မနက်ပိုင်းလေးက အအေးပိုတော့ ရေတောင် ကြာကြာမချိုးနိုင်ဘူးလေ။ ခေါင်းလျှော်ဖို့ဆို ပိုဝေးတာပေါ့။
ခေါင်းမလျှော်ပဲ တစ်လလောက်နေကြည့်ရင် ကောင်းမလားလို့ စဉ်းစားလိုက်တော့ ဒီအချက်လေးတွေကိုတွေ့တာနဲ့ ကိုယ့်လိုပဲ ခေါင်းရမှာ ပျင်းတဲ့သူတွေဖတ်ဖို့ မျှဝေပေးလိုက်တယ်နော်။
၁။ ဆံသားခြောက်တယ်ဆိုတာ အရင်တုန်းက ကိစ္စဖြစ်သွားပါပြီ။
Source: Everyday Health
ခေါင်းမလျှော်တော့ဘူးဆိုရင် ဦးရေပြားက သဘာဝအဆီတွေ သူ့အလိုလို ထွက်လာပါလိမ့်မယ်။ ဒါကြောင့် ဆံပင်တွေက အဖျား ၂ ခွဖြစ်တာတို့ အရောင်မှိန်ပြီးခြောက်ကပ်ကပ်ဖြစ်နေတာတို့ လုံးဝရှိတော့မှမဟုတ်ပါဘူး။
၂။ ဆံသားတောက်ပြောင်လာမယ်။
ဦးရေပြားက ထွက်တဲ့အဆီတွေက ဆံသားတွေအကုန်လုံးကို ပြောင်လက်နေစေပါလိမ့်မယ်။ သဘာဝအမွှေးနဲ့ ပြုလုပ်ထားတဲ့ ဘီးနဲ့ ဖြီးပေးမယ်ဆိုရင် ပိုပြီးအထောက်အကူဖြစ်ပါတယ်။ ဒါပေမယ့် ဆံပင်အရင်းတွေမှာတော့ စေးကပ်နေမှာပါ။
၃။ ဆံပင်အရောင်ပိုခံမယ်။
ဆံပင်အရောင်ခံတယ် မခံဘူးဆိုတာက သုံးတဲ့ ခေါင်းလျှော်ရည်နဲ့ မဆိုင်ပါဘူး။ ဘယ်လို ခေါင်းလျှော်ရည်သုံးသုံး လျှော်တဲ့အကြိမ်ရေ များများလေလေ အရောင်မှိန်လာလေ ဖြစ်မှာပါ။ ခေါင်းမလျှော်ရင်တော့ အရောင်ပိုမြဲမှာဖြစ်ပါတယ်။
၄။ အရင်ကထက် ဆံပင်တွေပိုကောင်းလာနိုင်တယ်။
ဆံပင်အရင်းတွေနဲ့ ဦးရေပြား ဟာ ဓာတုဗေဒ ထိတွေ့ခြင်းမရှိတော့တာ ကြောင့် အရင်ထက်ပို ကျန်းမာသန်စွမ်းလာနိုင်ပါတယ်။ ဒါပေမယ့် တစ်ဦး နဲ့ တစ်ဦး ရလဒ်ခြင်းတူမှာ မဟုတ်ပါဘူး။ တစ်ချို့သူတွေမှာတော့ ဆံသား သိသိသာသာ ပိုကောင်းလာနိုင်ချေရှိပါတယ်။
ဒါပေမယ့် ဆံပင်ပြန်ကောင်းလာနိုင်ချေက လူအယောက် တစ်ရာ တစ်ယောက်တောင် ဖြစ်နိုင်ချေမရှိပါဘူး။ ဆံပင်ပြန်မကောင်းလာတဲ့ သူတွေကတော့ ဆက်ဖော်ပြမယ့် ဆိုးကျိုးတွေကို ခံစားရပါလိမ့်မယ်။
၅။ အဖုအပိန့်တွေထွက်လာမယ်။
ဆံပင်မှာ လိမ်းထားတဲ့ ပုံသွင်းကော်တွေဟာ မလျှော်ပစ်ရင် ဦးရေပြားက အဆီတွေနဲ့ ရောပြီး အညစ်အကြေးတွေဖြစ်လာမှာပါ။ ဒီအညစ်အကြေးတွေက ဦးရေပြားက ချွေးပေါက်တွေကို ပိတ်တဲ့အခါ ဝက်ခြံတွေ အဆီဖုတွေ ဖြစ်လာပါလိမ့်မယ်။
