လက်သည်းဝါတာသက်သာပြီးပြန်ဖြူလာစေမယ့်နည်းလမ်းကောင်း

လက်သည်းနီခဏခဏဆိုးရင် လက်သည်းဝါတာမျိုးတွေ ဖြစ်မှာပါပဲ။ လက်သည်းဝါရင် ဒီတိုင်းကြီးထားလည်းမလှပဲ ဝါညစ်ညစ်နဲ့ ကြည့်ရဆိုးစေပါတယ်။ ဒါကြောင့် လက်သည်းဝါတာသက်သာပြီး ပြန်ဖြူလာစေမယ့် နည်းလမ်းကောင်းကို မျှဝေပေးလိုက်ပါတယ်။

လက်သည်းနီကို လက်သည်းဖျက်ဆေးနဲ့ သေချာပြောင်အောင်ဖျက်ပါ။ ပြီးရင်တော့ တံစဉ်းနဲ့ သေချာပွတ်တိုက်ပေးပါ။ တစ်ပတ်ကို ၂ ရက်လောက်တော့ လက်သည်းကို ဘာမှမဆိုးပဲထားပါ။ အမြဲတမ်း လက်သည်းနီဆိုးထားရင်လည်း လက်သည်းက ပိုဝါလာစေပါတယ်။

လက်သည်းကို သံပယိုသီး (သို့) သံပုရာသီးနဲ့ စက္ကန့် ၃၀ ကနေ ၁ မိနစ်အတွင်း ပွတ်တိုက်ပေးပါ။ တိုက်ပြီးရင် ၁၀ မိနစ်လောက်ထားလိုက်ပါ။ ပြီးမှ လက်သည်းကို ရေဆေးပြီးတော့ ဗီတာမင်အီးဖြစ်ဖြစ်၊ လက်သည်းအားဖြည့်ဆီဖြစ်ဖြစ် ပွတ်လိမ်းထားပေးပါ။

Whitening သွားတိုက်ဆေးနဲ့ လက်သည်းကိုတိုက်ပေးလို့လည်း ရပါတယ်။ တိုက်ပြီးရင် ၁၀ မိနစ်ထားပြီးတော့မှ ရေဆေးချလိုက်ပါ။ ပြီးရင်တော့ ခုနကလိုပဲ ဗီတာမင်အီးဖြစ်ဖြစ်၊ လက်သည်းအားဖြည့်ဆီဖြစ်ဖြစ် ပွတ်လိမ်းထားပေးပါ။

Tea tree oil ကလည်း လက်သည်းဝါတာ သက်သာစေပါတယ်။ လက်သည်းခွံပေါ်ကို tea tree oil နည်းနည်းတင်ပြီး ပွတ်လိမ်းပေးပါ။ တစ်နေ့ကို ၂ ကြိမ်လိမ်းပေးပါ။

လက်သည်းနီဆိုးတိုင်းမှာ base coat ခံပြီးမှ အပေါ်ကနေ ကိုယ်ဆိုးချင်တဲ့အရောင်ကိုဆိုးပါ။ Base coat ခံမဆိုးရင် လက်သည်းပျက်စီးပြီး လက်သည်းဝါတာ ပိုဖြစ်စေပါတယ်။