သက်တောင့်သက်သာ ဖြစ်တာကိုပဲ ပိုရွေးချယ်လေ့ ရှိတယ်ဆိုရင်တော့ ဒီအကြောင်းအရာက သင့်အတွက် ဖြစ်မှာပါ။ ပျိုမေအများစုက အပြင်သွားခါနီး အဝတ်ဗီရိုကို ဖွင့်ကြည့်လိုက်တာနဲ့ ဘာဝတ်ရမလဲ တိုင်ပတ်တတ်ပါတယ်။ ရာသီဥတု အခြေအနေနဲ့ အဆင်ပြေပါ့မလား၊ သွားတဲ့နေရာနဲ့ သင်ဝတ်မယ့် အင်္ကျီနဲ့ အဆင်ပြေပါ့မလား အမျိုးမျိုး စဉ်းစားရတာ အလုပ်တစ်ခုပါပဲ။ သင့်အတွက် အရေးအကြီးဆုံး အရာက သက်တောင့်သက်သာ ဖြစ်နေဖို့ပါ။ ဒါပေမယ့် သက်တောင့်သက်သာ ဖြစ်လွန်းတဲ့ အဝတ်အစား အများစုက စတိုင်မကျတာမျိုး ဖြစ်တတ်ပါတယ်။

ဒီတစ်ခေါက်မှာတော့ သက်တောင့်သက်သာ ဖြစ်စေမယ့်အပြင် လှလည်း လှနေစေမယ့် ဖက်ရှင်အတွဲအစပ်တွေကို ဖော်ပြပါရစေ။ ဖက်ရှင် အတွဲအစပ်အပြင် ဖိနပ်နဲ့ ဘယ်လိုတွဲဖက်မလဲ၊ ဘယ်အရောင်နှစ်မျိုးကို တွဲဝတ်သင့်လဲ သိချင်တယ်ဆိုရင်တော့ ဆက်ကြည့်လိုက်ပါနော်-

၁။ အဖြူအမည်း အပွ

အင်္ကျီလက်ပြတ်တွေက အောက်ဘက် ဘောင်းဘီအပွနဲ့ လိုက်ဖက်ပါတယ်။ သင်က ဗိုက်ခဏခဏ ဖောင်းပြီး ဗိုက်နေရာမှာ အဆီရှိသူဆိုရင် အောက်ဘက်ကားသွားတဲ့ အင်္ကျီမျိုးနဲ့ အဆင်ပြေပါလိမ့်မယ်။ ဖိနပ် ရွေးချယ်တဲ့အခါ အပေါ် အင်္ကျီနဲ့ အရောင်တူတာမျိုးကို ရွေးသင့်ပါတယ်။

၂။ အရောင်တွဲစပ်မှု

အပြာအနု၊ အစိမ်းအနု စတဲ့ ဝတ်စုံတွေက သင့်ကို အထက်တန်းဆန်ဆန် အရောင်မျိုး ပေးစွမ်းတတ်ပါတယ်။ အပြာအနုက အောက်ဘက် ဘောင်းဘီ အသားရောင်မျိုးနဲ့ လိုက်ဖက်ပါတယ်။ ဒီလို ဖက်ရှင်စတိုင်မျိုးက ပေါ့ပေါ့ပါးပါးနဲ့ Cozy Vibe မျိုးကို ပေးပါတယ်။

၃။ အင်္ကျီလက်ရှည်နဲ့ ဘောင်းဘီအပွ

အပေါ်အောက် အရောင်အနုက အေးအေးဆေးဆေးနေတတ်တဲ့ ပျိုမေတို့နဲ့ လိုက်ဖက်ပါတယ်။ အင်္ကျီပန်းရောင်အနုနဲ့ အသားရောင် ဘောင်းဘီအပွကလည်း အလိုလိုနေရင်း ကြိုးစားစရာမလိုဘဲ စတိုင်ကျပါတယ်။

၄။ အသားရောင်စကပ်ရှည်

စကပ်ရှည်တွေကလည်း သက်တောင့်သက်သာ ဖြစ်တဲ့ ဖက်ရှင်ပါပဲ။ ဒါနဲ့အတူ အရောင်နီးစပ်တဲ့ အပေါ် တီရှပ်မျိုးကို ဝတ်နိုင်ပါတယ်။

၅။ ဂါဝန်ရှည်

ဂါဝန်ရှည်ကိုမှ ပိုလှသွားအောင် ရင်ဘတ်နေရာမှာ အကျယ်လေး ထားသင့်ပါတယ်။ လည်ပင်းနဲ့ ရင်ဘတ်ကို အသားပေးလိုက်တဲ့အခါ ခါးပိုသေးတယ် ထင်ရစေပါလိမ့်မယ်။ ဒါ့အပြင် သက်တောင့်သက်သာလည်း ရှိပါတယ်။

၆။ Dark Washed Jean

ဂျင်းကိုမှ အရောင်အရင့် ဝတ်မယ်ဆိုရင် အပေါ်အင်္ကျီကို အဖြူရောင်လေးတွေပဲ ဝတ်သင့်ပါတယ်။ အပေါ်အောက် အရောင် ဆင်တူ ဖြစ်တာမျိုးကို သတိထားသင့်ပါတယ်။

၇။ ပေါ့ပေါ့ပါးပါး အင်္ကျီအသား

အပေါ်အောက် အပွဝတ်တဲ့အခါ အပေါ် အင်္ကျီကို ကိုယ်ကျပ်မဟုတ်ဘဲ ပုံထဲကလို အသားပါးပါး ပွပွမျိုးကို ရွေးသင့်ပါတယ်။ ဒီလိုဆိုရင် ဘောင်းဘီထဲ ထည့်ဝတ်ပြီး စတိုင်ကျကျ လှနိုင်ပါပြီ။

Photo Source: Pinterest

By MyStyle Myanmar