နှုတ်ခမ်းသားလေး ပန်းရောင်သမ်းပြီး နူးညံ့လှပနေဖို့ အုန်းဆီကို အခုပဲအသုံးပြုလိုက်ကြရအောင်

အုန်းဆီက အသားအရေအတွက်ရော ဆံကေသာအလှအပအတွက်ပါ အသုံးတည့်တဲ့ ပစ္စည်းတစ်မျိုးပဲဖြစ်ပါတယ်။ ဒါ့အပြင် နှုတ်ခမ်းသားလေး နူးညံ့ပြီး သဘာဝအတိုင်း ပန်းရောင်သမ်းနေစေဖို့လည်း ကူညီပေးနိုင်ပါတယ်။

အသုံးပြုပုံနည်းလမ်းလေးတွေကတော့ အများအပြားရှိတဲ့အတွက်ကြောင့် မိမိကြိုက်နှစ်သက်ရာ နည်းလမ်းတစ်မျိုးမျိုးကို အသုံးပြုနိုင်ဖို့အတွက် ဝေမျှပေးလိုက်ပါတယ်။

နည်းလမ်း (၁)

အုန်းဆီ စားပွဲတင်ဇွန်း ၁ ဇွန်းနဲ့ ဂျိုဂျိုးပါး အဆီ ၅ စက်ခန့်ကို သမအောင် ရောမွှေပေးလိုက်ပါ။ ထို့နောက် ဘူးအလွတ်တစ်ဘူးထဲမှာ ထည့်ပြီး ရေခဲသေတ္တာ အအေးခံစက်ထဲမှာ မိနစ် ၂၀ကနေ မိနစ် ၃၀ ခန့်အထိ အအေးခံထားလိုက်ပါ။ ရရှိလာတဲ့အဆီကို နှုတ်ခမ်းမှာ သုတ်လိမ်းပေးလိုက်ပါ။

နည်းလမ်း (၂)

အုန်းဆီ လက်ဖက်ရည်ဇွန်း တစ်ဝက်နှင့် Vaseline အလှဆီ စားပွဲတင်ဇွန်း တစ်ဇွန်းတို့ လိုအပ်ပါမယ်။ အရင်ဆုံး Vaseline ကို အရည်ရရှိအောင် ပြုလုပ်ပြီးနောက် အုန်းဆီနဲ့ ရောနှောပေးလိုက်ပါ။ ဘူးအလွတ်တစ်ဘူးထဲထည့်ပြီး အအေးခံထားလိုက်ပါ။ ရရှိလာတဲ့ အဆီတောင့်ကို နှုတ်ခမ်းမှာ သုတ်လိမ်းပေးရပါမယ်။

နည်းလမ်း (၃)

အုန်းဆီ စားပွဲတင်ဇွန်း ၂ ဇွန်းနဲ့ ကိုးကိုးထောပတ် စားပွဲတင်ဇွန်း ၁ ဇွန်းတို့ လိုအပ်ပါမယ်။ ထောပတ်ကို အပူပေးပြီး အရည်ဖျော်ထားလိုက်ပါ။ ထို့နောက် အုန်းဆီနဲ့ ရောလိုက်ပြီးနောက် ဘူးအလွတ်တစ်လုံးထဲထည့်ပြီး တစ်နာရီနဲ့ မိနစ် ၃၀ ခန့် အအေးခံထားလိုက်ပါ။ အအေးခံပြီးနောက်မှာတော့ အသုံးပြုလို့ရပါပြီ။

နည်းလမ်း (၄)

အုန်းဆီ စားပွဲတင်ဇွန်း ၁ ဇွန်း၊ ပျားဖယောင်း စားပွဲတင်ဇွန်း ၁ ဇွန်းနဲ့ သံလွင်ဆီ လက်ဖက်ရည်ဇွန်း ၁ ဇွန်းတို့ လိုအပ်ပါမယ်။ အုန်းဆီ၊ ပျားဖယောင်းနဲ့ သံလွင်ဆီတို့ကို အတူတကွရောနှောပြီး အပူချိန်နည်းနည်းလေးနဲ့ အပူပေးလိုက်ပါ။ အရည်ပျော်သွားပါက ဘူးအလွတ်တစ်လုံးထဲထည့်ပြီး အအေးခံထားလိုက်ပါ။ အေးသွားရင်တော့ စတင်အသုံးပြုလို့ရပါပြီ။

Source: stylecraze.com