သင်က အလုပ်များတဲ့သူတစ်ယောက် ၊ အားကစားလုပ်ဖို့ အချိန်အများကြီးမပေးနိုင်တဲ့ သူတစ်ယောက်ဆိုရင် အခုပြောပြမယ့် ၇ မိနစ်စာ Workout က သင့်အတွက် ဖြစ်ပါတယ်။ လွယ်ကူရိုးရှင်းတဲ့ Workout ကစားနည်းတွေဖြစ်တဲ့အပြင် အချိန်တိုအတွင်း ထိရောက်မြန်ဆန်စွာပြုလုပ်နိုင်မှာ ဖြစ်ပါတယ်။

၇ မိနစ်စာ Workout တွေထဲမှာ မတူညီတဲ့ Workout ကစားနည်း ၆ ခု ပါဝင်ပါတယ်။ Workout တစ်ခုကို ၁ မိနစ် ခန့် ပြုလုပ်ရမှာဖြစ်ပြီး လေ့ကျင့်ခန်းတစ်ခုနဲ့ တစ်ခုကြားမှာ ၁၀ စက္ကန့်လောက် Break ယူပေးရမှာ ဖြစ်ပါတယ်။ ကဲဒါဆို ၇ မိနစ်စာ Workout တွေက ဘာတွေဖြစ်မလဲ ကြည့်လိုက်ရအောင်ပါ။

(၁) Wall Sits

နံရံမှာ ကျောမှီထားပြီး ကုလားထိုင်ပေါ်မှာ ထိုင်တဲ့ပုံစံ ပြုလုပ်ပေးရပါမယ်။ ခြေထောက် ၂ ဖက်ကို တင်ပါးအကျယ်အတိုင်း ချဲထားပြီး ဒူးတွေကို ၉၀ ဒီဂရီ ကွေးထားရပါမယ်။ ဒီအနေအထားအတိုင်း ၁ မိနစ်ခန့် ဟန်ချက်ထိန်းထားပါ။

(၂) Push-Ups

Plank ထောက် Position အတိုင်း ပခုံးအကျယ်ကို ချဲထားပြီး ခန္ဓာကိုယ်ကို မျဉ်းဖြောင့်ပုံစံ မတ်မတ်ထားရပါမယ်။ ပြီးတဲ့အခါ တံတောင်ဆစ်တွေကို ကွေးချပြီး ဒိုက်ထိုးရပါမယ်။  ၁ မိနစ်အတွင်း အကြိမ်ရေများများ ရသလောက် ဒိုက်ထိုးပေးပါ။

(၃) Ab Crunch

အရင်ဆုံး ကြမ်းပြင်ပေါ်မှာ ခန္ဓာကိုယ်ကို ပလက်အနေအထားနဲ့ ဒူးတွေကို ထောင်ထားပြီး ပုံစံယူပါ။ ပြီးတဲ့အခါ ဝမ်းဗိုက်ကြွက်သားတွေကို အဓိကအားပြုပြီး ခန္ဓာကိုယ်ကို ဒူးတွေဆီရောက်အောင် ပင့်တင်ပေးရပါမယ်။ ဒီနည်းအတိုင်း ပုံမှန်လေး ၁ မိနစ် ကြာ ပြုလုပ်ပေးရပါမယ်။

(၄) Step-Up

Step-Up ကစားဖို့ ကုလားထိုင် သို့မဟုတ် Gym Bench တစ်လုံး လိုပါတယ်။ ခုံရှိကို မျက်နှာမူပြီး မတ်တပ်ရပ်အနေအထား ပုံစံယူပေးရပါမယ်။ ပြီးရင် ခုံပေါ်ကို ဘယ်ခြေအရင်လှမ်းပြီး တက်ပေးပါ။

ထို့နောက် မူလပုံစံအတိုင်း အောက်ကိုပြန်ဆင်းပြီး နောက်တစ်ကြိမ်ကိုတော့ ညာခြေနဲ့ လှမ်းပြီး တက်ပေးရပါမယ်။ ဒီနည်းအတိုင်း ၁ မိနစ်ခန့် ပြုလုပ်ပေးပါ။

(၅) High Knees

ဒီလေ့ကျင့်ခန်းကတော့ ဒူးမြှောက်လေ့ကျင့်ခန်း ဖြစ်ပါတယ်။ နေရာမှာပဲ မရွေ့လျားပဲ ပြေးတဲ့ပုံစံ ပြုလုပ်ပေးရမှာ ဖြစ်ပါတယ်။ ဒူးကို အပေါ်သို့ မြှင့်နိုင်သမျှ မြင့်မြင့်မြှောက်တင်ပေးပါ။

ခြေထောက် ၂ ဖက်ကို ဘယ်ညာ စည်းချက်ညီညီ မြှောက်ရမှာ ဖြစ်ပါတယ်။ ဒီအတိုင်း ၁ မိနစ် ပြုလုပ်ပေးပါ။

(၆) Push-Up And Rotation

ပုံမှန် ဒိုက်ထိုးလေ့ကျင့်ခန်းအတိုင်း ပုံစံယူပါ။ ပြီးတဲ့အခါ ဒိုက်တစ်ချက်ထိုးပြီး ခန္ဓာကိုယ်ကိုစောင်းကာ ဘယ်လက်ကို မျက်နှာကျက်ရှိရာသို့ ၉၀ ဒီဂရီ မြှောက်ပေးရပါမယ်။

ပြီးရင် မူလပုံစံအတိုင်း လက်ကိုပြန်ချပါ။ နောက်တစ်ကြိမ်မှာတော့ ဒိုက်ထိုးပြီး ညာလက်ကို မြှောက်ပေးရပါမယ်။ ဒီအတိုင်း ၁ မိနစ်ခန့်ပြုလုပ်ပေးပါ။

လေ့ကျင့်ခန်းတွေ အားလုံးကို ဆက်တိုက်ပြုလုပ်ပေးရမှာဖြစ်ပြီး လေ့ကျင့်ခန်းတစ်ခုနဲ့တစ်ခုကြားမှာ ၁၀ စက္ကန့်လောက်သာ အနားယူပေးရမှာ ဖြစ်ပါတယ်။ ၇ မိနစ်စာ Workout ဆိုပေမယ့် အချိန်ရရင်ရသလို လေ့ကျင့်ခန်းတစ်ခုစီကို အချိန်တိုးပြီး လုပ်ဆောင်နိုင်ပါတယ်။