ကိုရီးယားနိုင်ငံမှာ အင်မတန်လူကြိုက်များတဲ့ အစီအစဥ်တစ်ခုဖြစ်တဲ့ “The Return of Superman” ကို ပရိတ်သတ်အများစုသိကြမှာပါ။ ကလေးချစ်တတ်တဲ့ မြန်မာပရိတ်သတ်အများစုအတွက်တော့ လက်မလွှတ်တမ်းကြည့်ရတဲ့ အစီအစဥ်လေးတစ်ခုပါ။ ထိုအထဲမှာ ပါဝင်ခဲ့သမျှ အနုပညာရှင်တွေရဲ့ သားသမီးတွေက အင်မတန်ကို ချစ်စရာကောင်းလွန်းကြပါတယ်။ ထိုအထဲကမှ ဘောလုံးအားကစားသမား Park Joo Ho ရဲ့ သားသမီးနှစ်ယောက်ဖြစ်တဲ့ Na Eun, Gun Hoo တို့နှစ်ယောက်ကလည်း အပါအဝင်ပါပဲ။ အစီအစဥ်မှာ အချိန်အတော်ကြာပါဝင်ခဲ့ပေမယ့်လည်း အငယ်ဆုံးလေးမွေးဖွားတော့မှာမို့ ခဏတာထွက်ခွာသွားခဲ့တဲ့ ဒီမိသားစုလေးက အခုဆိုရင် အစီအစဥ်မှာ ပြန်လည်ပါဝင်လာတော့မယ်လို့ သတင်းထုတ်ပြန်ခဲ့ပါတယ်။
မကြာသေးခင်ကပဲ အစီအစဥ်မှာပြန်လည်ပါဝင်ဖို့အတွက် Park Joo Ho မှ ဆုံးဖြတ်ချက်ချခဲ့ပြီးတော့ ပထမဦးဆုံး ရိုက်ကူးဖို့ရက်ကိုလည်း ဆွေးနွေးနေကြတယ်လို့ အစီအစဥ်ရဲ့ ထုတ်လုပ်သူတွေက ဝေမျှခဲ့ပါတယ်။ သူတို့မိသားစုလေး မပါဝင်ဖြစ်တော့တာ ခြောက်လနီးနီးရှိသွားပြီဖြစ်ပြီး အငယ်ဆုံးသားလေးကိုတော့ ဇန်နဝါရီလမှာ မွေးဖွားခဲ့ပါတယ်။
အချိန်အတိုင်းအတာတစ်ခုလောက်ထိ ဆွစ်ဇာလန်မှာ နေထိုင်ခဲ့ကြပြီးတော့ အခုဆိုရင် ကိုရီးယားနိုင်ငံကို ပြန်လည်ရောက်ရှိလာကြပါပြီ။ အစီအစဥ်မှာပြန်လာပါဝင်ဖို့ ရက်အတိအကျကို သေချာမသတ်မှတ်ရသေးတာကတော့ Na Eun နှင့် Gun Hoo တို့မောင်နှမနှစ်ယောက်အနေနဲ့ ကိုရီးယားနိုင်ငံမှာ ပြန်လည်အသားကျဖို့ လိုအပ်သေးလို့ရယ်၊ အငယ်ဆုံးလေးမွေးဖွားပြီးနောက် အချိန်လိုအပ်သေးတာကြောင့်ဖြစ်ပါတယ်။
The Return of Superman အစီအစဥ်ကို ကြိုက်နှစ်သက်ကြပြီး Na Eun နဲ့ Gun Hoo တို့မောင်နှမနှစ်ယောက်ကို ချစ်ကြတဲ့ ပရိတ်သတ် အများစုအနေနဲ့တော့ အငယ်ဆုံးလေးနဲ့အတူ အစီအစဥ်မှာပြန်လည်ပါဝင်လာမယ့်အချိန်ကို စောင့်မျှော်နေကြပြီဖြစ်ပါတယ်။
