လတ်တလော K-Drama ပရိသတ်တွေကြားရေပန်းစားနေတဲ့ မင်းသားချော Ahn Hyo Seop ရဲ့အကြောင်းအချို့နဲ့ သူရဲ့ဖက်ရှင်များ

မင်္ဂလာပါနော်။ လတ်တလောလူကြိုက်များနေတဲ့ တောင်ကိုးရီးယားမင်းသားလေး Ahn Hyo Seop ကိုတော့ K-Drama ချစ်ပရိသတ်တွေ သိကြမယ်ထင်ပါတယ်။ လက်ရှိ Netflix ကထုတ်လွှင်နေဆဲဖြစ်တဲ့ “Business Proposal” ဇာတ်လမ်းတွဲမှာ အချစ်ရေးထက် အလုပ်ကိုဦးစားပေးတတ်သူ၊ အဆင်းကောအချင်းပါပြည့်စုံတဲ့ လူငယ် CEO တစ်ယောက်အဖြစ် မင်းသမီး Sejeong နဲ့အတူ အတွဲညီညီသရုပ်ဆောင်ထားပြီး K-Drama ပရိတ်သတ်တွေကြား ပူပူနွေးနွေးရေပန်းစားနေတဲ့ ဇာတ်လမ်းတွဲတစ်ခုဆိုရင်လည်း မမှားပါဘူး။

နာမည်အရင်း Ahn Hyo Seop ဖြစ်ပြီး Canada နိုင်ငံမှာပြောင်းရွေ့နေထိုင်ဖူးတာကြောင့် Paul Ahn ဆိုတဲ့ English နာမည်လည်းရှိပါတယ်။ ၁၉၉၅ ခုနှစ်မှာမွေးဖွားခဲ့တာကြောင့် အသက် ၂၇ နှစ်ရှိပါပြီ။ ကိုးရီးယားနိုင်ငံမှာမွေးခဲ့ပြီး အသက် ၇နှစ်လောက်မှာ မိသားစုနဲ့အတူ Canada မှာအခြေချခဲ့တာကြောင့် English လိုကျွမ်းကျွမ်းကျင်ကျင်ပြောတတ်သူတစ်ယောက်လည်းဖြစ်ပါတယ်။ Hyo Seop ဟာ Canada မှာအထက်တန်းတက်နေစဉ် JYP Entertainment ရဲ့ လူရွေးပွဲတစ်ခုမှာ အောင်မြင်ခဲ့ပြီး အသက် ၁၆ နှစ်နဲ့ ဝါသနာပါရာ အနုပညာအလုပ်လုပ်ဖို့ ကိုးရီးယားကို တစ်ယောက်ထဲပြန်လာခဲ့သူပါ။

သူဟာ ကိုးရီးယားမှာ JYP ရဲ့ Idol Trainee အဖြစ် GOT7 ၊ Twice အဖွဲ့တို့နဲ့အတူ သုံးနှစ်နီးပါး လေ့ကျင့်ခဲ့ဖူးတာကြောင့် အဆို၊အကနဲ့ တူရိယာသုံးမျိုးအထိ တီးခတ်တတ်တဲ့ ဂီတအရည်အချင်းရှိသူတစ်ယောက်ဆိုရင်လည်းမမှားပါဘူး။ Piano ၊ တယောနဲ့ ဂီတာတို့ကိုတီးခတ်တတ်ပြီး မကြာခဏ Piano တီးရင်း သီချင်းဆိုတာကို ကြိုက်နှစ်သက်သူတစ်ယောက်ဖြစ်ပါတယ်။

၂၀၁၆-၁၇ လောက်မှာ ဒရမ်မာမင်းသားအဖြစ်ပွဲဦးထွက်ခဲ့ပြီး လက်ရှိအချိန်အထိ သရုပ်ဆောင်ဆုပေါင်း ရှစ်ဆုအထိရရှိထားပြီဖြစ်ပါတယ်။ သူ့ရဲ့လူသိအများဆုံးဖြစ်တဲ့ Drama တွေကတော့ “Still 17” ၊ “Abyss” ၊ “Dr. Romantic 2” ၊ “Lovers Of The Red Sky” နဲ့ လက်ရှိ “Business Proposal” တို့ပဲဖြစ်ပါတယ်။

အားလပ်ရက်တွေကို အိမ်မှာပဲနေရတာပိုကြိုက်တဲ့သူဖြစ်ပြီး သူ့ရဲ့အချစ်တော်ကြောင်လေး Byul နဲ့ တော်တော်များများ အချိန်ကုန်လေ့ရှိတယ်လို့လည်း ပရိသတ်တွေကိုပြောပြခဲ့ပါသေးတယ်။

လက်ရှိ “Business Proposal” ဇာတ်လမ်းတွဲမှာ ခန့်ညားပြီးသပ်ရပ်တဲ့ အနောက်တိုင်းဝတ်စုံ အပြည့်နဲ့တွေ့ရပေမယ့် အပြင်ကသူ့ရဲ့ဖက်ရှင်ကတော့ ပေါ့ပေါ့ပါးပါးနဲ့ လူငယ်ဆန်ဆန် Outfit လေးတွေဝတ်ရတာပိုကြိုက်တဲ့သူတစ်ယောက်ဖြစ်ပါတယ်။ ဒီတော့ Hyo Seop ရဲ့ချစ်ပရိသတ်တွေအတွက် သူ့ရဲ့ Boyfriend ဆန်ဆန်ကြည့်ကောင်းတဲ့ ဖက်ရှင်အချို့ကိုဖော်ပြပေးလိုက်ပါတယ်နော်။