ကိုယ်အလေးချိန်ချတော့မယ်ဆိုရင် မျက်လုံးထဲ ဘာမြင်ယောင်မိကြပါသလဲ။ လေ့ကျင့်ခန်းတွေ အပြင်းအထန်လုပ်နေရပြီးတော့ သစ်သီးဝလံ ဟင်းသီးဟင်းရွက်များများစားနေရတဲ့ လူတစ်ယောက်ကို မြင်ယောင်မိကြမှာပေါ့နော်။

မိမိလိုချင်တဲ့ ခန္ဓာကိုယ်လေးပိုင်ဆိုင်နိုင်ဖို့ဆိုတာလည်း တော်တော်ခက်ခဲလှပါတယ်။ စိတ်ရှည်ဖို့ကတော့ အဓိကပေါ့နော်။ ဒါပေမဲ့ လေ့ကျင့်ခန်းလုပ်စရာမလိုဘဲ၊ အစားရှောင်စရာလည်း မလိုဘဲနဲ့ ဝိတ်ကျစေတဲ့ နည်းလမ်းတွေရှိတယ်ဆိုတာကိုရော စာဖတ်သူတို့ ယုံကြရဲ့လား။

ဘယ်လိုနည်းလမ်းလေးတွေဖြစ်မလဲဆိုတာ အတူတူဖတ်ကြည့်လိုက်ရအောင်နော်။

အနီရောင် ပန်းကန်နဲ့စားပါ

သုတေသနပညာရှင်တွေက လေ့လာစမ်းသပ်ချက်တစ်ခုပြုလုပ်ခဲ့ကြပါတယ်။ အနီရောင်၊ အဖြူရောင်၊ အပြာရောင် ပန်းကန် ၃ ခုထဲ ကွတ်ကီးတွေ ထည့်ထားပြီး အခြားသူတွေကို စားခိုင်းခဲ့ပါတယ်။ အနီရောင်ပန်းကန်နဲ့ စားရတဲ့သူက အခြားသူထက် ကွတ်ကီးနည်းနည်းလေးပဲ စားခဲ့ပါတယ်။ အနီရောင်က တားမြစ်ချက်၊ ရပ်လိုက်တော့၊ အန္တရာယ်များတယ်ဆိုတဲ့ သင်္ကေတအရောင်တစ်ခုပါ။ ဒါ့ကြောင့် ဝိတ်ကျချင်တယ်ဆို ပန်းကန်အနီရောင်နဲ့ အစား စားပါ။

အချိုရည်တွေ သောက်တဲ့အခါမှာလည်း အဝကျဉ်းပြီး ရှည်တဲ့ ဖန်ခွက်နဲ့ သောက်ပါ

ကျန်းမာရေးနဲ့ မညီညွှတ်တဲ့ အစားအစာတွေကို မျက်စိရှေ့ မှာ မမြင်အောင် ထားပါ

မျက်စိရှေ့ မှာ မြင်နေမယ်ဆိုရင် ဆာလောင်မှုကို ဖြစ်ပေါ်စေပြီး သင့်ကို စားချင်စိတ်ပေါ်အောင် လှုံ့ဆော်နေတာကြောင့်ပါ။

ပရိုတိန်းများများစားပါ

ပရိုတိန်းဓာတ်ကြွယ်ဝတဲ့ အစားအစာတွေဖြစ်တဲ့ ကြက်သားနဲ့ အနီရောင်ရှိတဲ့အသားများ၊ ငါးအမျိုးမျိုး၊ ဥအမျိုးမျိုး၊ ရိုးရိုးဒိန်ခဲ၊ မလိုင်ထုတ်ပြီး ဒိန်ခဲပျော့နဲ့ ပဲတောင့်ရှည်များ စားသုံးပေးပါ။ ပရိုတိန်းဓာတ်ကြွယ်ဝတဲ့အစားအစာများက သင့်ကို ဗိုက်အမြန်ပြည့်စေပြီး ၁၂ ပတ်ကြာရင် ၁၀ ပေါင် ကျသွားပါလိမ့်မယ်။

ဗိုက်ဆာတဲ့အချိန်မှာ သရေစာမုန့်တွေမစားဘဲ သကြားမပါတဲ့ ပူရှိန်းပီကေဝါးပါ

အအေးထဲကို ရေခဲတုံးထည့်သောက်ပါ

အေးတဲ့အစားအစာများက ကယ်လိုရီများများလောင်ကျွမ်းအောင် ကူညီပေးပါတယ်။

တစ်ညကို ၇ နာရီ ၈ နာရီခန့် အိပ်ပါ

အိပ်ချိန်လုံလုံလောက်လောက်မရှိတဲ့သူက ကယ်လိုရီများတဲ့အစားအစာတွေကို ပိုစားမိပြီး ဝိတ်အများကြီး တက်ပါလိမ့်မယ်။

ဆိုဒ်သေးတဲ့ အင်္ကျီအဝတ်အစားဝယ်ဝတ်ပါ

ဆိုဒ်သေးတဲ့ အင်္ကျီတွေ ဂျင်းဘောင်းဘီတွေ ဝယ်ပြီး မိမိမြင်သာတဲ့နေရာမှာ ချိတ်ထားခြင်းက မိမိရဲ့ ရည်ရွယ်ချက် ပြီးမြောက်အောင် သတိပေးနည်းတစ်မျိုးပါပဲ။

အဖော်တစ်ယောက်ယောက်နဲ့ ဝိတ်ချပါ

မိမိလိုပဲ ဝိတ်ချဖို့ ကြိုးစားနေတဲ့ သူတစ်ယောက်ယောက်နဲ့ အတူတူဝိတ်ချခြင်းက မိမိပန်းတိုင်ဆီ ၂၀ ရာခိုင်နှုန်းခန့် ပိုပြီး လျင်လျင်မြန်မြန်ရောက်အောင် ကူညီပေးတယ်လို့ လေ့လာချက်တစ်ခုက ဖော်ပြနေပါတယ်။

Source: Brightside.me