ပျိုမေတို့မင်္ဂလာပါနော်။ မတူညီတဲ့ယောဂကျင့်စဉ်အမျိုးမျိုးက အလှအပ၊ ခန္ဓာကိုယ်ကျန်းမာရေးနဲ့ စိတ်ကျန်းမာရေးစတဲ့ ခေါင်းအစခြေအဆုံးကျန်းမာရေးရူ့ထောင့်မျိုးစုံအတွက် အသုံးဝင်စေတာကိုတော့ ပျိုမေတို့ သိကြမယ်ထင်ပါတယ်နော်။ အချို့သောယောဂပုံစံတွေက ဆံသားအုံထူပြီး ရှည်လာဖို့အတွက်ပါ ထောက်ပံ့ပေးနိုင်တာမို့ ဒီတစ်ခေါက်မှာ အကုန်အကျလည်းနည်းပြီး ထွေထွေထူးထူးထိန်းသိမ်းစရာမလိုတဲ့ ဆံသားထူထူလေးတွေလိုချင်တဲ့ ပျိုမေတို့ စမ်းလုပ်ကြည့်သင့်တဲ့ ယောဂပြုလုပ်နည်း (၅) မျိုးကိုမျှဝေပေးပါရစေ။ အချိန်သိပ်ပေးဖို့မလိုဘဲ လုပ်ရလည်းလွယ်တဲ့ယောဂပုံစံလေးတွေဖြစ်တာကြောင့် ပုံမှန်လေးလုပ်ပေးမယ်ဆိုရင် ဆံသားအုံထူပြီး ဆံပင်အကျွတ်နည်းစေဖို့အတွက်ပါ ကူညီပေးမှာပါ။
၁။ Downward-Facing Dog Pose
ပထမကျင့်စဉ်ကတော့ ပုံမှာပြထားတဲ့အတိုင်း ခန္ဓာကိုယ်ကို ရှေ့ဘက်ကုန်းကာ လက်တွေကိုကြမ်းပြင်မှာထောက်ထားပေးရမှာဖြစ်ပါတယ်။ ဒီယောဂပုံစံက သင့်ဦးနှောက်ဆီကို သွေးလည်ပတ်မှုကောင်းစေကာ ဟော်မုန်းညီမျှစေတဲ့အပြင် ဦးရေပြားနဲ့ ဆံသားမွှေးညှင်းပေါက်တွေကို ကျန်းမာသန်စွမ်းစေပြီး ဆံပင်အရှည်မြန်လာစေဖို့ကူညီပေးနိုင်မှာပါ။
၂။ Child’s Pose
စိတ်ဖိစီးမှုလျော့ပြီး အာရုံစိုက်နိုင်စွမ်းမြှင့်တင်ပေးနိုင်တဲ့ ပေါ့ပေါ့ပါးပါးအကြောလျှော့ ယောဂလေ့ကျင့်ခန်းတစ်ခုဖြစ်ပါတယ်။ သူကအာရုံကြောစနစ်လည်ပတ်မှုကောင်းစေတာကြောင့် သင့်ဦးရေပြားနဲ့ဆံသားကျန်းမာရေးကိုထောက်ပံ့ပေးနိုင်မှာပါ။ ပုံပါအတိုင်း ခြေမနှစ်ခုကိုကပ်ထားပြီး ခန္ဓာကိုယ်အပေါ်ပိုင်းနဲ့လက်နှစ်ဖက်ကို အရှေ့ဆန့်ထုတ်ထားရမှာပါ။ ဒီပုံစံအတိုင်း မိနစ်အနည်းငယ်ထားပြီး ပြုလုပ်ပေးပါ။
၃။ Breathing Practice
တရားထိုင်သလို စိတ်ရောကိုယ်ပါ သက်တောင့်သက်သာအနေအထားထိုင်ပြီး ဖြေးဖြေးမှန်မှန် အသက်ရှုလေ့ကျင့်ခန်းလုပ်ပေးတာက ကိုယ်တွင်းသွေးလည်ပတ်မှုအားကောင်းစေတဲ့အပြင် စိတ်တည်ငြိမ်ကာ ခေါင်းကြည်စေပါတယ်။ ဆံပင်ကျွတ်ခြင်းကိုဖြစ်စေတဲ့ ဟော်မုန်းမညီမျှခြင်းတွေကိုပါပြုပြင်ပေးနိုင်တာကြောင့် သင့်ကိုဆံပင်အထူမြန်စေဖို့ကူညီပေးရာရောက်မှာပါ။
၄။ Shoulder Stand
ပုံပါအတိုင်း ရင်ဘတ်ကနေ ခန္ဓာကိုယ်အောက်ပိုင်းတစ်ခုလုံးကို ၉၀ ဒီဂရီမတ်ပြီး အပေါ်မြှောက်ကာ ဟန်ချက်ညီဖို့ သင့်လက်နဲ့ အနည်းငယ်ထိန်းထားပြီးပြုလုပ်ပေးရမှာဖြစ်ပါတယ်။ ဒါကလည်း သင့်ခန္ဓာကိုယ်အောက်ပိုင်းကတစ်ဆင့် ဝမ်းဗိုက်၊ လည်ပင်းစတာတွေဆီသွေးစီးဆင်းမှုအားကောင်းစေပြီး အဲ့ဒီကတစ်ဆင့် ဦးနှောက်တွင်းသွေးလည်ပတ်မှုလည်းကောင်းစေကာ ပုံမှန်လုပ်ပေးမယ်ဆိုရင် Dry ဖြစ်ပြီး အကျွတ်များတဲ့ဆံသားကို အရှည်မြန်လာစေဖို့ကူညီပေးမှာဖြစ်ပါတယ်။
၅။ Standing Forward Fold Pose
နောက်ထပ်ခန္ဓာကိုယ်အပေါ်ပိုင်းကြွက်သားတွေပြေလျှော့စေပြီး ဦးနှောက်တွင်းအောက်စီဂျင်ပမာဏများစေတဲ့ ယောဂကျင့်စဉ်တစ်မျိုးဖြစ်ပါတယ်။ ပြုလုပ်ရမှာကတော့ ဒူးမကွေးမိစေဘဲ ခန္ဓာကိုယ်ကိုအောက်ငုံ့ထားပြီး လက်တွေနဲ့ ခြေမျက်စိနားထိရောက်အောင်ကိုင်ထားပေးရမှာပါ။ အကြောပြေစေတဲ့လေ့ကျင့်ခန်းဖြစ်ပြီး ဒီအနေအထားအတိုင်း မိနစ်အနည်းငယ်ကိုယ်နိုင်သလောက်တောင့်ခံထားကာ ပြုလုပ်ပေးနိုင်ပါတယ်။
Photo Source: femina.in, Pinterest
