ကျန်းမာရေးအတွက် အစာရှောင်တယ်ဆိုတာကောင်းမွန်တဲ့ အလေ့အထတစ်ခုပါ။ တချို့သောသူတွေဟာ ခြေလေးချောင်းသား ပြုပြင်ထားတဲ့အသားတွေကို ရှောင်ကြသလို တချို့ကျတော့လည်း ဟင်းသီးဟင်းရွက် သစ်သီးဝလံတွေကို လုံးဝမစားကြတာမျိုးလည်းရှိပါတယ်။ အစာရှောင်တာကောင်းတယ်ဆိုပေမယ့် သင့်ခန္ဓာကိုယ်အတွက် သင့်တင့်မျှတတဲ့ အစာအာဟာရဓာတ်ကို မစားသုံးပေးဘူးဆိုရင် ကျန်းမာရေးထိခိုက်လာစေနိုင်ပါတယ်။ ဒီတခေါက်မှာတော့ ဟင်းသီးဟင်းရွက် သစ်သီးဝလံတွေကို လုံလောက်အောင်မစားခြင်းရဲ့ဆိုးကျိုးတွေ အကြောင်းမျှဝေပေးချင်ပါတယ်။
(၁) ပင်ပန်းနွမ်းနယ်နေမယ်
Photo : Freepik
လူတစ်ယောက်ရဲ့ခန္ဓာကိုယ်မှာ စွမ်းအင်ပြည့်ဝပြီး လန်းဆန်းတက်ကြွနေဖို့ရာ နေ့စဉ်လိုအပ်တဲ့ ဗီတာမင် သတ္တုဓာတ်တွေကို ဖြည့်တင်းပေးဖို့လိုအပ်ပါတယ်။ ခန္ဓာကိုယ်က လုံလောက်တဲ့ ဗီတာမင်ဓာတ် သတ္တုဓာတ်တွေကိုမရရှိဘူးဆိုရင် အလွယ်တကူမောပန်းနွမ်းနယ်ခြင်း အားအင်ကုန်ခမ်းခြင်းတွေဖြစ်စေနိုင်ပါတယ်။ ဟင်းသီးဟင်းရွက် သစ်သီးဝလံတွေက ခန္ဓာကိုယ်အတွက်နေ့စဉ်လိုအပ်တဲ့ ဗီတာမင်ဓာတ်များ ဓာတ်သတ္တုများကိုထောက်ပံ့ပေးတာကြောင့် ဟင်းသီးဟင်းရွက်နှင့် သစ်သီးဝလံတွေကိုလုံလောက်အောင်မစားပေးဘူးဆိုရင် သင့်အနေနဲ့ အားအင်ကုန်ခမ်း ပင်ပန်းနွမ်းနယ်ခြင်းတွေ ခံစားလာရနိုင်ပါတယ်။
(၂) စိတ်ကျရောဂါဖြစ်နိုင်ခြေများတယ်
Photo : Freepik
နေ့စဉ်စားတဲ့ အစားအစာတွေနှင့် ကျွန်တော်တို့ရဲ့စိတ်ပိုင်းဆိုင်ရာကျန်းမာရေးအကြား ဆက်နွယ်မှုရှိနေပါတယ်။ စပိန်နိုင်ငံရဲ့ဆေးသိပ္ပံဆိုင်ရာ သုတေသနပညာရှင်များရဲ့ လေ့လာချက်များအရ သစ်သီးဝလံနှင့် ဟင်းသီးဟင်းရွက်များလုံလုံလောက်လောက် စားသုံးသူများမှာ စိတ်ဓာတ်ကျခြင်းဝေဒနာနည်းပါးတယ်လို့ ဖော်ပြထားပါတယ်။ အကယ်၍ ဟင်းသီးဟင်းရွက်လုံလောက်စွာမစားဘူးဆိုရင် pantothenic acid နှင့် ဗီတာမင် B6 ကဲ့သို့သော အာဟာရချို့တဲ့မှုပြဿနာတွေဖြစ်လာနိုင်ပြီး ၎င်းက စိတ်ကျခြင်းအကြောင်းအရင်းတွေထဲက တစ်ခုဖြစ်ပါတယ်။
(၃) ကိုယ်အလေးချိန်တိုးလာစေနိုင်တယ်
Photo : Freepik
ကိုယ်အလေးချိန်လျော့ချချင်သူတွေအတွက်တော့ အစိမ်းရောင် ဟင်းသီးဟင်းရွက်နှင့် သစ်သီးဝလံတွေက မဖြစ်မနေစားပေးသင့်တဲ့ အစားအစာတွေ ဖြစ်ပါတယ်။ ဟင်းသီးဟင်းရွက်တွေဟာ ကယ်လိုရီပါဝင်မှုနည်းပြီး အစာချေစနစ်ကိုတိုးတက်ကောင်းမွန်စေတဲ့အပြင် အစားစားချင်စိတ်နဲ့ ဆာလောင်မွတ်သိပ်ခြင်းကိုလျော့ချပေးနိုင်ပါတယ်။ များသောအားဖြင့်နေစဉ်စားသုံးနေတဲ့ အစားအစာတွေမှာ ကယ်လိုရီပါဝင်မှုများတာကြောင့် ဟင်းသီးဟင်းရွက်နှင့် သစ်သီးဝလံတွေကိုမစားဘူးဆိုရင် ကယ်လိုရီပါဝင်မှုများတဲ့အစားအစာတွေကိုပိုစားမိပြီး ကိုယ်အလေးချိန်လည်းတိုးလာမှာဖြစ်ပါတယ်။
(၄) နှလုံးကျန်းမာရေးကိုထိခိုက်စေနိုင်တယ်
Photo : Freepik
ခန္ဓာကိုယ်အတွင်း ပိုတက်စီယမ်ဓာတ် နှင့် ဆိုဒီယမ်ဓာတ်များ မျှတမှုမရှိခြင်းက သွေးပေါင်ချိန်မြင့်တက်မှုကိုဖြစ်စေနိုင်တဲ့ အဓိကအကြောင်းအရင်း တရပ်ဖြစ်ပါတယ်။ သွေးပေါင်ချိန်မြင့်တက်ခြင်းနဲ့အတူ လေဖြတ်ခြင်း နှလုံးသွေးကြောဆိုင်ရာလုပ်ဆောင်ချက်စနစ်တွေကို အားနည်းစေခြင်းနှင့် နှလုံးရောဂါဖြစ်နိုင်ခြေများခြင်း စတဲ့ ကျန်းမာရေးပြဿနာတွေဖြစ်လာနိုင်ပါတယ်။ ခန္ဓာကိုယ်အတွက်လိုအပ်တဲ့ ပိုတက်စီယမ်ဓာတ်ပမာဏကို ဟင်းသီးဟင်းရွက်စားပေးခြင်းဖြင့်ဖြည့်တင်းနိုင်တာကြောင့် ဟင်းသီးဟင်းရွက်နှင့် သစ်သီးဝလံတွေကို လုံလောက်အောင်စားပေးမယ်ဆိုရင် သွေးပေါင်ချိန်ကိုထိန်းညှိပေးပြီး နှလုံးသွေးကြောဆိုင်ရာကျန်းမာရေးကို တိုးတက်ကောင်းမွန်စေမှာဖြစ်ပါတယ်။
