သွယ်လျလှပတဲ့ခန္ဓာကိုယ်အတွက် ပျိုမေတိုင်းမှာရှိထားသင့်တဲ့ အမူအကျင့်ကောင်း (၆) မျိုး

ပျိုမေတို့အားလုံးပဲမင်္ဂလာပါနော်။ သွယ်လျတဲ့ကိုယ်ခန္ဓာအချိုးအစားကို ရေရှည်ထိန်းထားနိုင်ဖို့ဆိုတာ ကျန်းမာတဲ့ အနေအထိုင်၊ အစားအသောက်ပုံစံတွေအပေါ်မူတည်တာကိုတော့ ပျိုမေတို့သိထားပြီးဖြစ်မှာပါ။ ဒီတစ်ခေါက်အကြောင်းအရာမှာ ဝိတ်ကျပြီး ကျစ်လစ်တဲ့ခန္ဓာကိုယ်အချိုးအစားကိုထိန်းထားချင်တဲ့ ပျိုမေတိုင်းအလေ့အကျင့် လုပ်ထားသင့်တဲ့ ဝိတ်ကျစေမယ့် နေ့စဉ်အမူအကျင့်တွေအကြောင်းကို ဖော်ပြပေးချင်ပါတယ်။ ဒီအချက်တွေထဲမှာ ပျိုမေတို့ပြုလုပ်နေကျ အလေ့အကျင့်တွေပါလာမလား ဖတ်ကြည့်လိုက်ရအောင်နော်-

၁။ တစ်နေ့တာကို ပုံမှန်လေ့ကျင့်ခန်းနဲ့ စတင်ပါ

လေ့လာမှုတွေအရ မနက်ခင်းတွေမှာ လှုပ်လှုပ်ရှားရှားလေ့ကျင့်ခန်းအချို့ပြုလုပ်တတ်ကြသူတွေဟာ ကိုယ်လိုချင်တဲ့ဝိတ်ကို ရေရှည်ထိန်းထားနိုင်ကြကြောင်းတွေ့ရပါတယ်။ ဒါကြောင့် တတ်နိုင်သလောက် ကိုယ့်ရဲ့ Lifestyle ပုံစံကိုပြောင်းလဲပြီး မနက်ပိုင်းမှာ လေ့ကျင့်ခန်းပုံမှန်ပြုလုပ်တဲ့ အလေ့အကျင့်ကိုမွေးမြူဖို့ အကြံပြုချင်ပါတယ်။ ဒါကသင့်အတွက် ဝိတ်ထိန်းနိုင်ရုံတင်မကဘဲ တစ်နေ့တာလုံးစိတ်လက်ပေါ့ပါးပြီး လန်းဆန်းနေစေဖို့လည်း အထောက်အကူပြုပါလိမ့်မယ်။

၂။ အစားအသောက်ကို နည်းနည်းချင်းစီစားပါ

အစားစားတဲ့အခါ ဗိုက်ပြည့်တဲ့အထိ တစ်ထိုင်ထဲစားတာက အစာခြေဖျက်ဖို့အချိန်ပိုယူရပါတယ်။ ဒါကြောင့် တစ်ခါစားတိုင်း နည်းနည်းချင်းနဲ့ဖြေးဖြေးချင်းစားတဲ့ အလေ့အကျင့်မျိုးပြုလုပ်ထားသင့်ပါတယ်။ နေ့တိုင်းပြုလုပ်မယ်ဆိုရင် သင့်အနေနဲ့ ခဏခဏဗိုက်ဆာတာမျိုးမဖြစ်တော့ဘဲ အစာခြေစနစ်လည်း ပုံမှန်လည်ပတ်နိုင်မှာဖြစ်ပါတယ်။

၄။ အသီးအရွက်များများစားပါ

ကျစ်လျစ်သွယ်လျဖို့အတွက် အဆီနည်းပြီး အာဟာရရှိတဲ့ အစိမ်းရောင်အသီးအရွက်တွေကို နေ့စဉ်မပါမဖြစ်စားသုံးတတ်တဲ့ အလေ့အကျင့်ရှိဖို့လည်း အရေးကြီးပါတယ်။

၃။ ကိုယ်စားမယ့်အစားအသောက်နဲ့ပမာဏကိုကြိုတင်စဉ်းစားထားပါ

တစ်နေ့တာအတွက် စားသင့်တဲ့အစားအစာအုပ်စုနဲ့ ပမာဏကို ကြိုတင်စဉ်းစားထားတာက သင့်ကိုအမြဲ ကျန်းမာတဲ့စားသောက်နေထိုင်မှုနဲ့ မဝေးကွာစေဖို့ကူညီပေးနိုင်ပါတယ်။ ကိုယ်စားသင့်တဲ့ Meal Plan တစ်ခုကို ကြိုမစီစဉ်ထားဘူးဆိုရင် သတိမထားမိဘဲအစားများတာ၊ ကျန်းမာရေးနဲ့မညီညွှတ်တဲ့ သရေစာမုန့်တွေ ခဏခဏစားမိတာ စတဲ့ပြဿနာတွေနဲ့ နေသားကျသွားပါလိမ့်မယ်။ ဒီလိုမဖြစ်ရအောင် သင့်တင့်မျှတတဲ့ Meal Plan တစ်ခုကို ကြိုတင်ပြီး အကြမ်းဖျင်းစဉ်းစားတဲ့ အလေ့အကျင့်ကိုပြုလုပ်ပေးသင့်ပါတယ်။

၅။ အလွန်အကျွံလျှော့စားခြင်းကိုရှောင်ပါ

Diet လုပ်တတ်တဲ့သူတွေအနေနဲ့ ဝိတ်အမြန်ကျဖို့ တစ်နေ့တာလိုအပ်တဲ့ကယ်လိုရီပမာဏထက် အလွန်အကျွံကန့်သတ်လျှော့ချပြီး စားသောက်တဲ့ပုံစံတွေကို ရှောင်ပေးရပါမယ်။ ဒီလိုပြုလုပ်တာက ရေရှည်မထိန်းနိုင်တဲ့အခါ ဝိတ်အတက်အကျမြန်ပြီး အစာခြေစနစ်နဲ့ ကိုယ်ခန္ဓာကျန်းမာရေးကိုပါ ကမောက်ကမဖြစ်စေနိုင်ပါတယ်။

၆။ အိပ်ချိန်ပုံမှန်ထားတဲ့ အလေ့အကျင့်မွေးပါ

အိပ်ချိန်မမှန်တာက စိတ်ရောကိုယ်ပါပင်ပန်းနွမ်းနယ်စေတဲ့အပြင် ကိုယ်အလေးချိန်ကိုပါ တက်လာစေနိုင်ပါတယ်။ အိပ်ရေးပျက်တာများလာတဲ့အခါမှာ ဟော်မုန်းအပြောင်းအလဲတွေကြောင့် အစားစားချင်စိတ်မြင့်တက်ပြီး အစာချေစနစ်နှေးကာမူမမှန်ဖြစ်လာစေပါတယ်။ ဒါကြောင့် ၇နာရီကနေ ၉ နာရီကြာအထိ အိပ်ချိန်ပြည့်ဝအောင် အိပ်စက်ဖို့လိုပါတယ်။