ဒူးနာတာက ပိုဆိုးမလာခင်မှာ သက်သာအောင်လုပ်သင့်ပါတယ်။ လေ့ကျင့်ခန်းလုပ်ပေးတာကလည်း အရမ်းကောင်းတဲ့ အလေ့အကျင့်တစ်ခုပါ။ ဒါကြောင့် အိမ်မှာလည်း အေးဆေးလုပ်လို့ရအောင် ဒူးနာတာသက်သာစေမယ့် လွယ်ကူသောလေ့ကျင့်ခန်း ၈ မျိုးကို မျှဝေပေးလိုက်ပါတယ်။
လေ့ကျင့်ခန်း ၁
လမ်းလျှောက်ပေးတာက အရိုးအဆစ်သန်မာစေပြီး ဒူးနာတာလည်း သက်သာစေပါတယ်။ ခြေလှမ်း ဘယ်နှစ်လှမ်း (သို့) ဘယ်နှစ်မိနစ် လမ်းလျှောက်မယ်ဆိုပြီး သတ်မှတ်ကာ လမ်းလျှောက်ပေးပါ။
လေ့ကျင့်ခန်း ၂
ညီညာတဲ့ကြမ်းပြင်ပေါ်ကို ခြေထောက်ဆင်းထားပြီး ပေါင်နှစ်ဖက်လုံးရဲ့ ကြွက်သားတွေကို ညှစ်ပေးပါ။ ၅ စက္ကန့်လောက်ညှစ်ထားပြီး ပြန်ဖြေလျှော့လိုက်ပါ။ ပြီးရင် ပြန်လုပ်ပါ။ အဲ့အတိုင်း အနည်းဆုံး ၁၀ ကြိမ် လုပ်ပေးပါ။
လေ့ကျင့်ခန်း ၃
ထိုင်ခုံမှာထိုင်ပြီး ခြေထောက်တစ်ဖက်ကို အရှေ့ထုတ်ကာ ဆန့်ထားပါ။ ကိုယ်မြှောက်နိုင်သလောက် မြှောက်ပြီး ဆန့်ထားပါ။ ပြီးရင် ဖြေးဖြေးချင်းစီ ပြန်ချပါ။ အဲ့အတိုင်း ခြေထောက်ကို ဘယ်ညာတစ်လှည့်စီ တစ်ဖက်ကို ၁၀ ကြိမ် လုပ်ပေးပါ။
လေ့ကျင့်ခန်း ၄
လက်နှစ်ဖက်ကို နံရံမှာကပ်ထားပြီး ပုံမှာလုပ်ပြထားသလို ခြေထောက်တစ်ဖက်ကို ကွေးလိုက်ပါ။ ၅ စက္ကန့်လောက် ကွေးထားပြီး ပြန်ချ၊ ပြီးရင် ပြန်လုပ်ပါ။ အဲ့အတိုင်း ခြေထောက်ကို ဘယ်ညာတစ်လှည့်စီ တစ်ဖက်ကို ၁၀ ကြိမ် လုပ်ပေးပါ။
လေ့ကျင့်ခန်း ၅
ယောဂဖျာပေါ်မှာလှဲပြီး ပုံမှာလုပ်ပြထားသလို ဒူးထောင်ထားပြီး နောက်ကျောနဲ့ တင်ပါးကို အပေါ်နည်းနည်းကြွလိုက်၊ ဖျာနဲ့ပြန်ကပ်လိုက် လုပ်ပေးပါ။ ဒါလည်း ၁၀ ကြိမ်လုပ်ပေးရင် ရပါပြီ။
လေ့ကျင့်ခန်း ၆
ခြေထောက်နှစ်ဖက်ကို ရှေ့နောက်အနေအထားနဲ့ နည်းနည်းကားထားပါ။ ပြီးရင် ပုံထဲကလို ထိုင်ပါ။ ဒူးက ကြမ်းပြင်နဲ့ထိစရာမလိုပါဘူး။ ပြီးရင် ပြန်ထလိုက်၊ ပြန်ထိုင်လိုက်နဲ့ ၁၀ ကြိမ်လုပ်ပေးပါ။ အကြိမ်ရေပြည့်ရင် ခြေထောက်ကို ဘယ်ညာပြောင်းပြီး နောက်ထပ် ၁၀ ကြိမ် ထပ်လုပ်ပေးပါ။
လေ့ကျင့်ခန်း ၇
နံရံမှာကပ်ကာ ခြေထောက်ကို ထောင့်ချိုးကျကျ ကွေးပြီးတစ်ဝက်ထိုင်လိုက်၊ ပြန်ထလိုက်နဲ့ ၁၀ ကြိမ် လုပ်ပေးရမှာပါ။ တစ်ဝက်ထိုင်တဲ့အချိန်မှာ ချက်ချင်းပြန်မထပဲ ၅ စက္ကန့်လောက်နေပြီးမှ ပြန်ထပါ။
လေ့ကျင့်ခန်း ၈
ခါးကိုမတ်မတ်ထားပြီး ပုံမှာလုပ်ပြထားသလို လှေကားကိုတက်လိုက်၊ ပြန်ဆင်းလိုက်နဲ့ လေ့ကျင့်ခန်း လုပ်ပေးရမှာပါ။ ဒါလည်း ၁၀ ကြိမ်လုပ်ပေးရင် ရပါပြီ။
