အမျိုးသားအများစုက သူတို့အရပ်အမြင့်နဲ့ ပတ်သက်ပြီး ဘယ်တော့မှ စိတ်တိုင်းကျလေ့မရှိပါဘူး။ ရှိရင်းစွဲအရပ်ကိုမှ ထပ်ရှည်ချင်ကြပါတယ်။ အရပ်ရှည်တဲ့ကိုကိုတစ်ယောက်ဖြစ်ချင်တယ်ဆိုရင်တော့ အာဟာရမျှတအောင် စားသုံးရမှာဖြစ်သလို အရပ်ရှည်စေတဲ့ လေ့ကျင့်ခန်းတွေကိုလည်း တွဲလုပ်ပေးရပါမယ်။
အရပ်ရှည်ဖို့အတွက် ဘယ်လိုလေ့ကျင့်ခန်းတွေ ပြုလုပ်ပေးရမလဲဆိုတာ မပြောပြခင် စားသုံးရမယ့် အစားအစာလေးတွေကို ဝေမျှပေးချင်ပါတယ်။
နွားနို့ သောက်ပါ။ ဟုတ်ပါတယ် အရိုးအဆစ်သန်မာဖို့အတွက် နွားနို့က အရေးကြီးဆုံးပါပဲ။ ဒါ့အပြင် ပရိုတိန်းဓာတ်ကြွယ်ဝတဲ့ ကြက်သား၊ ဥအမျိုးမျိုး၊ ဗီတာမင် အေ ဓာတ်ကြွယ်ဝတဲ့ မုန်လာဥနီအပြင်၊ ဟင်းနုနွယ်၊ အသီးအနှံထဲမှာဆို သရက်သီး၊ သခွားမွှေး၊ မက်မွန်သီး၊ ဗီတာမင် ဒီနဲ့ ကယ်လစီယမ်ဓာတ်ကြွယ်ဝတဲ့ ဒိန်ချဉ်စတဲ့အစားအသောက်တွေကို မှီဝဲစားသုံးသင့်ပါတယ်။
စားသောက်ရမယ့် အစားအစာတွေကို သိရှိသွားပြီဆိုရင်တော့ ပြုလုပ်ပေးရမယ့် လေ့ကျင့်ခန်းလေးတွေအကြောင်း ဆက်ဖတ်ကြည့်ရအောင်။
ခါးဘေးစောင်း လေ့ကျင့်ခန်း
သင့်ကို အရပ်ရှည်အောင် ကူညီပေးတဲ့ လေ့ကျင့်ခန်းတွေထဲမှာ ခါးဘေးစောင်းတဲ့ လေ့ကျင့်ခန်းက တစ်ခုအပါအဝင်ပါပဲ။ အရင်ဦးဆုံး မတ်တပ်အနေအထားနဲ့ ခြေထောက်နှစ်ဖက်ကို ပုခုံးအကျယ်အတိုင်းကားထားလိုက်ပါ။ ဘယ်ဘက်လက်က ခါးထောက်ထားပြီး ညာဘက်လက်က အလေးတုံးကိုင်ထားရပါမယ် (အလေးတုံးမရှိပါက ရေဘူးအကြီးကို ရေဖြည့်ထည့်ပြီး အစားထိုးကိုင်ပေးလိုက်ပါ)။ ပြီးရင် ခန္ဓာကိုယ်ကို ညာဘက်သို့ ကိုင်းချပေးရပါမယ်။ ထိုအချိန်မှာ ခါးကို ဆန့်နိုင်သလောက် ဆန့်ချထားပေးလိုက်ပါ။ ထိုအနေအထားအတိုင်း ၁၅ စက္ကန့်ခန့် နေပါ။ ပြီးရင် အလေးတုံးကို ဘက်ပြောင်းကိုင်ပေးလိုက်ပြီး ခန္ဓာကိုယ်ကို ဘယ်ဘက်သို့ ကိုင်းချလိုက်ပါ။ ဘယ်၊ ညာ တစ်လှည့်စီပြုလုပ်ပေးပါ။
