သင်ကအခုတလော ပုံမှန်ထက်ပိုဝလာသလို ခံစားရတာကြောင့် နေရထိုင်ရသက်တောင့်သက်သာ မရှိတော့တာ၊ အဝတ်အစားတွေကျပ်လာတာနဲ့ ကိုယ့်ကိုကိုယ်ယုံကြည်မှုနည်းလာတာစတဲ့ပြဿနာ တွေနဲ့ ကြုံလာရပါသလား။ ဒါတွေကတော့ သင့်ရဲ့ ဝိတ်ကိုပြန်ထိန်းဖို့လိုလာပြီဆိုတာကို ပြနေတဲ့ လက္ခဏာတွေပဲဖြစ်ပါတယ်။ ကိုယ်လိုချင်တဲ့ ဝိတ်အနေအထားအထိ သိသိသာသာကျဖို့အတွက် မျှတမှန်ကန်တဲ့ အစားအသောက်နဲ့အတူ လေ့ကျင့်ခန်းပုံမှန်ပြုလုပ်ပေးဖို့လိုပါတယ်။ ဒီတစ်ခေါက်မှာတော့ သင့်ကို အမှန်တကယ်ဝိတ်ကျလာစေမယ့် ကိုယ်ခန္ဓာအတွက် အထိရောက်ဆုံး လေ့ကျင့်ခန်းလေးတွေကို မျှဝေပေးလိုက်ပါတယ်။

Walking

လမ်းလျှောက်ခြင်းက အလွယ်ကူဆုံးနဲ့အထိရောက်ဆုံးလေ့ကျင့်ခန်းတစ်ခုဖြစ်တဲ့အပြင် နှလုံးကျန်းမာရေးအားကောင်းစေဖို့နဲ့ လုံလောက်တဲ့ ကယ်လိုရီပမာဏလောင်ကျွမ်းစေဖို့လည်း အထောက်အကူပြုနိုင်ပါတယ်။ ကျန်းမာရေးအတွက်အကျိုးများစွာရတဲ့အပြင် အချိန်နဲ့ နေရာမရွေး ပြုလုပ်နိုင်တာကြောင့် လေ့ကျင့်ခန်းလုပ်ဖို့အချိန်သီးသန့်မပေးနိုင်တဲ့သူတွေအတွက်လည်း ကိုယ်လက်လှုပ်ရှားပြီးသားဖြစ်စေမှာပါ။ ဒါကြောင့် ပုံမှန်လမ်းလျှောက်ပေးဖို့အကြုံပြုချင်ပါတယ်။

Interval Training

Interval Training ဆိုတာက ခုန်ပေါက်ခြင်း၊ ပြေးခြင်းစတဲ့ ပြင်းထန်တဲ့လေ့ကျင့်ခန်းတွေကို စက္ကန့်အနည်းငယ်နားပြီး ပျမ်းမျှ ၁၅မိနစ်ခန့် ထပ်ခါထပ်ခါ ပြုလုပ်ပေးရတာမျိုးဖြစ်ပါတယ်။ Interval Training က ကိုယ်ခန္ဓာ ကျစ်လစ်ပြီး အလွယ်တကူဝိတ်ကျလာစေနိုင်တာကြောင့် လေ့ကျင့်ခန်း လုပ်နေကျသူတွေအပြင် လတ်တလောမှစလုပ်မယ့်သူတွေပါ ပြုလုပ်နိုင်တဲ့လေ့ကျင့်ခန်းလုပ်နည်း တစ်မျိုးဖြစ်ပါတယ်။

