ပျော်ရွှင်တဲ့ဘဝကို ပိုင်ဆိုင်ရဖို့အတွက် ကျန်းမာရေးကို ဂရုစိုက်ပေးဖို့ အရေးကြီးပါတယ်။ ကျန်းမာရေးဆိုရာမှာလည်း ဆေးရုံ ဆေးခန်းသွားမှ ကျန်းမာရေးကို ဂရုစိုက်တယ်လို့ ဆိုလိုတာ မဟုတ်ပါဘူး။ နေစဉ်နေထိုင်မှုပုံစံ စားသောက်မှုပုံစံတွေကနေတဆင့် ကျန်းမာရေးကို ဂရုစိုက်နိုင်ပါတယ်။ လေ့လာမှုတွေအရတော့ ကင်ဆာရောဂါရဲ့ (၇၀) ရာခိုင်နှုန်းအထိကို အစားအသောက်ကနေတဆင့် ကာကွယ်ပေးနိုင်တယ်လို့ ဆိုထားပါတယ်။ ဒါဆိုရင် ကင်ဆာရောဂါမဖြစ်အောင် အစားအသောက်တွေ ဆင်ဆင်ခြင်ခြင် စားသောက်ဖို့ လိုအပ်လာပါပြီ။ ဒီတစ်ခေါက်မှာတော့ ကင်ဆာဖြစ်စေနိုင်တဲ့ အစားအစာတွေအကြောင်း ပြောပြပေးသွားမှာပါ။
(၁) ပြုပြင်ထားသော အစားအစာများ
Photo : Freepik
လူတွေ နေ့စဉ်စားသုံးနေကြတဲ့ ဝက်အူချောင်း၊ ဝက်ပေါင်ခြောက် နဲ့ အသားကင်တွေက ပြုပြင်ထားတဲ့ အစားအစာတွေ ဖြစ်တာကြောင့် ကင်ဆာနှင့် ဆက်နွှယ်သော နိုက်ထရိတ်နှင့် နိုက်ထရိုက်များ ပါဝင်နေပါတယ်။ မီးခိုးကျပ်တိုက်ခြင်းကလည်း အစားအစာတွေကို ကြာရှည်စွာ ထိန်းသိမ်းသော နည်းစနစ်ဖြစ်ပေမယ့် အသားတွေကို ကတ္တရာစေးလိုဖြစ်စေပြီး စီးကရက်လိုမျိုး အန္တရာယ်ရှိတဲ့ အရာအဖြစ် ပြောင်းလဲသွားစေပါတယ်။
(၂) အရက်
Photo : Freepik
အရက်အလွန်အကျွံသောက်ခြင်းဟာ ကျန်းမာရေးကို ဆိုးရွားစွာထိခိုက်စေပါတယ်။ လေ့လာမှုတွေအရ အရက်အလွန်အကျွံသောက်ခြင်းကြောင့် ပါးစပ်၊ အစာပြွန်၊ အသည်း၊ အူမကြီးနှင့် စအိုကင်ဆာ တွေဖြစ်စေနိုင်ပါတယ်။
(၃) စည်သွပ်ဘူး
Photo : Freepik
စည်သွပ်ဘူးတွေမှာ အသုံးပြုတဲ့ ဘူးခွံတွေမှာ ကင်ဆာဖြစ်စေတဲ့ BPA ဓာတုပစ္စည်းများ ပါဝင်နေပါတယ်။ အထူးသဖြင့် ခရမ်းချဉ်သီးလို သဘာဝအက်ဆစ်ဖြစ်သောအရာတွေအပြင် ဘူးထဲကို ထည့်သွင်းရတဲ့ ဘယ်လိုအရာတွေမှာမဆို BPA တွေ ပါဝင်နေတတ်ပါတယ်။ ဒါကို ကာကွယ်ဖို့အတွက် အသီးအနှံများကို လတ်လတ် ဆတ်ဆတ်စားပါ။ ကြာရှည်ခံစေဖို့အတွက် ရေခဲသေတ္တာကိုအသုံးပြုပါ။ ဒါမှမဟုတ် BPA-free အဖြစ် တံဆိပ်ကပ်ထားသော စည်သွပ်ဘူးများကိုသာဝယ်ပါ။
(၄) Soda Pop
Photo : Freepik
ဆိုဒါမှာပါဝင်တဲ့ သကြားဓာတ်တွေဟာ ကင်ဆာဆဲလ်များရဲ့ အကြိုက်ဆုံးအစားအစာတွေ ဖြစ်တဲ့အပြင် မြင်းတစ်ကောင်ကို အသက်ရှူကျပ်စေနိုင်လောက်တဲ့ ဓာတ်ပစ္စည်းတွေဟာ ဆိုဒါမှာ ပါဝင်နေပါတယ်။ ဆိုဒါမှာ အာဟာရဓာတ်များ မပါဝင်တဲ့အပြင် အသုံးပြုထားတဲ့ ဓာတုပစ္စည်းများနှင့် အရောင်တွေကြောင့် ကင်ဆာဖြစ်နိုင်ခြေကို ပိုမိုမြင့်မားစေပါတယ်။
(၅) အာလူးကြော်
Photo : Freepik
အာလူးကြော်များမှာ ကျန်းမာရေးအတွက် ဆိုးကျိူးများဖြစ်စေနိုင်တဲ့ ဆားနှင့် ပြည့်ဝအဆီများစွာပါဝင်နေတဲ့အပြင် ကင်ဆာရောဂါဖြစ်နိုင်ခြေကို မြင့်တက်စေပါတယ်။ ဘာကြောင့်လဲဆိုတော့ ဘယ်အစားအစာကိုမဆို အပူချိန်မြင့်မားစွာ ချက်ပြုတ်ထားရင် တွေ့ရတတ်တဲ့ Acrylamide လို့ခေါ်တဲ့ ဓာတုပစ္စည်းဟာ အာလူးကြော်တွေမှာ ပါဝင်နေတာကြောင့်ဖြစ်ပါတယ်။ အာလူးကြော်မှာတွေ့ရတဲ့ acrylamide ကို စီးကရက်တွင်လည်း တွေ့နိုင်ပြီး သေစေနိုင်တဲ့အထိ ပြင်းထန်တဲ့ ဓာတုပစ္စည်းတစ်မျိူးဖြစ်ပါတယ်။