၆။ အနံ့ဆိုးလာမယ်။
Source:Be Beautiful
ဆံပင်အမြစ်မှာ ရှိတဲ့ ချွေးအိတ်က ချွေးတွေနဲ့ အတူ အညစ်အကြေးတွေ ရောလာတဲ့အခါ ဘတ်တီးရီးယားများပေါက်ဖွားလာပြီး အနံ့ဆိုးတွေ ထွက်လာနိုင်ပါတယ်။
၇။ အညစ်အကြေးနဲ့ ဖုန်မှုန့်တွေ ပိုများလာမယ်။
လုံးဝမလျှော်တာမျိုးမဟုတ်ဘဲ Dry Shampoo ပဲ သုံးမယ်ဆိုရင်တောင် မရပါဘူး။ ဆံပင်က စေးကပ်နေတဲ့အတွက် ပတ်ဝန်းကျင်က ဖုန်မှုန့်တွေ ကပ်ဖို့လည်းပိုလွယ်ပါတယ်။ အချိန်ကြာလာလေလေ ပိုညစ်ပတ်လာလေလေ ဖြစ်မှာပါ။
၈။ အနာဖြစ်လာမယ်။
အဖုအပိန့်လေးတွေကို ကုတ်မိရင်းကနေ အနာတွေဖြစ်လာနိုင်ပါတယ်။ အနာမဖြစ်ဘူးဆိုရင်တောင် အဖုတွေက ယောင်ပြီး ပြည်တည်နာတွေဖြစ်လာပါလိမ့်မယ်။
၉။ ဆံပင်ပေါက်လမ်းကြောင်းပြောင်းသွားမယ်။
ဦးရေပြားက အညစ်အကြေးတွေနဲ့ ပိတ်နေတာကြောင့် ဆံပင်တွေက အတွင်းဘက်ကို ပြန်ပေါက်လာပါလိမ့်မယ်။ အတွင်းဘက်ကိုပြန်ပေါက်တဲ့ ဆံပင်တွေက ဦးရေပြားကို ပြန်ထိုးခွဲပြီးပေါက်တာဖြစ်တဲ့အတွက် တွန့်လိမ်ကောက်ကွေးနေပြီး ပြည်တည်နာတွေပိုဆိုးလာပါလိမ့်မယ်။
၁၀။ သန်းနဲ့ ပိုးမွှားတွေ ရောက်လာမယ်။
ကိုယ့် ဆံပင်တွေက သန်းဥလေးတွေ သန်းကောင်လေးတွေရဲ့ သီရိဂေဟာ ကြီးဖြစ်လာမှာပါ။ အပေါ်က အချက်တွေနဲ့ တင် တော်တော်ဆိုးနေပြီကို သန်းပါတွယ်ဦးမယ်ဆိုတော့ ခေါင်းပုံမှန်လျှော်မှ ဖြစ်တော့မယ်နော်။
တန်ဆေးလွန်ဘေး ဆိုတဲ့အတိုင်း ဘယ်အရာမှအစွန်းရောက်တာမကောင်းပါဘူး။ ခေါင်းလျှော်မယ်ဆိုရင်လည်း ၂ ရက် ၃ ရက် ခြားသာလျှော်သင့်ပြီး နေ့တိုင်းခေါင်းလျှော်မယ်ဆိုရင် ဦးရေပြား ခြောက်သွေ့ပြီး ဗောက်ထခြင်း၊ ဆံသား ရေဓာတ်ခမ်းခြောက်ခြင်း၊ ဆံပင်နှစ်ခွ ဖြစ်ခြင်းတွေ ခံစားရနိုင်ပါတယ်။ ဒါ့အပြင် ခေါင်းလျှော်ရည် ရွေးချယ်ရာမှာလည်း ဓာတုဗေဒနည်းပြီး သဘာဝပစ္စည်းများ ပါဝင်တဲ့ ခေါင်းလျှော်ရည်အမျိုးအစားကို ရွေးချယ်သုံးပေးသင့်ပါတယ်။