မြွှေဟောက်ပုံစံ ခါးဆန့် လေ့ကျင့်ခန်း
အရင်ဦးဆုံး လေ့ကျင့်ခန်းပြုလုပ်တဲ့ဖျာပေါ်မှာ လှဲလျောင်းလိုက်ပါ။ လက်နှစ်ဖက်ကိုတော့ ခန္ဓာကိုယ်ဘေးဘက်မှာ ထောက်ထားတဲ့အနေအထားပြုလုပ်ပါ။ ပြီးရင် ရင်ဘက်ကနေတစ်ဆင့် အပေါ်ကို နည်းနည်းချင်းစီကြွပေးလိုက်ပါ။ တဖြည်းဖြည်းနဲ့ဝမ်းဗိုက်နဲ့ ကြမ်းပြင်နဲ့မထိတော့တဲ့အထိ အပေါ်ကိုကြွပေးပါ။ အဲ့ဒီလို အပေါ်ကြွနေတဲ့အချိန်မှာ လက်ကလည်း ကွေးညွှတ်ထားရာကနေ ဆန့်တန်းပေးလိုက်ပါ။ ဦးခေါင်းကလည်း အလိုက်သင့်မော့ပြီး အပေါ်မော့ကြည့်လိုက်ပါ။ ခန္ဓာကိုယ်အောက်ပိုင်းကတော့ ကြမ်းပြင်နဲ့ကပ်နေရပါမယ်။ ထိုအနေအထားအတိုင်း ၁၅ စက္ကန့်ခန့် နေပေးပါ။ ပြီးမှ မူလအနေအထားအတိုင်း ခန္ဓာကိုယ်တစ်ခုလုံးကို ကြမ်းပြင်နဲ့ပြန်ကပ်ထားပေးလိုက်ပါ။
ကြိုးခုန်ပါ
ကြိုးခုန်ခြင်းကလည်း သင့်ကို အရပ်ရှည်အောင် ကူညီပေးတဲ့လေ့ကျင့်ခန်းတစ်မျိုးပါပဲ။ ကြိုးခုန်ခြင်းက သွေလှည့်ပတ်မှုကို တိုးမြှင့်ပေးပြီး အရိုးများဆန့်ထွက်လာအောင် ဖိအားပေးတဲ့ လေ့ကျင့်ခန်းတစ်ခုပဲဖြစ်ပါတယ်။
ဒါ့အပြင် ခြေဖျားထောက်လေ့ကျင့်ခန်းကလည်းပဲ အရပ်ရှည်ဖို့အတွက် ကူညီပေးပါတယ်။ ခြေဖျားထောက်ပြီး လက်နှစ်ဖက်ကို အပေါ်သို့ဆန့်တန်းပေးလိုက်ပါ။ ခန္ဓာကိုယ်ကိုလည်း ဆန့်နိုင်သလောက် မြင့်မြင့်သာဆန့်ထားလိုက်ပါ။ ပြီးရင် ထိုအနေအထားအတိုင်း စက္ကန့် ၃၀ ခန့် နေပေးလိုက်ပါ။
ဒီလေ့ကျင့်ခန်းတွေက မိမိအိမ်မှာပဲ အလွယ်တကူပြုလုပ်လို့ရတဲ့ လေ့ကျင့်ခန်းတွေပဲဖြစ်ပါတယ်။ ဒီလေ့ကျင့်ခန်းတွေကို မှန်မှန်ပြုလုပ်ပေးတဲ့အပြင် အရပ်ရှည်စေတဲ့ အခြားအားကစားတွေကို ပြုလုပ်ပေးပါက ပိုလျင်မြန်ပြီး ထိရောက်မှုပိုရှိတာကို တွေ့မြင်ရမှာပါ။ ဥပမာ ရေကူးအားကစား၊ ဘက်စကတ်ဘောကစားခြင်း စတဲ့အားကစားတွေပဲဖြစ်ပါတယ်။
