မင်္ဂလာပျိုမေတို့ရေ။ Acne Prone Skin လို့ခေါ်တဲ့ ဝက်ခြံထွက်လွယ်တဲ့ အသားအရေရှိသူတွေဟာ အဆီပြန်ပြီး အရေပြား Sensitive ဖြစ်တတ်တာမို့ Skincare ပစ္စည်းတွေရွေးချယ်ရာမှာ အရမ်း သတိထားရပါတယ်။ ကိုယ်နဲ့မတည့်တဲ့ Skincare တွေသုံးမိတဲ့အခါ ဝက်ခြံပိုထွက်ပြီး အသားအရေ ပိုဆိုးနိုင်တာကြောင့် သဘာဝပါဝင်ပစ္စည်းတွေနဲ့ လုပ်ထားတဲ့ ပေါ့ပေါ့ပါးပါး Skincare တွေ သုံးပေးရင်တော့ အကောင်းဆုံးပါပဲ။
ဒီတစ်ခေါက်မှာ Acne Prone အသားအရေရှိသူတွေအတွက် ဈေးကြီးပေးဝယ်စရာမလိုဘဲ သဘာဝအတိုင်း ကိုယ်တိုင်လုပ်နိုင်တဲ့ DIY Serum တွေအကြောင်းကို ဖော်ပြပေးလိုက်ပါတယ်။ Serum ဆိုတဲ့အတိုင်း အသားအရေကို အရေးအကြောင်းကင်းကာ Glow စေမယ့်အပြင် သဘာဝပစ္စည်းတွေနဲ့ ပြုလုပ်နိုင်တာဖြစ်လို့ ဘေးထွက်ဆိုးကျိုးလည်း နည်းစေမှာပါ။
၁။ Vitamin C အမှုန့်နဲ့ နှင်းဆီပေါင်းခံရည်
ဒီ Serum အတွက် Vitamin C အမှုန့်ရဖို့ လိမ္မော်သီးအခွံတွေကို နေလှန်းပြီး Blender နဲ့ကြိတ်ပေးပါ။ ရလာတဲ့ အမှုန့်ကို သုံးဇွန်းခန့်ယူပြီး နှင်းဆီပေါင်းခံရည် နှစ်ဇွန်းနဲ့ ရောပေးရမှာဖြစ်ပါတယ်။ ပြီးရင်တော့ ရေမစိုတဲ့ ပုလင်း အသန့်တစ်လုံးထဲမှာထည့်ပြီး သိမ်းထားနိုင်ပါတယ်။ မနက်ပိုင်း Moisturizer မလိမ်းခင် သုံးနိုင်ပြီး မျက်နှာပေါ်က ဆဲလ်သေတွေကိုပါ ဖယ်ရှားပေးပါလိမ့်မယ်။
၂။ မုန်လာဥနီအရည်နဲ့ Essential Oils
မုန်လာဥနီက Vitamin A အရင်းအမြစ်တစ်ခုဖြစ်ပြီး အသားအရေကိုနုပျိုတင်းရင်းစေတဲ့ အာနိသင်ရှိပါတယ်။ မုန်လာဥနီအရည်အနည်းငယ်ထဲကို နှင်းဆီအဆီ၊ လာဗင်ဒါအဆီ၊ စပျစ်သီးစေ့အဆီနဲ့ Tea Tree အဆီစတဲ့ Essential Oil တစ်မျိုးကို (၅) စက်ခန့် ရောပြီး ပုလင်းတစ်လုံးထဲထည့်ပေးထားပါ။ ညဘက်မအိပ်ခင် သုံးဖို့ သင့်တော်တဲ့ သဘာ၀ Serum လေးဖြစ်ပါတယ်။
၃။ သံလွင်ဆီ၊ ကြက်ဆူဆီ၊ Tea Tree Oil ၊ နနွင်းမှုန့်
ပန်းကန်အသန့်တစ်လုံးထဲမှာ သံလွင်ဆီတစ်ဇွန်း၊ ကြက်ဆူဆီနဲ့ Tea Tree Oil (သို့) လာဗင်ဒါအဆီ (၃) စက်ခန့်နဲ့အတူ သဘာ၀ နနွင်းမှုန့် အနည်းငယ်ထည့်ပြီးရောမွှေပေးပါ။ သူ့ကိုလည်း Serum ထည့်တဲ့ ပုလင်းအသန့်တစ်လုံးထဲမှာထည့်ထားပြီး ညဘက်အိပ်ရာမဝင်ခင် မျက်နှာသစ်ပြီးနောက် အနည်းငယ် လိမ်းပေးနိုင်ပါတယ်။
၄။ Tea Tree Oil နဲ့ ရှားစောင်းလက်ပက်
Tea Tree Oil က မျက်နှာပေါ်က မလိုအပ်တဲ့ အညစ်အကြေးနဲ့ဘက်တီးရီးယားတွေကို ဖယ်ရှားပေးပြီး ဝက်ခြံသက်သာစေတာကြောင့် Acne Prone Skin အတွက် အရမ်းအသုံးဝင်ပါတယ်။ Tea Tree အဆီ အစက် (၂၀) ခန့်ကို နှင်းဆီပေါင်းခံရည်အနည်းငယ်၊ ရှားစောင်းလက်ပက်လေးဇွန်းတို့နဲ့ရောပြီး Serum အရည်ရတဲ့အထိ မွှေပေးပါ။ ပုလင်းတစ်လုံးထဲထည့်ပြီး နေရောင်တိုက်ရိုက်မထိတဲ့နေရာမှာ သိမ်းထားပေးပါ။ မနက်ပိုင်း Skincare တွေနဲ့ အတူအသုံးပြုနိုင်ပါတယ်။
Photo Source: Pinterest
By MyStyle Myanmar