Squats


ခါးမတ်၊ တင်ကော့ပြီးပြုလုပ်ရတဲ့ Squats လေ့ကျင့်ခန်းကတော့ တင်သားနဲ့ပေါင်တံတစ်ဝိုက် ကျစ်လစ် သွယ်လျစေမယ့် လေ့ကျင့်ခန်းတစ်မျိုးဖြစ်တာကြောင့် အဓိကအနေနဲ့ ကိုယ်ခန္ဓာအောက်ပိုင်းအဆီရှိတဲ့ သူတွေပြုလုပ်ပေးသင့်ပါတယ်။ ဝိတ်ကျချင်တဲ့သူတွေအနေနဲ့ Squats ကို နေ့စဉ် အနည်းဆုံး ၁၅ကြိမ် သုံးကြော့ခန့်ပြုလုပ်ပေးဖို့ လိုပါတယ်။

Lunges

ပုံပါအတိုင်းခြေထောက်နှစ်ဖက်ကိုအလှည့်ကျ အောက်ကြမ်းပြင်နဲ့မထိစေဘဲ ကိုင်းညွန့်ပေးရတဲ့ Lunges လေ့ကျင့်ခန်းက ကြွက်သားတည်ဆောက်မှုကောင်းစေပြီး Squats နည်းတူ ခန္ဓာကိုယ် အောက်ပိုင်းအဆီတွေကျစေပါတယ်။ Lunges ပြုလုပ်ခြင်းကအစပိုင်းမှာ ခက်ခဲနိုင်တာကြောင့် ခြေထောက်တစ်ဖက်စီကို ၁၀ ခေါက်မှ ၁၅ ခေါက်အထိပြုလုပ်ပေးခြင်းနဲ့စလုပ်နိုင်ပါတယ်။

Push Ups

ဒိုက်ထိုးခြင်းက ပုခုံးနဲ့ လက်မောင်းကြွက်သားတွေကျစ်လစ်သန်မာစေပြီး ဗိုက်နဲ့လက်မောင်း တစ်ဝိုက်အဆီတွေကို အချိန်တိုအတွင်းကျစေနိုင်ပါတယ်။ ဒိုက်ထိုးခြင်းကို အကြိမ်ရေများများ ပြုလုပ်နိုင်လေလေ ခန္ဓာကိုယ်တွင်းအဆီလျှော့ချနိုင်လေပဲဖြစ်ပါတယ်။

Abdominal Crunches


ဝမ်းဗိုက်ကိုတင်းပြီးအိပ်ချမတင်ပြုလုပ်ပေးရတဲ့ Abdominal Crunches ကတော့ ဗိုက်ပူတတ်တဲ့ သူတွေအတွက်အကျိုးရှိတဲ့လေ့ကျင့်ခန်းဖြစ်ပါတယ်။ ပုံမှန်ပြုလုပ်ပေးမယ်ဆိုရင် ခါးဘေးက အဆီပိုတွေကိုအချိန်တိုအတွင်းဖယ်ရှားနိုင်မှာပဲဖြစ်ပါတယ်။

Bent-Over Row

ပုံပါအတိုင်း ခါးကိုင်းကာ ဝမ်းဗိုက်ကြွက်သားကို တင်းထားပြီး ကျောရိုးဆွဲဆန့်ထားရမှာဖြစ်ပါတယ်။ ပြီးနောက်လက်နှစ်ဖက်ကို  ခန္ဓာကိုယ်ဘေးတစ်ဖက်ဆီကနေ အလေးနှစ်တုံးကို မ ပြီး ဖြေးဖြေးချင်း ပြန်ချရပါမယ်။ စလုပ်မယ့်သူတွေအနေနဲ့ အလေးတုံးမပါဘဲ ဒါမှမဟုတ် အပေါ့ဆုံးဖြစ်တဲ့ အလေးတုံးတွေကို အသုံးပြုပေးဖို့လိုပါတယ်။ ဒီလေ့ကျင့်ခန်းက ကိုယ်ခန္ဓာအပေါ်ပိုင်း ဂျိုင်းနဲ့ လက်မောင်းဘေးက နောက်ကျောအဆီတွေကို ချေဖျက်တဲ့နေရာမှာ အထောက်အကူပြုနိုင်ပါတယ်။

Photo Source: Pinterest

By MyStyle Myanmar